2011
Pagpadayag: Matag Tinulo
Pebrero 2011


Pagpadayag Matag Tinulo

Si Luis Andres Varela nagtan-aw og maayo sa tinulo sa tubig nga naipon sa tumoy sa talinis nga bato ibabaw sa langub didto sa mga Langub sa Taulabe sa Honduras. Matag tinulo makapatubo sa talinis nga bato ibabaw sa langub pinaagi sa pagdugang pa og gamay ngadto sa unsay nahabilin sa miaging mga tinulo.

Apan si Luis nakakita og labaw pa sa talinis nga bato ibabaw sa langub—nakita niya ang leksyon mahitungod sa iyang kaugalingon.

“Ang talinis nga mga bato ibabaw sa langub nagtubo matag tinulo,” miingon siya. “Niana usab nga paagi nga ang atong mga pagpamatuod motubo. Ang Espiritu Santo nagtudlo kanato og anam-anam. Matag tinulo nakatabang kanato nga motubo diha sa kahibalo mahitungod sa ebanghelyo.” (Tan-awa sa 2 Nephi 28:30.)

Nahinumduman ni Luis ang sama nga panghitabo sa iyang kinabuhi. Usa ka adlaw samtang ang iyang pamilya nagbasa sa mga kasulatan, gibati niya ang kalinaw, makapahupay nga pagbati nga ang unsay iyang gibasa tinuod.

“Ako 14 pa lang, apan nasayud ko nga ako nakadawat og pagpadayag tungod kay gibati nako ang Espiritu Santo nga nagsulti kanako nga ang Simbahan tinuod ug si Joseph Smith usa ka propeta,” nag-ingon siya. “Tingali dili pa daghan ang akong nadawat—ako sama pa gihapon sa usa ka gamay nga talinis nga bato ibabaw sa langub—apan kon buhaton nako ang kinahanglan nakong buhaton aron ako makadawat sa pagpadayag, ang akong kahibalo ug pagpamatuod mopadayon sa pagtubo.”

Si Luis nag-ingon nga ang pag-adto sa simbahan, pagtambong sa seminary, pagtuon sa mga kasulatan, ug pagpuasa ug pag-ampo ang tanan nag-andam kanato sa pagdawat og “pagpadayag ug dugang nga pagpadayag” (D&P 42:61).

“Kon buhaton ko kini nga mga butang,” siya nag-ingon, “ang akong hugot nga pagtuo, sama niadtong talinis nga mga bato ibabaw sa langub, mahimong mainat gikan dinhi ngadto sa langit.”

Ibabaw: Photograph © Photononstop/SuperStock; tuo: gilitratohan ni Adam C. Olson