2011
Ang Basura sa Usa ka Tawo Mao ang Bahandi sa Lain nga Tawo
Hulyo 2011


Gikan sa Natad sa Misyon

Ang Basura sa Usa ka Tawo Mao ang Bahandi sa Lain nga Tawo

Ang basahon nga may bulawan nga mga letra sa hapin nahimong bahandi sa usa ka tawo nga nangita sa kamatuoran.

Kadto init nga adlaw sa ting-init sa akong misyon. Ang akong kompanyon ug ako nagbalik-balik og lakaw sa mga dalan sa St. Petersburg, Russia, nanghinaut nga makakita og bag-ong mga investigator. Nianang gabhiuna nakahimamat kami og tigulang nga lalaki duol sa among balay ug nagsugod og pakig-istorya kaniya. Bisan tuod wala siya mopakita og interes sa ebanghelyo, kaming duha mibati nga hatagan siya og kopya sa Basahon ni Mormon. Sulod sa basahon among gisulat ang among nindot nga mga pangandoy alang kaniya, among mga pagpamatuod, ug ang among impormasyon aron kami makontak.

Sa wala madugay nianang sama nga gabii, wala kami masayud, usa ka batan-ong lalaki nga ginganlan og Ilya migawas uban sa iyang igsoon nga lalaki. Samtang naglakaw subay sa ngitngit nga dalan sa underground, si Ilya nakakita og naggilak nga bulawan sa hapin sa usa ka basahon diha sa yuta. Nagtikubo aron mas makita pag-ayo, iyang nabasa ang bulawang mga letra nga gipabugdo diha sa basahon—Ang Basahon ni Mormon: Lain nga Tugon ni Jesukristo. Iya kining gipunit ug gidala kini sa balay.

Pagkasunod adlaw ang akong kompanyon ug ako namalandong kon unsaon namo sa pagpangita og bag-ong mga investigator. Naghunahuna ako pag-ayo: “Kami naningkamot pag-ayo sa pagpangita og bag-ong mga oportunidad. Asa man ang mga resulta? Tingali kinahanglan adunay usbon sa among gipangbuhat.”

Sa wala madugay ang telepono mibagting. Akong gitubag. Ang tingog sa pikas linya nangutana, “Kini ba usa ka elder? Akong napalgan ang inyong basahon sa subway crossing. Gusto ko nga iuli kini.”

Diha-diha dayon akong gidaklit pagtan-aw ang estante asa nako gibutang ang akong mga kasulatan. “Sa akong hunahuna wala nako mawala ang akong kasulatan didto sa metro,” mitubag ko. “Wala mawala ang akong kopya sa Basahon ni Mormon, imoha na kana ug basaha.”

Ang batan-ong lalaki miingon nga ang iyang pangalan mao si Ilya ug mipasabut nga siya lumad sa Orsk, Russia ug mianhi sa St. Petersburg aron magtrabaho.

“Ganahan ko nga makakat-on og daghan kabahin niini nga basahon ug sa inyong simbahan,” siya miingon. “Mahimo bang makigkita ko ninyo?”

Milukso ko tungod sa kahinam. Dili kanunay nga adunay potensyal nga mga investigator ang manawag maghangyo nga makigkita aron sa pagkat-on og mas daghan kabahin sa Simbahan.

“Syempre pwede kitang magkita, Ilya!” Mitubag ko nga malipayon.

Sa dihang nagkita kami ni Ilya, siya naminaw pag-ayo ug nangutana. Kami malipayon nga siya andam kaayong maminaw sa ebanghelyo.

Sa usa ka bahin atol sa leksyon, akong giablihan ang kopya sa Basahon ni Mormon ni Ilya. Sa dihang akong gipakli ang unang mga pahina, akong nasiplatan ang pamilyar nga agi sa sinulatan—ang akong agi! Nakaamgo ko nga kini mao ang samang basahon nga among gihatag ngadto sa tigulang nga lalaki sa miaging adlaw. Klaro kaayo nga gilabay sa tawo ang basahon, nga sa wala madugay nakit-an ni Ilya. Napuno ako sa pasalamat nga ang akong kompanyon ug ako mipili sa pagbilin sa basahon ngadto sa tigulang nga lalaki, bisan tuod niadtong higayona wala ko makasabut kon ngano.

Wala madugay si Ilya mipili nga magpamiyembro sa Simbahan. Siya misugod nga madasigong mipakigbahin sa mensahe sa ebanghelyo ngadto sa iyang mga paryente ug mga higala usab.

Nakat-unan nako nga ang Langitnong Amahan nasayud kon kanus-a ang usa ka tawo andam sa pagdawat sa Iyang pulong. Siya nagsugo kanato, isip mga misyonaryo ug mga miyembro sa Iyang Simbahan, sa pagtuman lamang sa Iyang mga sugo ug pagtugyan ngadto sa Iyang kabubut-on samtang kita nagtinguha sa pagpakigbahin sa ebanghelyo. Niini nga sitwasyon ang Dios nasayud nga bisan tuod ang orihinal nga tigdawat sa among Basahon ni Mormon mibaliwala sa bili niini, si Ilya wala (tan-awa sa 1 Nephi 19:7).

Paghulagway pinaagi ni Allan Garns