Ang Ebanghelyo alang sa Tanan

Ang akong igsoong babaye ug ako miabut sa simbahan uban sa among higala. Sa sulod, diha sa tunga sa dakong cultural hall mao ang gamayng pundok sa mga tawo: duha ka mga sister nga misyonaryo ug tingali laing unom pa. Nanagdula sila og yano nga dula ug nalingaw sa popcorn ug juice. Ang tanan nangatawa ug nalingaw kaayo.

“Kinsa kining mga tawhana,” naghunahuna ko, “ug nganong malipayon man kaayo sila?” Nasayud gyud ko nga dili kini tungod sa dula nga ilang gidula o sa nindot nga palibut o sa pagkaon nga ilang gisaw-an. Kadtong tanan yano ra kaayo. Ang kalipay daw nagagikan sa ilang kinahiladman.

Kanunay ko nga naghunahuna kon asa nagagikan ang tinuod nga kalipay ug kon unsa ang akong buhaton aron makaplagan kini. Naghunahuna ko nga tingali nagagikan kini sa makapahinam nga mga kalihokan o pagbakasyon sa layo o pag-angkon sa tanan nga mahatag sa kalibutan. Ug dayon miadto ako nianang meetinghouse, diin kini nga mga tawo malipayon kaayo nga walay bisan unsa niadtong mga butanga. Nakahimo kini og usa ka mahinungdanon nga impresyon ngari kanako.

Human sa kalihokan ang mga misyonaryo mibarug sa agianan pagawas aron sa paglamano sa tanan. Sa dihang ang akong igsoong babaye naabut sa pultahan, nangutana sila kaniya kon interesado ba siya nga masayud pa og dugang mahitungod sa Simbahan. Miingon siya, “Dili, salamat na lang.” Pero kuryuso gihapon ko. Gibati nako ang “pagtinguha sa pagtuo” (Alma 32:27), busa sa dihang sila midapit kanako sa pagkat-on pa og dugang mahitungod sa ebanghelyo, miingon ko og oo.

Ang akong mga ginikanan dili interesado sa mga leksyon sa misyonaryo o sa pagpahigayon niini diha sa among balay, busa nakigsabut ko nga magpatudlo didto sa meetinghouse. Pagkasunod bulan nakat-unan nako ang mahitungod sa gipahiuli nga ebanghelyo ni Jesukristo—mahitungod kon unsa ang nakapahimong malipayon kaayo niadtong mga tawhana didto sa cultural hall. Nakat-unan nako nga ang kalipay nagagikan sa pagbuhat sa unsay gusto sa Ginoo nga akong buhaton, nga kini nagagikan sa kinahiladman, ug nga ako mahimong malipayon bisan unsa pa man ang nahitabo sa akong palibut. Kana nga doktrina “nindot ngari kanako” (Alma 32:28). Ganahan ko niini sa akong kinabuhi.

Usa ka bulan human nianang unang kalihokan, nakahukom ko nga magpasakop sa Simbahan. Sa katuigan nga misunod, ang akong mga ginikanan mipasakop usab sa Simbahan.

Nag-atubang ko og daghang mga hagit human sa akong bunyag. Ang mga kausaban nga gikinahanglan nakong pagahimoon sa akong kinabuhi mahinungdanon kaayo. Labaw pa niana, usahay mibati ko nga walay mga higala diha sa Simbahan, ug makapatintal ang pagbalik ngadto sa akong karaan nga mga higala. Apan ang akong tinguha nga mobati og kalipay—ug ang akong panabut nga kita mahimong malipayon bisan pa man sa mga kahimtang sa gawas—nakatabang kanako sa pagpadayon og adto sa simbahan. Ako nasayud nga ako dili “makabiya sa [akong] hugot nga pagtuo” (Alma 32:36). Sa pagkadugayan ako aduna nay mga higala sulod sa Simbahan kinsa mitabang kanako panahon sa kausaban. Ug samtang ako nagpadayon sa pagsunod sa ebanghelyo, ang akong pagpamatuod ug akong kalipay mitubo (tan-awa sa Alma 32:37).

Ang akong kasinatian sa pagkakabig—akong kaugalingon ug sa uban—nakatudlo kanako nga ang Espiritu makatandog ni bisan kinsa, bisan asa ug nga walay sumbanan sa hitsura kon si kinsa ang potensyal nga mahimong miyembro sa Simbahan. Kitang tanan nagkinahanglan sa ebanghelyo ni Jesukristo. Kitang tanan anaa sa proseso sa pagkahimong mas mahisama Kaniya.

Kana nga pagkaamgo nakatabang kanako isip usa ka misyonaryo didto sa São Paulo, Brazil; isip usa ka presidente sa misyon didto sa Belem, Brazil; ug isip usa ka miyembro sa Simbahan. Nakatabang kini kanako samtang ang akong asawa ug ako miandam sa among mga anak alang sa misyonaryo nga pagserbisyo. Duha sa among mga anak ang nakaserbisyo na og full-time nga misyon, ug sa wala pa sila mobiya, gipahinumduman nako sila nga dili mohukom sa mga tawo pinaagi sa ilang panagway o sa pamaagi sa ilang pagpakabuhi. “Ayawg hunungi ang usa ka tawo tungod lamang kay nakita nimo sila nga lahi,” giingnan nako sila. “Sulayi og tan-aw ang kinahiladman. Basin og adunay laing Carlos diha.”

Mapasalamaton ko nga nahibalo nga kitang tanan mga anak sa Dios ug nasayud nga ang tanan—dili lamang ang pipila ka mga tawo—kandidato sa pagdawat sa kalipay nga nagagikan sa pagsunod sa ebanghelyo ni Jesukristo.