Si Jesukristo Miula sa Atong mga Sala

Usa sa mga rason nga ania kita dinhi sa yuta mao ang pagkat-on sa pagsunod sa mga sugo sa Dios. Gawas kang Jesukristo, kinsa nagpuyo og usa ka hingpit nga kinabuhi, ang tanan nga nakapuyo sa yuta nakasala (tan-awa sa Ecclesiastes 7:20; Mga Taga-Roma 3:23; 1 Juan 1:8). Ang sala mahimo kon gituyo nato og supak ang mga sugo sa Dios, ug ang tanan nga mga sala adunay silot nga kauban niini. Kon kita makasala, ang kaangayan nanginahanglan nga kita mag-antus sa silot (tan-awa sa Alma 42:16–22).

Sa katapusan, ang sangputanan sa bisan unsa nga sala mao ang pagkabulag gikan sa Dios (tan-awa sa1 Nephi 10:21). Kini nga pagkabulag hilabihan gayud nga kita dili makaayo niini sa atong kaugalingon.

Aron makabuntog niining pagkabulag, ang atong Langitnong Amahan nag-andam og paagi nga ang Iyang Bugtong Anak, si Jesukristo, modala mismo sa Iyang Kaugalingon sa palas-anon sa atong mga sala, nakahimong posible alang kanato nga malimpyohan sa espirituhanon nga paagi ug makauban og balik Kaniya. Kini mao ang plano sa kalooy.

Ang Manluluwas mitudlo, “Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol; apan kon dili sila maghinulsol sila kinahanglan gayud mag-antus sama kanako” (D&P 19:16–17).

Isip kabahin sa Iyang Pag-ula, si Jesus nag-antus alang sa atong mga sala sa Tanaman sa Getsemani ug diha sa krus sa Kalbaryo. Pinaagi sa paghinulsol sa atong mga sala, kita makatagamtam sa gahum sa Iyang Pag-ula sa atong kinabuhi.

Si Jesukristo, kinsa andam nga moula sa atong mga sala, miingon:

“Umari kanako, kamong tanan nga nabudlay ug nabug-atan, ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.

“Kay masayon ang akong yugo, ug magaan ang akong luwan” (Mateo 11:28–30).

Ang Pag-ula naghatag usab sa mosunod nga mga panalangin:

1. Pagkabanhaw sa tanan niadtong natawo sa yuta (tan-awa sa Alma 11:42–45).

2. Kinabuhing dayon diha sa presensya sa Dios sa tanang bata kinsa namatay sa wala pa sila moabut sa edad sa pagkamay-tulubagon, otso anyos (tan-awa sa Mosiah 3:16; 15:24–25; Moroni 8:8–12).

3. Abilidad sa pagpangita og kalinaw panahon sa mga pagsulay tungod kay gidala na ni Jesus sa Iyang Kaugalingon ang atong mga kasakit ug mga balatian (tan-awa sa Juan 14:27; Alma 7:11–12).

4. Ganti ngadto sa mga matarung alang sa mga dili makiangayon niining kinabuhi (tan-awa sa Isangyaw ang Akong Ebanghelyo [2004], 61).