Susiha ang Ligid

Sa dihang 15 anyos pa ko, ang akong pamilya ug ako nagbakasyon gikan sa among balay sa Arizona ngadto sa tunga-tungang Estados Unidos. Kami nagsakay paingon sa daghang mga estado, lakip na ang Kansas, Texas, Arkansas, Missouri, ug Illinois.

Ang among bakasyon maayo. Kami nakakat-on nga malingaw sa panag-uban sa usag usa atol sa taas nga biyahe sakay sa van gikan sa usa ka dapit ngadto sa laing dapit.

Sa among paghunong sa usa ka restaurant usa ka gabii, kami naghinam-hinam sa pagkaon. Sa among paggawas sa van, kalit lang nakabati ko og hilum apan gamhanang impresyon nga nagsulti kanako sa pagtan-aw sa luyo nga ligid sa among van. Misugod ako sa paglakaw padulong sa restaurant, apan dili nako mapugngan ang pagbati. Milingi ko ug dayon mihunong. Ang impresyon miabut sa akong hunahuna: “Susiha ang luyo nga ligid.” Kini hilabihan ka kusog nga dili ko makahimo sa pagpasagad niini.

Miduol ko sa likod sa van ug nakadungog og nagsiyok nga tingog. Sigurado, ang tuong ligid sa luyo adunay buslot ug hapit na ma-flat. Midagan ko aron sa pagkuha ni papa, kinsa didto na sa sulod sa restaurant kauban ang ubang sakop sa pamilya.

Gidala sa akong papa ang van ngadto sa estasyonan sa gas sa wala pa kini hingpit nga ma-flat. Tungod kay ang ligid wala madaut, ang pag-ayo dili mahal ug dali ra. Ug among napaayo ang na-flat nga ligid mga minuto lang gyud sa wala pa manirado ang service station nianang gabhiona. Wala ko masayud kon unsa ang mahitabo kon gipasagdaan nako ang pag-aghat. Apan ang akong nasayran nga tungod kay ako mitubag, kami nakapadayon sa among pagbiyahe nga luwas ra ug hayahay.

Sukad niadto nga panghitabo, kanunay akong masaligon sa gahum sa Espiritu Santo ug sa unsang paagi tinuoray nga nakapanalangin kanamo isip mga miyembro sa Simbahan sa pagbaton nianang espesyal nga linya sa komunikasyon. Mapasalamaton ko niana nga kasinatian, kay kini magpabilin kanako, hangtud sa hangtud magpahinumdom kanako nga ang atong Amahan sa Langit nahigugma, nag-atiman, ug nagtan-aw sa tanan Niyang mga anak.