Sa Dihang Nahimo Akong Dili na Makita

Mao pa lang ang pag-abut namo sa among lawak sa motel sa dihang ang telepono mibagting. Nasayud ko nga dili kini maayong balita mahitungod ni Jodi, ang akong siyam ka bulan nga igsoong babaye. Na-coma siya sukad pagkatawo ug nagkinahanglan og kada-oras nga pag-monitor ug espesyal nga pagpakaon gamit ang tubo. Temporaryo namong gibilin si Jodi sa care center aron ang among pamilya makahimo og gikinahanglan kaayo nga bakasyon.

Gitubag nako ang telepono. Ang akong lolo ang anaa sa linya. Ang iyang tingog kusganon: “Tawga imong amahan.”

Ang ilang panagsultihanay nahuman dayon. Ang akong kahadlok nakumpirmar. Si Jodi namatay.

Pagkasunod adlaw, human kami miabut sa balay, nakaginhawa ko og maayo. Ang school bus diha na sa karsada. Ang akong mga higala moabut na. Sa katapusan ako aduna nay usa ka tawo nga akong ka-edad nga masultihan sa akong kasakit.

Apan, samtang nagbarug ko sa agianan sa akong sakyanan nga naghulat sa akong mga higala, lahi nga butang ang nahitabo. Mora og hapit ko mahimong dili na makita. Nagtan-aw ko sa akong mga higala samtang milabang sila ngadto sa pikas daplin sa karsada ug mipadayon nga nag-istoryahanay sa usag usa. Wala gani sila motan-aw nako.

Pagkasunod buntag wala ko kuhaa sa akong mga higala sama sa ilang naandan nga buhaton. “Masabtan ra kana,” naghunahuna ko. Nasayud tingali sila nga dili ko moeskwela tungod sa plano sa paglubong. Apan wala sila moabut pagkasunod adlaw o sa sunod o sunod pa. Wala na gani ko nila hulata human sa klase.

Atol niining panahona ang akong pamilya nakadawat og daghan kaayong suporta gikan sa Relief Society ug sa uban nga mga miyembro sa ward. Apan, ang chicken casserole gamay ra og nahimo aron sa paghupay sa akong 13 anyos nga nasakitang kasingkasing. Sa dihang mibalik ko sa Mutual, ang akong adviser mihatag og leksyon kabahin sa kinabuhi human sa kamatayon. Misugod ko sa paghilak. Ang akong adviser miduko ug mipadayon og basa. Ang akong mga klasmeyt mitutok sa unahan. Midanguyngoy ko. Unta adunay usa ka tawo nga mohilak uban kanako ug mogakos kanako.

Sa pagtan-aw og balik niini nga mga panghitabo, nakaamgo ko nga ang akong mga higala dili ingon nga dili mabination ug walay pagpakabana. Wala lang sila masayud kon unsaon pagtubag sa akong kasakit. Nagtuo sila nga gusto kong mag-inusara sa pagbangutan ug, tungod kay anaa ko sa pagbangutan, basin dili ko gusto nga maghimo og bisan unsang butang nga makalingaw.

Ania ang unsay akong gipangandoy nga mahibaloan unta sa akong mga higala ug adviser:

Magmahimong anaa alang sa inyong higala. Padad-i siya og sulat o bulak, apan ang labing importante, dad-a ang imong kaugalingon. Gaksa siya ug pahibaloa siya nga kamo nagpangga kaniya. Ug kutob sa mahimo, adto aron sa pagtan-aw o sa paglubong.

Ilakip ang inyong higala sa mga butang nga kanunay ninyong gibuhat. Ang inyong higala nag-adjust na sa pagkawala sa usa ka minahal. Ayaw na niya ipa-adjust ang pagkawala usab sa inyong panaghigalaay. Adunay usa ka butang nga makapahupay sa pagbuhat sa naandan nga mga butang.

Ayaw paghunahuna nga kinahanglang mohatag og wali kabahin sa kinabuhi human sa kamatayon. Kon kini nga matang nga leksyon ihatag, buhata ang gitambag ni Alma: “Pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:9). Ang inyong higala tingali nasayud na nga makita niya ang iyang minahal pag-usab, ug kon wala pa, ang hilisgutan moabut sa natural nga pamaagi samtang nagpahayag siya sa iyang mga hunahuna ug mga kabalaka. Mao na kana ang panahon sa paghatag sa inyong pagpamatuod mahitungod sa plano sa kaluwasan.

Usa ka tuig human sa kamatayon sa akong igsoong babaye, ang inahan sa akong amiga namatay. Gibati nako ang hilabihan gayud nga kasubo. Naghunahuna ko, “Sa sunod nga magkita kami, sultihan ko siya kon unsa ko kaguol.” Dayon, nakahinumdom sa akong kaugalingong kasinatian, nasayran nako nga ang akong amiga nagkinahanglan kanako diha-diha dayon. Naglakaw paingon sa iyang balay, nagpanagana ko. Unsa kaha kon dili siya gusto nga makakita kanako? Basin ang iyang pamilya dili gusto nga anaa ko didto. Maghulat lang ba ko ug makig-istorya lang niya sunod? Apan sa pag-abli niya sa pultahan, makaingon ko nga nalipay siya nga miabut ko. Ang iyang amahan ug mas magulang nga mga igsoon busy sa pagplano sa lubong. Migawas kami aron maglakaw-lakaw. Dili na ko angayang mahadlok kon unsay isulti. Siya ra ang nagsige og istorya.