Malipayon diha sa Ebanghelyo

Sa nag-edad pa ko og 14, ang akong eskwelahan atbang ra sa chapel sa mga Santos sa Ulahing mga Adlaw. Nakakita ko og mga lalaki nga nagsul-ob og puti nga mga polo nga mosulod ug mogawas nianang dako nga building. Naghunahuna ko kon unsa kaha ang ilang gihimo diha sa sulod.

Usa ka adlaw ang akong mga higala ug ako gusto nga magdula og football, apan wala nay luna sa nataran sa among eskwelahan. Adunay miingon, “Anha kita magdula sa simbahan. Aduna silay nindot nga dapit sa gawas nga kadulaan.” Mao kadto ang akong unang pagkahibalo sa Simbahan—gawas sa building.

Duha ka tuig ang milabay ang usa sa mga higala sa akong igsoong lalaki midapit sa akong igsoong babaye sa pag-adto sa LDS nga Simbahan, ug gikuyogan nako siya. Naghinam-hinam ko nga sa katapusan masayud unsay ilang gihimo sa sulod niana nga simbahan.

Pag-abut namo didto, nakita namo ang pipila ka mga miyembro nga nagdula og usa ka yano nga dula. Malipayon kaayo silang tan-awon, ug kana ang nakakuha sa akong pagtagad. “Nganong malipayon man kaayo sila?” Natingala ko.

Akong nahibaloan sa dihang nakapaminaw ko sa mga hilisgutanan sa mga misyonaryo ug nabunyagan. Ang kalipay mabati sa kinahiladman. Ang akong pagkakabig nakapausab sa akong kinabuhi, sa kinabuhi sa akong mga anak, ug sa mga henerasyon nga moabut ug sa nangagi.

Bisan unsa nga inyong buhaton nga sukwahi sa mga pagtulun-an sa Simbahan dili makahatag kaninyo og kalipay. Tingali makapakatawa kini kaninyo o makahatag og mubo nga kalipay, apan ang tinuod nga kalipay anaa sulod sa ebanghelyo.

Bisan kon kataw-an kamo usahay sa inyong mga higala, sila modayeg kaninyo tungod sa pagbarug sa inyong mga baruganan.

Ang inyong mga ginikanan nahigugma kaninyo. Bisan unsa ang ilang ihangyo kaninyo nga buhaton dili kini tungod sa ilang kaistrikto kaninyo; kini tungod kay sila gusto nga manalipod kaninyo.

Pagmapasalamaton kanunay alang sa inyong mga ginikanan, sa ebanghelyo, ug sa kalipay nga nahatag niini sa inyong kinabuhi.