Gisupak Nako ang Akong mga Kauban sa Trabaho

Usa ka buntag sa trabahoan ang mga amo sa pabrika miingon sa tanang empleyado nga agi og dugang sa inoras nga sweldo, kami magsugod og dawat og pakyaw nga bayad isip pangpadasig [piecework incentive pay]. Mas daghan ang among mahimo, mas dako mi og kita. Kini nahitabo mga upat ka bulan sa wala pa ko molarga sa akong misyon, busa karon mas dako ko og kita aron makatabang sa pagbayad niini.

Ang produksyon misaka pag-ayo, ug ingon man ang among sweldo. Ako nagtrabaho diha sa three-man rubber-curing press, ug matag higayon nga akong makita ang usa ka hulma nga mogawas sa incubator ug mopalihok sa awtomatik nga counter, mahunahuna nako nga mapun-an ang akong kwarta sa banko.

Ang bag-ong dugang sa sweldo, hinoon, nakamugna og pagdasig sa pagpanikas. Ang usa ka kauban sa trabaho kanunay nga sekretong moduol sa awtomatik nga counter, mohimo og dugang nga pagbira sa trip lever niini, ug mobalik sa iyang estasyonan sa trabaho. Nagtingsi ko sa dihang nakita ko kini nga nahitabo, nagpalingo sa akong ulo, ug nagpadayon sa akong trabaho. Gibati nako nga basta dili lang ako mismo ang manghilabut sa counter, nan ang akong integridad kompleto ra gihapon.

Apan sa wala madugay ako nakaamgo nga tungod kay ako nabayran sa samang kantidad sama sa ubang mga lalaki diha sa akong team, nan dili ra gyud igsapayan kinsa ang mibira sa counter. Ako sad-an usab sa pagpangawat gikan sa kompaniya sama sa uban. Ako bang gastohan ang akong misyon sa kinawat nga kwarta?

Naglibog ko pag-ayo kon unsa ang buhaton. Ang sobra nga kwarta sa among sweldo dili kaayo dako. Daghang tawo ang miingon nga kini dili angay nga problemahon, apan naproblema ko. Nasayud ko nga kinahanglan nakong prangkahan ang akong mga kauban sa trabaho.

“Nagbinuang ka nako?” nangutana si Bob (ang mga ngalan gipang-usab), ang senior nga sakop sa team. “Ang tanang tawo manikas. Bisan ang tagdumala. Sila naghunahuna na niini.”

Iyang nakita nga walay angay usabon. Unsa pa man ang akong mabuhat? Bisan dili pasobrahan ang gidaghanon sa among mahimo, ang among press mao ang labing mabungahon sa among eskedyul sa trabaho [shift]. Kanunay kong makadungog sa ubang mga press nga sila naghandum nga makatrabaho sa among team.

“Pwede kong makigpuli og pwesto ni Jack sa pikas press,” misugyot ko kang Bob.

“Sa akong hunahuna nagkenuwangol ka,” siya miingon nako, “apan makatrabaho ra ko uban ni Jack.”

Human nga nag-ilis mi ni Jack og team, si Bob kanunay mopahinumdom kanako kon unsa ka dako ang iyang sweldo kaysa akoa. Nahinumdom sa mga pulong sa himno “How Firm a Foundation”: “Ayaw kahadlok, ug; ayaw, kalisang.” Kadto nga mga pulong nakatabang kanako nga dili manumbaling sa mga pagbiay-biay ni Bob.

Sa wala madugay, si Bob miduol nako. Siya miingon nga si Jack wala magsilbi, ug ang akong team gusto nga mobalik ko. Natingala ko. Miingon ko ni Bob nga mobalik ko kon wala nay pagpanikas Siya miuyon. Ang akong daan nga team mainitong miabi-abi kanako, ug ang pagpanikas gihunong.

Nagdahum ko nga pagasulayan sa dili pa moadto sa akong misyon, apan wala koy ideya nga ang akong pagkamatinuoron ug kaisug ang sulayan. Mapasalamaton ko nga sa dihang nagkinahanglan ko og kalig-on sa pagbuhat unsa ang ensakto, ang Ginoo miagak kanako uban sa Iyang “matarung, gamhanan nga kamot.”¹