Usa ka Dakong komunidad sa mga Santos

• Edad 60

• Mayor

• Unang magtatambag sa bishopric

Ang tsunami nga miigo sa Samoa niadtong Septyembre 2009 mikutlo sa kinabuh sa akong apo nga lalaki. Mipatay sa anak nga lalaki sa akong igsoong babaye. Naguba ang akong balay, duha ka mga sakyanan, ug hapit tanan nga akong gipanag-iya. Hapit ang among tibuok balangay namalhin ngadto sa bungtod aron dili na kini mahitabo pag-usab.

Nasayud ako nga gihigugma sa Dios ang nangabuhi tungod kay, pinaagi sa Simbahan, Siya mihatag kanamo og bag-ong balay, pagkaon, ug tubig. Nasayud ako nga Siya nahigugma niadtong nangamatay tungod kay, pinaagi sa Iyang gahum, kami magkahiusa ra pag-usab. Gipanalanginan kami.

• Edad 10

Ang pagkamagulang nga igsoong babaye dili kanunayng sayon. Usahay mapungotko. Apan nakat-on ko nga mahimong maayong higala sa akong manghud nga babaye ug lalaki pinaagi sa pagtan-aw sa akong mama ug sa iyang relasyon sa iyang igsoong mga babaye. Mitudlo siya nako sa pagpakita og Kristohanong ehemplo niadtong anaa sa atong palibut. Mabuhat nako kining mga butanga sa pagpakita kon unsa ako ka mapasalamaton sa gugma sa Langitnong Amahan ug ni Jesukristo, ingon man usab sa gugma sa akong mama ug papa.

• Edad 25

• Estudyante

• Magtutudlo sa Primary

Gusto kong mas mahisama kang Kristo—dili tungod kay naglaum ko og perpeksyon, apan gusto nakong mahinumduman kon si kinsa ako ug mamahimong mas maayo karon kay sa kagahapon. Lisud kini kon ang standard sa kalibutan ubos kaayo. Sayon ra nga palingon ang akong standard.

Apan sa usa ka paagi dili ingon niana ka lisud ang paghupot sa mga standard sa Simbahan. Sa akong pagtuo ang mga tawo makadayeg niadtong adunay taas nga mga standard.

Kanunay kong ganahan og mga tawo nga dili manigarilyo o moinom ug adunay maayo nga moral. Mao nga sa dihang nag-investigate ko sa Simbahan, nagsunod na ako sa daghang mga standards, ug tungod kay nagsunod ako niana nga mga sugo, dali ra kaayo kong nakabaton ug pagpamatuod niini.

• Edad 18

• Unang magtatambag sa kapangulohan sa Young Men, magtutudlo sa seminary

Kitang tanan mag-atubang sa wala damha nga mga problema sa kinabuhi. Pagpauli sa akong pamilya human mabugkos sa Templo sa Hong Kong China ug sa wala pa makabiya ang usa sa akong igsoon nga babaye ngadto sa misyon, ang akong magulang nga igsoong lalaki ug babaye nataktak sa trabaho ug ang suweldo sa akong amahan gikuhaan og tunga. Malisud kadto nga panahon sa 11 ka buok namo sa among gamay nga panimalay, pero among gituman ang mga saad nga gihimo sa templo.

Nianang higayona ang Espiritu Santo mipahinumdom nako sa kasulatan: “Sa dili pa kamo mangita sa mga katigayunan, pangita kamo sa gingharian sa Dios” (Jacob 2:18). Nakahatag kini nako og paglaum. Misalig ko nga ang Dios mopanalangin nako ug sa akong pamilya.

Ang akong mga igsoon nakakita na karon og mga trabaho nga aron ang among pamilya makakaon, ug ako adunay daghang nindot nga mga interbyu. Usa ka milagro nga nakapadugang sa among pagtuo ni Kristo. Nasayud ako nga ang Ginoo nahigugma ug nakaila kanato. Siya nasayud sa among mga panginahanglan. Kon kita mosunod sa Iyang mga sugo, kita mouswag sa yuta (tan-awa sa Mosiah 2:22).

