Pagpadayag Nagdagayday gikan sa Langit

Ang kakusog sa agas mokuso-kuso niadtong kinsa mopaduol og maayo sa Pulhapanzak Falls didto sa Honduras. Apan baliwala lang kang José Santiago Castillo. Alang kang José, ang nagdagayday nga tubig nagrepresentar sa usa ka saad nga nahimo nang makahuluganon kaniya sukad nga ang Langitnong Amahan unang mitubag sa iyang mga pag-ampo mahitungod sa ebanghelyo.

“Kon kita gusto og kaalam, kita makapangutana,” nag-ingon si José (tan-awa sa Santiago 1:5). “Ingon nga ang usa ka tawo dili makapahunong niini nga tubig, ang Ginoo nagsaad nga Siya mobu-bu og kahibalo ngadto sa mga Santos.” (Tan-awa sa D&P 121:33.)

Ang kasinatian ni José diha sa Simbahan nakatudlo kaniya nga ang usa ka pagpamatuod nagtubo pagtulun-an ngadto sa lain nga pagtulun-an, apan kana dili kinahanglan nga mahimo sa hinay nga proseso. Adunay baha sa pagpadayag nga magamit.

Si Propeta Joseph Smith mitudlo, “Ang Dios wala magpadayag bisag unsa ngadto ni Joseph, apan unsay Iyang buot nga mapahibalo ngadto sa Napulog Duha, ug bisan sa pinakaubos nga Santos nga mahibalo sa tanang mga butang nga ingon ka dali kutob sa iyang mahimo sa pagdawat sa tanan.”¹

“Sa wala pa bunyagi, nangutana ko sa Langitnong Amahan sa pagmatuod nga kanang unsay Iyang gipadayag kanako tinuod: ang Basahon ni Mormon, ang Pulong sa Kaalam, ikapulo,” nag-ingon si José, nga karon nagserbisyo isip presidente sa elders quorum. “Ang pagpangutana Kaniya mao ang paagi nga atong makuha ang tubag.” (Tan-awa sa Moises 1:18.)

Hinoon, kita kinahanglan gayud nga mag-andam sa atong mga kaugalingon sa pagdawat sa pagpadayag. “Kon gusto kita nga mabasa, moubog kita sa tubig,” si José nag-ingon. “Kon gusto kita og pagpadayag, moadto kita kon asa ihulog ang pagpadayag. Kinahanglan gayud nga kita maanaa sa dapit nga kita kinahanglang anaa, mobuhat sa unsay kinahanglan natong buhaton. Makakat-on kita og daghang mga butang kon kita magmakugihon.” (Tan-awa sa 1 Nephi 15:8–11.)