Pagatawagon sa Dios

Ang akong bana ug ako bag-o pa lang nga mibalhin sa usa ka bag-ong lungsod ug mahinamon nga motambong sa among bag-o nga ward. Nahitabo hinoon nga ang mga utlanan sa ward giusab, ug ang ward gibahin.

Human sa ikaduhang Dominggo namong pagsimba, ang klerk sa ward nakigsabut namo aron ikahimamat ang bag-ong bishop inigka Martes sa gabii. Human sa mubo nga paghimamat, ang bishop nangayo og pagtugot sa akong bana nga tawagon ako isip presidente sa Primary sa bag-ong ward. Dayon iya kong gihatagan sa calling. Nakugang ako, apan gitudloan na ako nga dili gayud mobalibad og calling, mao nga miuyon ako sa paghimo sa akong pinakamaayo.

Ang bishop mihatag kanako og lista sa mga pangalan ug mihangyo kanako nga makigkita niya sulod sa duha ka adlaw uban sa mga ngalan nga gipili alang sa mga magtatambag ug sekretarya. Gisanapan ako sa pagbati. Sa dihang miabut kami sa panimalay, akong gisirad-an ang akong kaugalingon sa banyo ug mihilak. Dayon akong gipabuhagay ang akong pagbati ngadto sa Langitnong Amahan, nagpahayag sa akong mga kabalaka sa akong bag-ong calling. Wala akoy nailhan bisag usa sa bag-o nga ward, ug nagkinahanglan ko sa Iyang tabang. Sa dihang nahuman ako sa pag-ampo, kalinaw ang mipuno sa akong kasingkasing.

Pagkasunod buntag nag-ampo ako ug dayon misugod sa akong naandang trabaho sa balay. Ang lista sa mga pangalan nga gihatag sa bishop kanako diha sa lamesa sa kusina, ug pasigpatan nako ni matag higayon sa akong pag-agi. Human nako matan-aw ang lista sa daghang mga higayon, duha ka mga pangalan ang ingon og klaro ngari nako. Akong gipunit ang lista ug gibasa ang mga pangalan. Sa akong paglitok sa mga ngalan, usa ka mainit nga pagbati ang misanap kanako. Wala pa sukad ako mobati sa Espiritu Santo nga ingon ka kusog.

Dayon akong giduol ang Langitnong Amahan pinaagi sa pag-ampo, mga luha midagayday sa akong mga aping sa akong paglitok pag-usab sa mga pangalan. Wala akoy nasayran kabahin sa bisan hain niining mga bayhana, apan nasayud ako sulod sa akong kasingkasing nga sila ang mahimo nakong mga magtatambag.

Sa kaulahian nianang pagkagabii akong gihunahuna ang lista sa mga pangalan. Usa ka pangalan ang mosantup sa akong hunahuna sa matag higayon nga akong hunahunaon ang lista. Siya ang nahimo nakong sekretarya.

Nakigkita ako sa bishop pagkasunod adlaw ug gihatag kaniya ang mga pangalan alang sa akong mga magtatambag ug sekretarya. Sa akong kakugang sila ang mao gihapon nga mga babaye nga gihunahuna sa bishop nga makatrabaho og maayo sa Primary. Sa pag-abut nako sa simbahan pagka Dominggo, ang unang magtatambag sa bishopric nagbarug gawas sa simbahan uban kanako, nga gitudlo ang akong mga magtatambag ug sekretarya sa ilang pag-abut. Akong gitan-aw kini nga mga sister, akong gibati nga nakaila na ako kanila. Ang Espiritu mipamatuod kanako nga kining mga babayhana gitawag sa Dios.

Ako nasayud nga kami magkahiusa sa pagtrabaho sa pagserbisyo sa Ginoo—ug nahimo namo. Bisan tuod kon kini nga mga sister dili kaayo nako kaila, sila hingpit alang sa ilang mga calling. Ang Ginoo nasayud kon kinsay gusto Niyang tawagon. Pagkanindot nga kasinatian ngari kanako ang direkta nga pagkat-on kon unsay ipasabut sa pagatawagon sa Dios pinaagi sa panagna.