Usa ka Gamay nga Langit dinhi sa Yuta

Ang dili minyo nga mga miyembro sa Simbahan kasagaran mangutana, “Unsaon ko sa pagpangita ang angay nga tawo nga minyoan?” Pasugyuta ako og usa ka paagi. Sukda ang espirituhanong gitas-on sa imong malagmit nga umaabut nga mga kapikas. Una, kon sila miyembro ba sa Simbahan, sila ba aktibo ug hingpit nga may pasalig, o sila ba paling-paling o masinupakon? Ikaduha, kon sila dili mga miyembro, sila ba mauyunon ngadto sa ebanghelyo ug sa mga pagtulun-an niini, o sila ba walay pasalig o masinupakon?

Kon ikaw magminyo og aktibo nga miyembro didto sa templo alang sa karon ug sa tanang kahangturan diha sa bag-o ug walay katapusan nga pakigsaad, makabaton ka ba og mga problema? Oo. Masulbad mo ba kini Oo. Mas maayo ba ang imong kahigayunan sa pagsulbad niini ug sa paglig-on sa imong pagpamatuod kay sa ikaw wala maminyo didto sa templo? Oo. Apan kon ikaw magminyo sa usa ka tawo kinsa masinupakon sa Simbahan o paling-paling ngadto sa ebanghelyo, nagbutang ka sa imong kaugalingon sa usa ka kahimtang diin imong madiskubrehan pipila ka adlaw nga ikaw kinahanglan nga mopili tali niana nga tawo ug sa Simbahan. Kana bug-at kaayo nga responsibilidad.

Kon ikaw magpili sa imong kapikas, siguroha nga kamong duha adunay tinguha alang sa celestial nga kaminyoon nga relasyon, usa ka tinguha sa pagbaton og kapikas alang sa kahangturan, usa ka tinguha sa pagbaton og pamilya alang sa kahangturan, ug usa ka tinguha sa pagpuyo diha sa atubangan sa atong Langitnong Amahan.

Ang Ginoo mitataw niini nga kita magkauban lamang sa kahangturan uban sa atong kapikas kon kita nagsunod sa balaod. Sa bag-o nga pagpadayag Siya miingon:

“Andama ang inyong mga kasingkasing sa pagdawat ug sa pagsunod sa mga sugo nga hapit na ako mohatag nganha kaninyo; alang niadtong tanan kinsa nagbaton niini nga balaod nga gipadayag ngadto kanila kinahanglan nga mosunod niini nga balaod.

“Kay tan-awa, Ako mopadayag nganha kaninyo sa bag-o ug usa ka walay katapusan nga pakigsaad” (D&P 132:3–4).

Ang kada miyembro sa Simbahan kinahanglan nga nagbasa ug nagtuon sa seksyon 132 sa Doktrina ug mga Pakigsaad. Nakaamgo ba kamo nga walay usa ka tawo tali sa Ginoo ug sa tigbugkos kon siya nagpahigayon sa ordinansa sa pagbugkos? Kini usa ka maanindot ug makatandog nga seremonya.

Ang hilabihan ka importanting katuyoan sa kaminyoon sa templo gipatin-aw sa Manunubos Mismo sa diha nga Siya miingon, “Ug ingon nga kalabut sa bag-o ug walay katapusan nga pakigsaad [sa kaminyoon], kini natukod alang sa kahingpitan sa akong himaya; ug siya nga modawat sa kahingpitan niini kinahanglan nga mosunod sa balaod, o siya pagasilotan” (D&P 132:6).

Ang Ginoo miingon usab, “Busa, kon ang tawo mangasawa dinhi sa kalibutan, ug siya nakigminyo kaniya nga dili pinaagi kanako ni pinaagi sa akong pulong, ug siya nagpakigsaad kaniya hangtud siya ania sa kalibutan ug siya ngadto kaniya, ang ilang pakigsaad ug kaminyoon walay kahulugan sa panahon nga sila mamatay, ug sa panahon nga sila wala na sa kalibutan; busa, sila dili ubos sa lagda sa bisan unsa nga balaod sa panahon nga sila wala na sa kalibutan” (D&P 132:15).

Kita ba nakaamgo nga diha sa Doktrina ug mga Pakigsaad kita gisultihan nga gawas kon kita mosulod ngadto sa celestial nga kaminyoon, dili kita makakab-ut sa labing taas nga ang-ang sa himaya diha sa celestial nga gingharian (tan-awa sa D&P 131:1–4)? Kini tataw usab kon unsa ang mahitabo niadtong kinsa wala gayud nakadawat og mga panalangin sa kaminyoon sa templo: ang ilang pagbugkos kutob nga ang kamatayon mobulag kanila—usa ka subo kaayo nga butang nga hunahunaon.

