Ang Simbahan Nangita og mga Kasaysayan sa mga Pioneer sa Moderno nga Panahon

Kon ang mga miyembro sa Simbahan makahunahuna sa mga pioneer, sa kasagaran ilang mahunahunaan kadtong kinsa mibiyahe ngadto sa kasadpan sa Estados Unidos nga nagbarko o nanglakaw nianang ika-19 nga siglo.

Mahimong daghan ang wala nakaamgo nga sila mga pioneer sa bag-ong panahon karon.

Ang Departamento sa Kasaysayan sa Simbahan bag-ohay lang nangita og mga kasaysayan sa mga modernong mga pioneer. Samtang ang departamento bukas sa tanang mga pagsumiter sa kaugalingon nga kasaysayan, sila partikular nga interesado diha sa mga kasaysayan sa mga kinabig, mga tawo nga nagpuyo sa dapit diin ang templo anaa o natukud, mga misyonaryo nga nag-serbisyo diha sa bag-ong misyon, ug kadtong kinsa migamit sa ebanghelyo sa ilang mga kinabuhi samtang wala nagpuyo kauban sa ubang mga Santos sa Ulahing mga adlaw.

“Ang kaugalingon nga mga kasaysayan sa uban makatabang niadtong kinsa nakasulay na sa samang kasinatian o nagpuyo sa samang lugar o samang katuigan,” matud ni Brad Westwood, tigdumala sa pagpanag-iya diha sa Church History Department.

Ang kaugalingon nga mga kasaysayan mahimong kasaysayan sa tibuok nga kinabuhi o mga tinipik ug mga piraso, sama sa mga handumanan sa misyon, kaugalingon nga mga kasinatian isip usa ka ginikanan, o uban pang piho nga mga estorya nga nanaglibut sa mahinungdanon nga panghitabo, matud ni Brother Westwood.

“Kita mituo nga tanan sa mga anak sa Dios patas diha sa Iyang pagtan-aw,” matud ni Brother Westwood. “Kitang tanan adunay importanting estorya nga ikasugilon—kitang tanan nakabaton og pagsulay nga kasinatian niining kalibutan ug kita nakahibalo nga ang kasaysayan makatabang sa paglig-on sa pagpamatuod.”

Usa ka gatos ka tuig gikan karon, si Brother Westwood miingon, usa ka tawo nga lagmit walay kaugalingon nga rekord sa family history basin makabasa sa inyo ug moingon, “Ingon diay niini ang mamahimong usa ka kinabig.”

Samtang ang katawhan nagkat-on bahin sa ilang mga kaliwat o sa uban nga mga pioneer—naglakip na sa mga panlimbasug nga ilang nasugatan, ang mga leksyon nga ilang nakat-unan, ug ang kaalam nga ilang naangkon—sila mahimong makakaplag og tambag ug tabang alang sa ilang kaugalingon kinabuhi.

Sa higayon nga ang kasaysayan masumiter ngadto sa librarya, kini i-catalog ug makita na sa mga bisita aron sa pagpanan-aw ug pag-basa. Ang mga manuskrito o mga basahon gitipigan diha sa Church History Library nga kontrolado ang klima sa palibut, nga nakapalugway sa pagpreserbar.

Si Brother Westwood mitanyag sa iyang tambag niadtong naghunahuna sa pagpadala sa ilang kaugalingong mga kasaysayan ngadto sa Church History Library:

Pagsulat alang sa pampubliko nga gamit. Bisan og ang mga diary ug mga journal maoy nindot nga makasaysayanon nga mga kapanguhaan, kini sa kasagaran kabahin sa inadlaw-adlaw nga mga panghitabo ug kaugalingong mga hunahuna nga dili kanunayng maangay alang sa publiko. Usahay kini makahatag og kakuyaw sa pribasiya sa usa ka tawo. Kon ang mga kasaysayan naglakip og kasayuran nga makadaot sa maayong pangalan sa usa ka tawo, madawat kini apan dili mahimong ipakita diha sa publiko.

