Ang Akong Ikapulo Dili Makapaabut

Sa hinapos nga bahin sa akong pagka-teenager, sa pagsugod nako sa paggahin og panahon uban sa full-time nga mga misyonaryo, naamgohan nako kon unsa ka mahinungdanon ang pag-angkon og pagpamatuod mahitungod sa mga baruganan nga sa dili madugay akong itudlo isip usa ka misyonaryo. Nakahukom ko nga ang usa sa mga baruganan nga gusto nakong mas masabtan pa mao ang ikapulo.

Daghang mga tawo ang nakabaton og pagpamatuod mahitungod sa ikapulo atol sa mga panahon sa pinansyal nga kalisud. Apan sa pagdako, kanunay ko nga adunay sobra. Kon ugaling ako adunay pinansyal nga panginahanglan, ang akong mga ginikanan ra ang bahala niini. Mapasalamaton ko niana, apan sa dihang akong nasayran nga sila ang mobayad alang sa akong misyon, nakahukom ko nga gusto nakong bayaran ang katunga sa akong misyon nga ako mismo pinaagi sa akong trabaho isip usa ka part-time nga magtutudlo.

Nianang higayuna, akong naamgohan nga wala ko makabayad og tibuok 10 porsyento nga ikapulo gikan sa akong katapusang sweldo. Nakahukom ko nga inigka sunod sweldo, bayaran nako ang kulang aron mahimo kong full-tithe payer.

Sa dihang gisweldohan ko nianang bulana, hinoon, ang kwarta mas gamay kay sa akong gidahuman. Ang trabaho nga akong gihimo ingon og dili regular, mao nga ang akong sweldo managlahi matag bulan. Naamgohan dayon nako nga ang akong sweldo dili paigo sa akong mga galastuhan ug dili ko makabayad sa kulang sa unsay akong nautang sa Ginoo sa ikapulo sa akong miaging sweldo.

Gikonsiderar nako ang akong mga opsyon ug dayon naghunahuna, “Impason lang nako ang akong ikapulo sunod bulan.” Apan nahinumduman nako dayon ang leksyon sa institute of religion mahitungod sa ikapulo. Labi nakong nahinumduman ang unsay giingon sa Ginoo diha sa Daang Tugon: “Sulayi ninyo ako karon” (Malaquias 3:10). Usa kini ka oportunidad alang kanako aron sulayan ang baruganan ug aron makabaton og mas lig-on nga pagpamatuod sa unsay akong itudlo sa uban sa dili madugay.

Sa dihang mibayad ko sa akong ikapulo, nindot kaayo ang akong gibati nga naka-impas. Apan ang oportunidad nga “sulayan” ang Ginoo miabut gayud pagkasunod adlaw—mas sayo ug sa mas maayo nga paagi kay sa ako gayud nga gidahuman—sa dihang gitanyagan ko og usa ka full-time nga trabaho isip usa ka magtutudlo sa kindergarten. Makatrabaho gayud ko og maayo hangtud sa akong pagbiya alang sa akong misyon, ug ang kwarta nga akong makuha mosobra pa kay sa akong gikinahanglan sa pagbayad og katunga sa mga galastuhan sa akong misyon. Kini nga panalangin nakapatubo gayud sa akong pagpamatuod mahitungod sa ikapulo. Kana nga pagpamatuod balik-balik nga napalig-on samtang gipakigbahin ko kini sa mga tawo nga akong giserbisyohan didto sa Germany Munich/Austria Mission sulod sa sunod nga duha ka tuig.

Nasayud ko nga ang baruganan sa ikapulo tinuod ug nga ang Ginoo “moabli [kanato] sa mga bintana sa langit” ug mobu-bu sa panalangin nga hilabihan ka daghan “nga wala na unyay dapit nga igong kabutangan sa pagdawat niini” (Malaquias 3:10).