“Gibati nako nga nag-inusara sa simbahan. Unsaon nako sa pagkat-on aron mobati nga adunay labot?”

Pipila ka bulan ang milabay mibiya ko sa akong nasud aron moadto sa lain diin ang ako lamang kaila mao ang akong igsoong babaye ug ang iyang uyab. Sa simbahan gibati nako nga daw taga-gawas. Duha o tulo ka bulan ang milabay, ug gibati nako ang sama nga pagbati nga nag-inusara hangtud nakahukom ko nga mopahiyum sa uban ug mangutana, “Kumusta ka?” Matag Dominggo nga milabay, misulti sila kanako og labaw pa kay sa yano nga “Maayo man.” Nakatabang usab kini nga moapil sa seminary ug Mutual ug magtrabaho sa Personal nga Kauswagan kauban ang lain nga batan-ong mga babaye. Karon mibati ko nga komportable diha sa simbahan, nga daw ako anaa ra sa amoa.

Hinumdumi nga ang tanang katawhan mga anak sa Langitnong Amahan. Sulay sa pagpahiyum ug pagkamahigalaon sa tanan. Tabangi ang uban. Duola kadtong kinsa mibati usab og pag-inusara. Sa dihang nagserbisyo ko sa uban, gibati nako ang kalipay ug wala mobati nga nag-inusara. Kini mahinungdanon usab kaayo nga motambong sa seminary o institute. Atong mabati ang kainit ug kamaayo diha. Ayaw kahadlok sa pagpakigbahin sa imong mga problema o mga kabalaka. Kitang tanan mga managsoon, ug ang atong mga problema ug mga pagsulay susama ra.

Duha ka tuig na ang milabay ang akong pamilya ug ako mibalhin. Sa unang mga semana nga mitambong ko sa simbahan ug sa Mutual, gibati nako nga nag-inusara. Apan nag-ampo ko matag adlaw nga makabaton ko og bag-o nga mga higala ug mobati nga may labot sa akong bag-o nga ward. Sa hinay-hinay ganahan na ko ug nalipay na niini nga ward. Ako kinahanglan nga maoy mosugod sa pagpakighigala. Ako kinahanglan maoy mosugod sa pagpakig-istorya. Ako kinahanglan nga moapil gayud sa mga klase ug maminaw sa unsay gisulti sa uban. Uban sa tabang sa Langitnong Amahan, ako karon aduna nay suod nga pakighigalaay sa mga tawo nga wala nako damha nga mahimong mga higala.

Mga katuigan ang milabay ako adunay susama nga problema. Busa nakahukom ko nga maningkamot nga mahiapil ug mapakita sa mga tawo ang tinuod nga pagka-ako. Sa diha nga nakigsulti ko sa uban, nakigsulti usab sila kanako, ug kini naghatag og lig-on nga panaghigalaay nga mamugna diha sa tanan sa akong korum.

Nahimo nakong mas maayong mga higala ang mas batan-on nga mga grupo sa ka-edad ug mga lider, kay sa niadtong ka-edad ra nako. Nasayud ko nga moabut ang adlaw nga kamo mahimong managhigala niadtong anaa sa Simbahan, ug kon dili man, OK lang tungod kay makat-unan pa gihapon ninyo ang materyal sa Simbahan.

Gibati nako nga nag-inusara diha sa simbahan sulod sa daghang mga bulan. Nalingaw ko sa mga miting ug mga kalihokan, apan wala lang nako batia nga nahiangay ko uban sa laing batang mga babaye. Dayon misugod ko sa pagpakig-istorya sa akong mga lider kay sa akong naandan. Ang akong mga lider makalingaw. Sa dihang misugod ko sa pagpakig-istorya kanila, misugod ko sa pagbati nga mas may labot sa programa ug nga ako adunay mga higala diha sa Mutual.

Panahon sa mga kalihokan sa Simbahan mangutana ko sa akong kaugalingon, “Nganong wala man koy mga higala?” Gibati nako ang kaguol ug pag-inusara ug miduol ko sa Dios diha sa pag-ampo. Mihangyo ko sa akong Langitnong Amahan sa pagpadala kanako og maayo nga mga higala. Dili kini sayon, apan sa kadugayan nakabaton ko og daghang maayo nga mga higala. Wala na ko mahadlok nga makig-istorya ug moapil sa mga grupo sa batang mga babaye. Naamgohan nako nga ang Langitnong Amahan mitubag sa akong mga pag-ampo ug wala na gayud ako mag-inusara.

Sa una nakong pagsulod sa Young Women, gibati nako ang pag-inusara tungod kay nabiyaan nako ang akong mga higala sa klase sa Valiant. Hinoon, naningkamot ko sa pagsuporta sa batan-ong mga babaye, ug sila misuporta usab kanako, ug nakabaton ko og bag-ong mga higala ug nakig-interact kanila. Wala na ko mobati og pag-inusara, ug kana ang nakapalipay kanako. Karon ako na ang presidente sa mga Beehive, ug kon makakita ko og bag-o nga sister kinsa mobati nga dili komportable nga makauban kanamo, makig-istorya ko kaniya, mopasabut kaniya kon unsa ang among gibuhat diha sa klase, ug mopabati kaniya nga siya may labot kanamo.