Pangalagaan ang mga Maralita

Larawan

Elder D. Todd Christofferson

“Sa buong kasaysayan, hinatulan ng Panginoon ang mga lipunan at mamamayan ayon sa pangangalaga nila sa mga maralita. Sinabi niya:

“‘Sapagkat ang lupa ay sagana, at may sapat at matitira; oo, aking inihanda ang lahat ng bagay, at ibinigay sa mga anak ng tao na maging mga kinatawan ng kanilang sarili.

“‘Samakatwid, kung sinuman ang kukuha sa kasaganaan na aking ginawa, at hindi nagkakaloob ng kanyang bahagi, alinsunod sa batas ng aking ebanghelyo, sa mga maralita at nangangailangan, siya, kasama ng masasama, ay magtataas ng kanyang mga mata sa impiyerno, dahil sa paghihirap’ (D at T 104:17–18; tingnan din sa D at T 56:16–17).

“Bukod dito, ipinahayag Niya, ‘Sa inyong mga temporal na bagay kayo ay magiging pantay-pantay, at ito ay hindi nang laban sa kalooban, kung hindi ang kasaganaan ng mga pagpapatunay ng Espiritu ay ipagkakait’ (D at T 70:14; tingnan din sa D at T 49:20; 78:5–7).

“Kontrolado natin ang paggamit ng ating pera at kabuhayan, ngunit mananagot tayo sa Diyos sa pangangasiwang ito sa mga bagay sa daigdig. Nakasisiyang makita ang inyong pagiging bukas-palad sa mga handog-ayuno at proyektong pangkawanggawa. Sa paglipas ng mga taon, napagaan ang pagdurusa ng milyun-milyong katao, at di-mabilang ang iba pa na natulungan ang kanilang sarili dahil sa pagiging bukas-palad ng mga Banal. Gayunman, sa pagsusulong ng kapakanan ng Sion, dapat nating pag-isipan nang may panalangin kung ginagawa natin ang nararapat at lahat ng ipinagagawa ng Panginoon sa atin para sa mga maralita at nangangailangan.”

Elder D. Todd Christofferson ng Korum ng Labindalawang Apostol, “Sa Sion ay Magsitungo,” Liahona, Nob. 2008, 39.