Ang tumong sa ebanghelyo ug ang katuyoan sa celestial nga kaminyoon dili lamang sa paghiusa kanato apan usab sa paghimo kanato nga angay sa labing taas nga ganti sa Langitnong Amahan: kahimayaan diha sa celestial nga gingharian, pagtubo diha niana nga gingharian, ug kinabuhing dayon uban sa atong mga pamilya.

Ang celestial nga kaminyoon sama sa nagtungas og bukid. Gihigot nimo ang imong kaugalingon ngadto sa mahangturon nga kauban, ug kamo magsugod og tungas sa bukid. Samtang ang mga anak magsingabut, mohigot usab kamo ngadto kanila ug mopadayon sa inyong panaw. Ang mga pisi mohigot sa tanan nga mga tigtungas, apan ang hangin, ulan, snow, ug ice—mga hagit sa kalibutan—molaknit kaninyo nga mabitad kamo palayo niana nga bukid.

Unsaon ninyo pag-abut sa kinatumyan? Kon si Mama o si Papa moangka ug moputol sa pisi nga naghigot kanila ngadto sa usag usa ug sa ilang mga anak, ang kalagmitan mao nga ang usa o ang lain mahimong mahulog gikan sa bukid ug tingali mobitad sa ubang sakop sa pamilya uban kanila. Ang tibuok nga pamilya mahimong mahulog gikan niana nga bukid ug dili maabut ang mahangturon nga kinatumyan. Dili kita makatugot niana nga higayon. Kanunay natong hunahunaon nga isip mga sakop sa usa ka pamilya, kita gihigot ngadto sa usa ka team sa bukid nga naningkamot sa pagbalik ngadto sa presensya sa atong Langitnong Amahan.

Usa ka bantugan nga panultihon nag-ingon, “Ikaw moalsa kanako ug ako moalsa kanimo, ug kita motungas og dungan.”

Ang panag-uban sa kaminyoon dili usa ka sungkod. Wala ka makigminyo og usa ka tawo nga imong gihunahuna nga mas taas og gamay kay sa mga anghel ug dayon mosandig nianang tawhana. Hinoon, ipalambo nimo ang imong kaugalingon ug ang imong kaugalingon nga mga gasa ug mga talento. Samtang ikaw nagpalambo, motubo kamo og dungan, nagsuporta ug naglig-on sa usag usa.

Sa wala pa ang akong asawa ug ako maminyo, miingon ako ngadto kaniya, “Abi nimo, Mary, nagtuo ako nga aron magmalampuson sa negosyo ako kinahanglan nga motrabaho og maayo sa lokal ug tingali sa internasyonal nga mga lugar. Gusto ka bang mouban kanako niana nga biyahe?” Siya miingon nga siya gusto. Napulo ka tuig human kami naminyo, gihangyo ako sa pag-adto sa Inglatera, ug didto siya uban kanako. Dayon miadto kami sa Germany ug sa wala madugay ngadto sa Espanya. Nahimo siya nga internasyonal, lain-lain og kultura, ug duha ang pinulongan tungod kay siya mihukom nga kami motrabaho ug motubo og dungan.

Hinumdumi ang pagtagad sa usag usa uban ang pagkamabination ug sa pagrespeto sa usag usa kon kinsa ikaw ug kon unsay gusto nimong mahimo.

Nahinumdom ako og usa ka babaye sa among ward pila ka tuig ang milabay sa diha nga ako usa ka bishop. Siya ug ang iyang bana may mga problema sa kaminyoon. Samtang sila misulti ngari kanako, misugod siya sa pagdaot sa iyang bana sa tanang importanting dapit nga ang usa ka lalaki nagkinahanglan og pagdayeg aron sa pagrespeto sa iyang kaugalingon. Misulti siya kalabut sa iyang kakulangan isip usa ka amahan, sa iyang mga kakulangan sa mga relasyong kaminyoon, sa iyang kakulangan isip usa ka tigbuhi, ug sa iyang mga kakulangan sa pagkamahigalaon.

Gipangutana ko siya, “Nganong nagbuhat ka niini ngadto sa usa ka lalaki nga kinahanglan nimong higugmaon ug paluyohan?”

Mitubag siya, “Mas maayo nga makiglalis sa usa ka tawo nga imong gihigugma tungod kay nasayud ka asa ka labing makapasakit kaniya.”

Ug siya mitinuod niini.