Isulat ang mga estorya nga dunay hugna ug mga yugto.Kasagaran, ang pagsulay sa pagsugod sa imong labing una nga panumduman isip bata pa ug paglukop sa tanan hangtud sa kasamtangan nga adlaw mahimong makapawala sa gana. Pagsugod sa usa ka estorya sa usa ka higayon. Pananglitan, sugdi pinaagi sa pagsulat kabahin lang sa imong misyon. Inig kakompleto na niini, padayon sa lain na sad nga bahin sa imong kinabuhi.

Gamit sa nag-una nga mga kapanguhaan. Kon ikaw adunay sulat, kopyaha kini o ibutang kini sa usa ka basahon. Kon ikaw adunay litrato, iapil kini. Kon ikaw migamit og kasayuran gikan sa piho nga basahon, himoi kini og pahinumdom. Mga scrapbook makatampo og usa ka tipik sa kaugalingon nga kasaysayan. Apan, kadtong kinsa naghimo og mga scrapbook kasagaran dili ibutang o isulat ang kabahin sa mga panghitabo nga nakita sa mga litrato, matud ni Brother Westwood. Misugyot siya sa paggahin og pipila ka mga minuto sa pagsulat kabahin sa unsa nga panghitabo ang anaa sa litrato nga gibutang sa usa ka scrapbook.

Pangunsolta ug pakighinabi sa uban. “Kita sa kasagaran maghunahuna sa atong kaugalingon nga kasaysayan isip atong kaugalingon panlantaw, apan kon mas daghan ang mga panglantaw nga imong mahimo niini, mas dako ang gibug-aton niini,” matud ni Brother Westwood. Ang pagpakighinabi sa uban nga mga tawo makahatag og bag-ong panglantaw ug mahimong motabang ninyo sa pagpalambo sa inyong kasaysayan.

Isulat ang kabahin sa espirituhanon nga mga kasinatian, mahinungdanon nga takna, ug importanteng kapasikaran, katawhan, ug mga panghitabo. “Ang katawhan ganahan og estorya nga maayong pagkasugilon,” matud ni Brother Westwood. Isulat ang kabahin sa mga kasinatian nga dunay sinugdanan, tunga-tunga, ug katapusan. “Ayaw paggahin og 60 ka pahina sa inyong kinabuhi sa wala pa kamo mag dos anyos. Lagmit dili gayud ninyo kini isulat, ug ang mga tawo dili mobasa niini.”

Isulat ang bahin sa unsay gikahiligan. Si Brother Westwood misugyot nga imbis magsulat sa kronolihikanhon nga paagi, inyong isulat kanang dunay tema o sa hilisgutan nga kamo dunay kaikag.

Labing importante, ang mga miyembro dili gayud mosumiter sa kaugalingon o pamilya nga kasaysayan ngadto sa Simbahan kon wala pa kini maapud-upod una sa mga sakop sa pamilya, kay angay gayud kining mopalig-on sa pamilya diin kini naggagikan.

Si Brother Westwood nagtuo nga kadtong kinsa migahin og panahon sa pagrekord sa usa ka personal nga kasaysayan, nagsulat nga matinud-anon bahin sa malisud nga panahon ug sa maanindot nga panahon, makakita sa kamot sa Ginoo sa ilang mga kinabuhi ug maghatag og kabilin ug mga panumduman nga mopalig-on sa ilang mga pamilya ug sa ubang mga miyembro sa Simbahan.

Kon ikaw usa ka pioneer sa moderno nga panahon ug gusto nga mopakigbahin sa imong mga kasinatian, isumiter ang imong kasaysayan ngadto sa Church History Department.

Mahimo nimong ihatud o ipadala ang imong kasaysayan sa: Church History Library, 15 East North Temple Street, Salt Lake City, UT 84150-1600, USA, Attention: Acquisitions.

Ang pagpanghatud himoon gikan sa 9:00 a.m. to 5:00 p.m., Lunes hangtud sa Byernes.

Mahimo usab nimong ipadala sa e-mail ang inyong kasaysayan ngadto sa ChurchHistoryAcquisitions@ldschurch.org o tawaga ang Church History Acquisition call center sa 1-801-240-5696.