2011
Ang Dalan sa Pinili
Marso 2011


Ang Dalan sa Pinili

Usa ka bahin ang mabunyagan. Lain bahin ang paglahutay hangtud sa katapusan.

Imahe
Elder Koichi Aoyagi

Isip usa ka teenager sa Matsumoto, Japan, interasado kaayo ko nga makat-on og Iningles. Sa edad nga 17 miapil ko sa English club sa akong high school. Sa pagsugod sa tuig sa ting-eskwela, ang club mihukom nga mangita og lumad nga mamumulong sa Iningles aron sa pagtudlo kanamo sa pag-istorya og Iningles. Kami nangita pag-ayo, apan ang mga magtutudlo og Iningles nga among nakaistorya magpabayad, ug ang club dili man makabayad. Nawad-an sa kadasig, kami hapit na mohunong.

Dayon usa ka adlaw, samtang nag-drayb ko sa akong bisikleta padulong sa eskwelahan, nakakita ko og batan-ong mga Amerikano nga naka-suit nanghatag og mga flyers. Mikuha ko og usa ug gibutang sa akong bulsa. Human sa klase akong gisusi ang papel ug nasayran nga kini usa ka imbitasyon sa pagtambong og libre nga klase sa pag-istorya og Iningles. Diha sa flyer mao ang ngalan “Ang Simbahan ni Jesukristo sa mga Santos sa Ulahing mga Adlaw.” Wala pa gayud ako makadungog og ingon niini nga simbahan, apan naghinam-hinam ko; nasulbad na nako ang problema sa English club!

Niana nga adlaw sa sunod nga klase, mga 30 ka mga sakop sa club mitambong uban kanako. Ang mga misyonaryo mitudlo sa klase, diin kaming tanan nalingaw gyud pag-ayo. Gikan sa unang adlaw sa klase, nakamatikod ko nga adunay usa ka butang nga lahi kabahin sa mga misyonaryo. Ang ilang kamaabi-abihon, gugma, positibo nga mga batasan, ug pagkamasadyaon nakapadayeg gayud nako. Mora og adunay kahayag nga nagpalibut kanila—wala pa gyud ko makakita og bisan usa nga sama kanila.

Human sa pipila ka semana nagsugod ko sa pagpangutana sa mga misyonaryo kabahin sa ilang simbahan, ug sila midapit kanako nga magkat-on og daghan pa. Gidawat nako, ug sila mitudlo kanako sa mga leksyon sa misyonaryo. Nianang higayona wala pa ko hingpit nga makasabut o makadayeg sa kaimportante sa akong nakat-unan, apan gibati nako ang Espiritu, ug ako nakasabut nga ang mga baruganan nga gipangtudlo sa mga misyonaryo mga maayo. Sa dihang gidapit ko nila nga magpabunyag, akong gidawat.

Sa wala pa ko nagpamiyembro sa Simbahan, hinoon, kinahanglanon nako ang pagtugot sa akong mga ginikanan. Sa sinugdanan sila supak gayud niini—ang mga pagtulun-an sa Kristyanismo lahi ug wala pa nila mailhi. Apan dili pa ko andam nga moundang. Nanghangyo ko sa mga misyonaryo sa pag-adto sa akong balay ug ipasabut ngadto sa akong mga ginikanan ang kabahin sa Simbahan, unsa ang ilang gipangtudlo kanako, ug unsa ang gipaabut gikan kanako. Ang Espiritu mipahumok sa mga kasingkasing sa akong mga ginikanan, ug niining higayona sila mitugot kanako nga magpabunyag.

Naghinay-hinay og Kawala

Human ako nabunyagan ug nakumpirmahan, magtambungan ko sa gamayng Matsumoto Branch nga adunay 12 ngadto sa 15 ka aktibo nga mga miyembro. Nakahimo ko og mga higala, ug makalingaw nga motambong matag semana. Mga usa ka tuig ang milabay migradwar ko sa high school ug mibalhin sa Yokohama aron sa pagtungha sa unibersidad. Ang labing duol nga branch mao ang Tokyo Central Branch, nga adunay sobra sa 150 ka aktibo nga mga miyembro. Sa dihang mitambong ko niining bag-o nga branch, mibati ko nga mora og taga bukid diha sa dakong siyudad. Naglisud ko sa pagpakighigala. Usa ka Dominggo diha ra ko sa balay gikan sa simbahan. Sa wala madugay mihunong ko sa pagtambong. Nagsugod ko sa pagpakighigala sa mga klasmeyt nga dili miyembro, ug nagkaanam og kalayo sa akong hunahuna ang Simbahan.