Isip mga Santos sa Ulahing mga Adlaw, hinoon, gikinahanglan kitang mogamit sa atong matarung nga kagawasan sa pagpili ug sa paggamit sa atong mga oportunidad sa paglambo. Ang tanan adunay kahuyang. Ang kaaway nasayud sa mahuyang nga bahin sa inyong mga hinigugma, inyong mga higala, inyong kauban sa kwarto, inyong igsoon nga mga lalaki ug mga babaye, ug sa inyong mga ginikanan. Nakasabut ba kamo sa inyong mahuyang nga bahin? Nakaila ba kamo sa mga sitwasyon nga kinahanglan nga inyong likayan ug unsa ang inyong mga kahuyang? Ang sekreto sa malipayong kaminyoon mao ang pagpanalipod sa mahuyang nga bahin ug sa dili pagpahimulos sa mga kahuyang niadto nga imong labing kaila, labing gihigugma, ug sa katapusan labing masakitan.

“Busa, lig-una ang imong mga kaigsoonan diha sa inyong tanan nga panagsinultihanay, diha sa inyong tanan nga mga pag-ampo, diha sa inyong tanan nga mga pagdasig, ug sa inyong tanan nga mga buhat” (D&P 108:7). Sa lain nga pagkasulti, sa kada adlaw kamo gikinahanglan nga magtinabangay samtang kamo nag-ampo ug nagsinultihanay sa inyong mga pag-awhag ug sa inyong mga buhat.

Nahinumdom ako og usa ka batan-ong magtiayon nga bag-o lamang nahuman sa kolehiyo. Ang usa ka ginikanan mihatag kanila og panimalay; ang lain nga ginikanan mihatag kanila og mga kasangkapan ug usa ka bag-ong sakyanan. Aduna sila sa tanan dinhi sa kalibutan nga hinatag nganha kanila. Sulod sa tulo ka mga tuig nagdiborsyo sila. Wala sila mitrabaho ug misakripisyo. Misandig sila sa usag usa ug diha sa ilang mga ginikanan ingon og usa ka sungkod, gibakol nila ang ilang mga kaugalingon, ug wala makatubo. Wala nila nakat-uni ang lisud nga bahin. Wala sila mabalaka mahitungod sa paghimo sa ilang kaminyoon nga mamaayo. Siguroha nga kamo nagsakripisyo, nakigbahin, ug nagtubo og dungan.

Human ako miserbisyo isip usa ka presidente sa elders korum, presidente sa branch, ug usa ka bishop sulod sa gidugayon nga lima ka mga tuig, mibalhin kami ngadto sa usa ka bag-o nga ward. Ang akong asawa gitawag dayon nga mahimong presidente sa Relief Society. Miadto siya sa iyang unang miting uban sa bishop samtang akong gigukod ang among duha ka mga bata saka ug kanaog sa mga kwarto ug ngadto sa parkinganan ug sa cultural hall. Nakabaton ako sa akong unang kasinatian sa paghulat. Mihulat ako og usa ug tunga sa oras. Sa diha nga si Mary migawas sa opisina sa bishop, gikugos ko ang usa nga batang lalaki ug ang usa gigunitan sa kamot. Wala akoy kaisug sa pagsulti og bisan unsa, apan gihatagan ko lamang siya og tinan-awan nga miingon, “Nakaamgo ka ba nga gipahulat mo ako og usa ka oras og tunga”?

Ang iya lamang nga gibuhat mao ang pagpataas sa lima ka mga tudlo ug nag-ingon, “Lima ka mga tuig.” Kana ang gidugayon nga siya kanunay nga nagpaabut kanako. Niana misugod ako sa pagkaamgo nga kini mahimo nga akong trabaho sa pagsuporta sa akong asawa sa iyang calling ingon lamang nga siya misuporta kanako sa akong mga calling.

Naghangyo ako kaninyo sa dili pagsandig diha sa inyong kapikas ingon og sungkod apan sa pagbarug nga lig-on, naglinig-unay sa usag usa, ug mangayo og tabang samtang kamo nag-ampo og dungan matag gabii. Ako nagpamatuod nga kadtong mga higayon sa akong kinabuhi nga ako dili malipayon, nagsubo, o naguol nahimo sa diha nga ako milapas, gani bisan sa gamay nga paagi, gikan sa mga pagtulun-an sa Ginoo. Nga unta kamo makabaton og tinuod nga kalipay ug makakaplag og kamaya sa usa ka celestial nga kaminyoon nga may usa ka gamay nga langit dinhi sa yuta mao ang akong pag-ampo.