Nagdepensa sa Akong Thesis—ug sa Basahon ni Mormon

Sa dihang estudyante pa ako sa unibersidad, ang honors program diin ako na-enroll nagkinahanglan sa mga estudyante nga mosulat og usa ka thesis. Ang matag thesis sa estudyante kinahanglan nga dumalahon ug aprobahan sa duha ka mga propesor.

Alang sa akong thesis akong gipili ug gianalisar ang gubat diha sa Basahon ni Mormon. Akong gikonsulta ang usa ka propesor mahitungod sa akong ideya, ug misugot siya nga mahimong usa sa akong mga superbisor. Siya usab misugyot og laing propesor isip usa ka potensyal nga ikaduhang superbisor.

Nakigkita ako sa ikaduhang propesor aron ipasabut ang akong hilisgutan sa thesis ngadto kaniya. Sa dihang akong gihisgutan ang Basahon ni Mormon, ang iyang kinaiya nausab ug siya misugod sa pagpanaway sa Simbahan. Hilum ako nga naminaw hangtud nga siya nahuman ug dayon mipasabut og kadiyut nga akong gibati nga wala niya hisabti ang atong mga gituohan. Daw wala siya makumbensir, apan sa akong kahibulong misugot siya nga magmonitor sa akong thesis.

Human sa hapit usa ka tuig nga pagsiksik ug pagsulat, akong gisumiter ang akong thesis alang sa pag-aprubar sa faculty. Sulod nianang tuiga gidawat ako sa eskwelahan sa pamalaod, ug gikinahanglan nako nga mahuman kini nga proyekto aron mogradwar ug makapadayon.

Nianang semanaha nakadawat ako og e-mail gikan sa propesor nga misaway sa Simbahan. Gihangyo niya ako sa pagpakigkita kaniya sa iyang opisina.

Sa akong pag-abut, gihangyo niya ako sa pagsira sa pultahan ug molingkod. Diha-diha dayon, gisugdan niya ang grabe nga pag-ataki—dili sa akong thesis kondili sa Basahon ni Mormon. Ingon ka kalma sa akong mahimo, mihatag ako sa akong pagpamatuod kabahin sa Basahon ni Mormon.

Gipangutana dayon nako ang propesor kon aprubahan ba gihapon niya ang akong thesis. Siya miingon nga dili.

Mipauli ako nga mibati og kaluya ug dili siguro kon unsay buhaton. Kon walay pag-aprubar niining tawhana, mawala ang akong mga kahigayunan sa paggradwar gikan sa honors program ug sa pagsugod og eskwela sa pamalaod. Nag-ampo ako nga mamaayo ra ang tanan bisan pa man niana.

Sa dihang akong gipasabut ang akong sitwasyon ngadto sa laing propesor kinsa nagdumala sa akong thesis, iya akong gitambagan sa pag-adto sa propesor sa sunod adlaw ug hatagan siya og usa pa ka higayon sa pag-aprubar sa akong thesis.

Pagkasunod buntag didto ko naghulat sa gawas sa opisina sa propesor. Gikuyawan ako, walay siguro kon unsay iyang buhaton nga makakita nako pag-usab. Sa iyang pag-abut, hilum nga giablihan niya ang pultahan sa iyang opisina, miyango siya sa pagpasulod kanako. Sa walay gilitok nga pulong gipagawas niya ang ballpen ug gipirmahan ang akong thesis, gihatag niya kanako ang iyang pag-aprubar sa opisyal nga paagi. Wala siya mosulti kon unsay nakapausab sa iyang hunahuna apan mipahiyum lang siya kanako sa akong pagpanamilit.

Mapasalamaton ako nga nakahigayon sa paghatag sa akong pagpamatuod ngadto niining tawhana. Ako nasayud nga kon barugan nato ang unsay atong gituohan, ang Langitnong Amahan mopalig-on ug mopanalangin kanato.