Maayo, Mas Maayo, Labing Maayo

Sa iyang pakigpulong sa Oktubre 2007 nga kinatibuk-ang komperensya, si Elder Dallin H. Oaks sa Korum sa Napulog Duha ka mga Apostoles naghisgut mahitungod sa mga kalihokan nga “maayo, mas maayo, ug labing maayo.” Sa dihang namulong siya mahitungod sa “sobra nga eskedyul sa mga bata sa mga kalihokan,” mibati ko nga sad-an diha sa akong lingkuranan.

Nahibalo ko nga sobra ra kaayo ang akong gihimo. Apil ko sa mga pasundayag sa eskwelahan, nagkuha og lisud nga mga subject sa eskwelahan, ug apil sa uban pa nga mga kalihokan. Wala na ko makatambong og mga kalihokan sa Young Women sa matinud-anong paagi, ug ang akong mga Dominggo napuno sa kakapoy sa paningkamot nga kinahanglang humanon gayud ang homework. Ang pagpraktis sa musika ug ang pag-edit sa newspaper sa eskwelahan dili na makalingaw ug nahimo nang buluhaton.

Ang pakigpulong ni Elder Oaks nakapahimo kanako sa pagtan-aw og maayo sa akong eskedyul. Ang akong mga kalihokan maayo, apan daghan ra kaayo kini. Kinahanglan nakong pilion ang mga butang nga labing maayo. Samtang naningkamot ko sa paghukom kon hain sa mga kalihokan ang hunungon, akong naamguhan nga ang ebanghelyo ni Jesukristo mao ang labing maayo nga prayoridad nga mahimong maangkon ni bisan kinsa. Akong gibutang ang pag-ampo ug pagtuon sa kasulatan nga maoy labing una sa akong listahan, ug sukad niana, ang akong kinabuhi mas natunhay.

Si Elder Oaks mitudlo kanako nga kon atong buhaton ang gusto sa Ginoo nga atong buhaton og una, ang tanan mahan-ay ra gayud. Kon magtuon ko sa akong mga kasulatan sa dili pa ko magdula o bisan sa dili pa ko maghimo sa akong homework, ang tanang importante mahuman ra. Sa dihang akong gibase ang akong kinabuhi diha sa Ginoo, imbis ibutang Siya sa ulahi, ang akong kinabuhi adunay nadugang nga dakong kalinaw ug kalampusan.

Karon maminaw na gayud ko og maayo sa tambag nga ihatag atol sa kinatibuk-ang komperensya!