Ang Calling

Isaac, Isaac.” Tingog kadto sa iyang inahan. “Ang imong amahan nagkinahanglan nimo didto sa koral.”

Si Isaac mipatuyhakaw sa iyang ulo ug mitan-aw gawas sa bintana. Klaro gyud, misubang na ang adlaw, ug nagpasabut kana nga oras na sa trabaho. Si Isaac miambak gikan sa katre ug mikab-ot sa iyang sinina. Iyang madungog ang mga baka nga nag-inga.

Sa iyang paggawas sa pultahan sa kusina, iyang nakita si Papa nga nagguyod sa gulang na nga si Taurus agi sa ganghaan.

“Asa ka paingon nga sayo pa kaayo, Pa?” Nangutana si Isaac.

“Sa gawas lang sa koral. Kinahanglan nga gunitan nimo ang balde sa lugas aron si Taurus dili maglihok.”

Ang baka miinga, sama sa nangutana, “Unsa man ang buhaton karong buntaga?” Apan samtang si Isaac naggunit sa balde ubos sa iyang ilong, si Taurus mikalma ug nagsugod sa pagtila sa lugas pinagi sa iyang taas nga dila. Samtang ang baka nagkaon, gihigot og maayo ni Papa ang renda nga pisi diha sa koral.

Sa dihang migawas si Mama sa atubangan nga pultahan, si Papa mihangyo kaniya, “aduna akoy espesyal nga proyekto, Emeline. Mahimo ba nga dad-on nimo palihug kanako ang lapad nga lapis sa karpentero diha sa sulatanan?”

Sa dihang mibalik si Mama dala ang lapis, si Papa mipahimutang og pipila ka mga tabla sa yuta. Dayon, human sa pagtan-aw og maayo kang Taurus, misugod siya sa pag-drawing diha sa hamis nga yellow nga tabla.

“Unsa man kanang gibuhat nimo, Pa?” Si Isaac nangutana.

“Si Brother Fordham ug ako gihatagan og importante nga buluhaton alang sa templo,” mipasabut si Papa. “Motabang kita sa paghimo sa 12 ka mga bakang estatuwa nga mosangga sa butanganan og tubig (font) sa bunyaganan. Akong gi-drawing ang sumbanan, ug si Taurus ang akong modelo.”

Nakadungog sa iyang ngalan, gituyhakaw ni Taurus ang iyang ulo, dayon mipadayon sa iyang pamahaw.

Si Isaac nagtan-aw sa iyang amahan nga nag-sketch og taas, lapad nga mga linya. “Kana nagsugod na sa pagkaparehas nga tan-awon ni Taurus,” miingon si Isaac. “Apan nganong imo man siya nga gipili?”

“Tungod kay kusgan siya ug ang labing maayo nga baka nga akong nakit-an sukad. Tan-awa ang iyang barug? Ingon og nakamatngon siya sa pagkaimportante niya. Masulundon usab si Taurus.”

“Kini nga proyekto espesyal kaayo nga calling, Papa. Dili ba?”

“Oo, Anak, mao gyud. Mapasalamaton ako nga gihangyo sa pagtabang.”

Gihapak ni Isaac ang liog ni Taurus. Iyang mabati ang lig-on nga mga unod sa baka. “Unsa ka nindot nga pasidungog kanimo, manoy,” siya mihunghong.

Nahuman dayon ni Isaac ang iyang trabahoon. Iya gani nga nahimo ang naandang duha ka dosena nga hayhayan nga mas paspas kay sa naandan. Nasayud siya nga kon mahuman na siya makahigayon na siya sa paghimo sa gusto niyang buhaton.

Karon si Isaac gusto nga mag-drawing. Ang iyang mga ginikanan mihatag kaniya og pagtugot nga mag-drawing sa kilid sa pogon, ginamit ang piraso sa uling gikan sa mga gisugnod nga mga troso. Ang uling dali ra nga mapapas ug magamit niya kini sa paghimo og lapad o pig-ot nga mga linya.

Samtang si Isaac mi-drawing ni Taurus, iyang gihunahuna ang mahitungod sa iyang amahan ug ang maanindot nga templo nga gitukod sa Nauvoo. Kon si Isaac lig-on ug masulundon sama ni Taurus, tingali ang Ginoo mopili kaniya nga motrabaho sa templo, sama sa iyang amahan.