Usa ka Matinuoron nga Ikapulo, usa ka Dakong Panalangin

Sa dihang hapit na ko mag-edad og 17, nabunyagan ko sa Ang Simbahan ni Jesukristo sa mga Santos sa Ulahing mga Adlaw ug mibati og tinguha nga moserbisyo sa Ginoo diha sa pagmisyon. Sa dihang miabut ang akong call sa misyon pipila ka tuig ang milabay, gitawag ko sa pagbiya sa Peru ug sa pagsangyaw sa ebanghelyo didto sa Siyudad sa Salt Lake.

Bisan kon naghunahuna ko sa dakong panalangin sa pagserbisyo og misyon, daghang mga butang nga kinahanglan nakong timbang-timbangon sa akong hunahuna: mga dokumento, passport, visa, mga sinina, ug, siyempre, kwarta. Nagtrabaho ko apan dili gayud paigo. Nawad-an ko og paglaum! May usa ka bulan og tunga sa dili pa ko molarga, akong nakita nga aduna lamang akoy gamay sa gikinahanglan nga kwarta. Ang mabuhat lamang nako mao ang pagduol sa Ginoo diha sa pag-ampo.

Tungod kay wala ko makapangita og dakong kwarta, ang mga ikapulo nga akong gihatag matag bulan gamay ra kaayo. Apan dali nakong naamgohan nga ang Ginoo wala magsapayan sa gamay nga kantidad: ang importante alang Kaniya nga kita nagbayad sa 10 porsyento nga Iyang gipangayo. Gibati nako ang lig-on nga pagtuo ug kasigurohan nga kon ako padayon nga mobayad sa ikapulo, ang Ginoo mohatag sa unsay akong gikinahanglan.

Ang tanan misugod sa pag-abut. Nakakuha ko og duha ka dugang nga mga trabaho ug nakuha ang akong mga dokumento. Daghang mga miyembro sa akong ward, ilabi na ang mga sister sa Relief Society, mitabang sa uban nakong kinahanglanon. Ug ang mga miyembro sa akong stake mitanyag usab sa ilang tabang. Miadto ko sa akong misyon nga aduna sa unsay gikinahanglan.

Isip usa ka full-time nga misyonaryo, gitudlo nako ang balaod sa ikapulo ug ang mga saad niini (tan-awa sa Malaquias 3:10) uban sa pasalamat ug pagpamatuod.