Kini nagpadayon sa pipila ka mga bulan. Dayon usa ka adlaw nakadawat ko og sulat gikan sa usa ka sister sa Matsumoto Branch. “Nakadungog ko nga mihunong ka sa pagsimba,” siya miingon. Natingala ko. Klaro kaayo nga usa ka tawo gikan sa akong bag-o nga branch misulti kaniya nga ako wala na magsimba! Ang sister nagpadayon sa iyang sulat pinaagi sa pagkutlo sa Doktrina ug mga Pakigsaad 121:34: “Tan-awa, adunay daghan nga gitawag, apan pila lamang ang gipili.” Dayon siya misulat, “Koichi, ikaw nabunyagan na nga usa ka miyembro sa Simbahan. Ikaw gitawag, apan ikaw wala na diha sa mga pinili.”

Samtang nagbasa ko niining mga pulong, napuno ko sa pagbasol. Nasayud ko nga kinahanglan kong mag-usab. Nakaamgo ko nga wala koy lig-on nga pagpamatuod. Dili ko sigurado kon ang Dios buhi, ug wala ko masayud kon si Jesukristo mao ang akong Manluluwas. Sulod sa pipila ka mga adlaw nabalaka ko pag-ayo samtang ako naghunahuna kabahin sa mensahe diha sa sulat. Wala ko kahibalo unsa ang buhaton. Dayon usa ka buntag nakahinumdom ko og usa ka butang nga gitudlo kanako sa mga misyonaryo. Sila mihangyo kanako sa pagbasa sa Moroni 10:3–5, nagsaad nga masayran nako ang kamatuoran sa akong kaugalingon. Mihukom ko nga kinahanglan kong mag-ampo. Kon wala koy bation, hingpit nakong kalimtan ang bahin sa Simbahan ug ang mga sugo, ug dili na gyud ako mosimba pag-usab. Apan, kon ako makadawat og tubag, sama sa gisaad ni Moroni, kinahanglan ko nga maghinulsol, dawaton ang ebanghelyo uban sa tibuok kong kasingkasing, mobalik sa simbahan, ug mobuhat sa tanan aron sa pagsunod sa mga sugo.

Samtang nagluhod ug nag-ampo ko nianang buntaga, nangamuyo ko sa Langitnong Amahan sa pagtubag kanako. “Kon Ikaw buhi—kon Ikaw tinuod,” nag-ampo ko, “palihug pahibaloa ko.” Nag-ampo ko aron masayud kon si Jesukristo mao ang akong Manluluwas ug kon ang Simbahan tinuod. Sa akong pagtapos, sa kalit lang aduna koy gibati. Gipalibutan ko og mainit nga pagbati, ug ang akong kasingkasing napuno sa kalipay. Nasabtan nako ang kamatuoran: ang Dios buhi, ug si Jesus mao ang akong Manluluwas. Ang Simbahan sa Ginoo tinuoray nga gipahiuli ni Propeta Joseph Smith, ug ang Basahon ni Mormon mao ang pulong sa Dios.

Dili na kinahanglan nga isulti, nag-ampo ko alang sa pagpangayo og pasaylo nianang adlawa mismo ug mihukom sa pagsunod sa mga sugo. Mibalik ko sa simbahan ug misaad sa Ginoo nga akong buhaton ang bisan unsa nga akong mahimo aron magpabiling matinud-anon.