• Edad 27

• Freelance journalist

• Presidente sa Relief Society sa ward

Sa wala pa nako madawat ang ebanghelyo, ang akong kalibutan usa ka mangitngit nga dapit. Dili dayon ako makapasaylo ug maghambin og dili maayo nga mga pagbati batok ni bisan kinsa nga sa akong pagtuo nakasilo nako. Ako nawad-an og kadasig sa kaminyoon, nakakita sa akong palibut sa mga bana nga palahubog ug sa mga babaye nga kulatado.

Ang pagdawat sa ebanghelyo ni Jesukristo nakapausab nako. Nindot kaayo nga mosimba ug makakita og mga pamilya nga nagtupad sa pagpanglingkod, nga matudloan mahitungod sa gugma, pagsinabtanay sa usag usa, ug pagsabut. Akong namatikdan ang akong kaugalingon nga mibiya na sa mga tradisyon nga wala mahiuyon sa ebanghelyo.

Gibati nako nga kinahanglan nga makig-uli sa giisip nga kaaway. Pirme na kaming magkita. Nakahimamat ko og buotan nga returned missionary ug magminyo kami sa dili madugay.

Nakombinser ako nga ako anaa sa ensakto nga lugar. Ang gugma ug pagpakabana sa mga miyembro alang sa usag usa nakahatag nako og pagbati nga nahisakop. Ang akong kinabuhi mas nahimong makahuluganon. Nasayud ako nga importante gayud nga ako magpabilin nga matinud-anon hangtud sa katapusan pinaagi sa paglikay sa paglingi ngadto sa kangitngit ug sa kasubo sa nangagi.

• Edad 23

• Estudyante

• Ikaduhang magtatambag sa kapangulohan sa Young Women

Ang mga problema nga akong giatubang sama sa giatubang sa tanan nga akong ka-edad. Unsay akong buhaton sa akong kinabuhi? Unsa man gayud ang akong eskwelahan? Kinsa ang akong minyoan? Unsaon nako sa pag-atubang sa pagpamugos sa dili miyembro nga mga higala nga ipaubos ang akong mga sumbanan? Usahay sayon ang maguol o masubo o mabalaka.

Ang ebanghelyo migiya sa akong kinabuhi sa tanang paagi. Bisan tuod og kinahanglan nakong lihokon ang mga detalye, nasayud ako unsay akong gusto, ug nasayud ako asa ako paingon tungod sa ebanghelyo. Mapasalamaton ako niana. Nakapalipay gayud kini nako. Nakatabang kini nako nga magpabilin nga lig-on ug pagtabang sa uban, tungod kay ako nasayud nga kon nagkinahanglan og tabang, ako makaampo sa akong Langitnong Amahan.

• Edad 46

• Opisyal sa usa ka charitable nga organisasyon nga dili sa gobyerno

• Presidente sa district

Ang makasapar sa mga panginahanglanon mao ang labing dako nga mga pagsulay sa akong kinabuhi. Ang bili sa pagpakabuhi taas kon itandi sa akong kinitaan. Kada adlaw magkapuliki ako ng maghunahuna nga ting bayad nasad sa abangan , ang pagkaon mahurot na, ang mga bata adunay bayranan sa ekwelahan, ug uban pa.

Ang ebanghelyo nga akong nahibaloan karon nakatabang gayud nako nga magpabilin sa ensaktong panghunahuna bisan pa sa mga hagit. Pinaagi sa pagtuman sa mga sugo ug sa akong mga pakigsaad, ingon og ang tanan madala ra. Pinaagi sa pagtuman sa balaod sa ikapulo, ang Langitnong Amahan mipanalangin namo nga dili gutumon, ug pinaagi sa Iyang grasya among nahimo ang pagbuntog sa mga babag sa kinabuhi. Ang ebanghelyo nahimong makapahupay nga tambal sa mga kakuyaw sa kinabuhi. Nakahatag kini kanamo og paglaum alang sa mas maayo nga umaabut kon kami magmasulundon ug magmatinud-anon.

Bisan unsa nga pagsulay ang akong atubangon, ang ebanghelyo adunay tubag alang kanako. Kon wala kini, ang akong kinabuhi wala gayuy direksyon o katuyoan.