Sa wala madugay ang Simbahan misugod sa paghimo og mga plano sa pagtukod og chapel sa Yokohama. Niadtong higayona ang mga miyembro sa branch gilauman nga mohatag og kwarta ug motrabaho alang sa pagtukod sa building. Sa dihang ang presidente sa misyon mihagit sa mga miyembro sa branch sa paghatag kutob sa ilang mahimo, nakahinumdom ko sa akong pasalig sa pagbuhat bisan unsa nga gisugo sa Dios ngari kanako. Busa kada adlaw halos usa ka tuig, mitabang ko sa pagtukod inigka human sa akong mga klase sa unibersidad.

Pagkab-ut sa Upat ka mga Tumong

Mga susama niining panahona, si Elder Spencer W. Kimball (1895–1985), niining higayona anaa sa Korum sa Napulog Duha ka mga Apostoles, mibisita sa Japan ug miawhag sa kabatan-onan sa Simbahan sa pagkab-ut sa upat ka mga tumong: (1) pag-angkon og mas taas nga edukasyon kutob sa mahimo, (2) pagserbisyo og full-time nga misyon, ilabi na ang batan-ong mga lalaki, (3) magminyo sa templo, ug (4) magbaton og mga kahanas sa pagsuporta og usa ka pamilya. Niadtong higayona wala pa ko magplano sa pagkab-ut niining upat ka mga butang. Apan sa wala madugay miluhod ug nag-ampo ko: “Langitnong Amahan, gusto ko nga makab-ut kadtong upat ka mga tumong. Palihug tabangi ko.”

Nasayud ko nga aron magpabilin diha sa dalan sa pinili, nagkinahanglan ko nga mosunod sa tambag sa mga sulugoon sa Ginoo. Mipasalig ko sa pagbuhat sa tanan nga akong mahimo sa pagsunod sa tambag ni Elder Kimball ug magkugi sa pagtukod sa Simbahan.

Sulod sa pipila ka mga tuig nagpadayon ko sa pagtrabaho aron sa pagkab-ut sa akong upat ka mga tumong. Miserbisyo ko isip construction missionary sulod sa duha ka tuig, mitabang sa pagtukod sa duha ka chapel sa akong nasud. Dayon gitawag ko sa pagserbisyo og full-time nga proselytizing mission. Sa wala madugay sa akong pag-uli, giminyoan nako sa templo ang babaye gikan sa Matsumoto Branch kadtong misulat kanako. Sa wala madugay nakab-ut nako ang akong gidamgo nga trabaho sa usa ka foreign trading company. Samtang nagsunod ko sa pulong sa Ginoo ug sa tambag sa mga propeta, ako mibati nga usab anaa ko sa dalan sa pinili. Ug naningkamot ko nga magpabilin diha niana nga dalan karon.

Pagkadungog sa Iyang Tingog

Akong batan-ong mga kaigsoonan, ang Manluluwas nagpadayon sa pagtawag kanatong tanan, nag-agda kanato sa pagsunod Kaniya. Ang Ginoo mitudlo, “Ang akong karnero nagpatalinghug sa akong tingog, … ug sila nagasunod kanako” (Juan 10:27). Kamo nakadungog sa tingog sa Ginoo; kamo nagsunod Kaniya pinaagi sa pagpabunyag ngadto sa Iyang Simbahan. Sa tinuoray, kamo gitawag. Apan, ang mahimong pinili usa ka lahi gayud nga butang.

Pagdesisyon karon nga buhaton ninyo ang tanan nga magpabiling matinud-anon. Pagdesisyon nga molahutay hangtud sa katapusan pinaagi sa pagsunod sa tanang mga sugo sa Dios. Paghimo og matarung ug angay nga mga tumong alang sa inyong kaugalingon. Pag-eskwela, pagserbisyo og misyon, pagminyo sa templo, ug pagsuporta sa inyong pamilya sa espiritwal ug temporal nga paagi. Kon kamo wala pa nakabaton og pagpamatuod, palihug og luhod ug paghangyo sa Langitnong Amahan sa pagtabang kaninyo nga makaangkon og kahibalo sa kamatuoran. Dayon, kon ang tubag moabut, ipasalig sa inyong kaugalingon uban sa tibuok kasingkasing ngadto sa buhat sa Ginoo. Buhata ang tanan nga maanaa sa dalan sa pinili.

Mga paghulagway pinaagi ni Scott Greer