Mensahe sa Unang Kapangulohan
Kinatibuk-ang Komperensya—Dili Ordinaryo nga Panalangin
Ang usa ka buotan nga miyembro sa Simbahan nakig-istorya sa silingan nga dili sama nato og tinuohan. Sa dihang ang hilisgutan sa panag-istoryahanay misangput kabahin sa kinatibuk-ang komperensya, nangutana ang silingan, “Nag-ingon ka ba nga kamo adunay mga propeta ug mga apostoles? Ug kaduha sa usa ka tuig diha sa tibuok kalibutan nga komperensya nagpadayag sila sa pulong sa Dios?”
“Tinuod kana,” ang miyembro masaligong mitubag.
Ang silingan naghunahuna mahitungod niana sa makadiyot. Daw interesado kaayo siya ug dayon nangutana, “Unsa ang ilang gisulti sa milabay nga kinatibuk-ang komperensya?”
Niining higayuna ang buotang miyembro sa Simbahan nga sa sinugdanan mibati og kahinam sa pagsangyaw sa ebanghelyo mibati og kaulaw. Naningkamot kutob sa iyang mahimo, wala siyay mahunahunaan nga mga detalye sa usa ka pakigpulong.
Nakita sa iyang higala nga makapalibog kini ug miingon, “Gusto ba nimong isulti kanako nga ang Dios nakigsulti sa tawo sa atong panahon ug unya wala ka makahinumdom sa Iyang gisulti?”
Ang brother mibati og kamapainubsanon niining panagsultihanay. Misaad siya nga mohimo siya og mas maayo pa aron hinumduman ang mga pulong nga gisulti sa mga sulugoon sa Ginoo diha sa kinatibuk-ang komperensya.
Nasayud kitang tanan kon unsa ka lisud hinumduman ang matag mensahe sa kinatibuk-ang komperensya, ug masaligon ko nga kita kinahanglang dili maulaw kon dili nato mahinumduman ang tanan. Bisan pa niana, adunay mga mensahe sa matag kinatibuk-ang komperensya nga gihatag isip usa ka gasa ug panalangin gikan sa langit nga alang lamang sa mga sitwasyon sa atong personal nga kinabuhi.
Agig pagpangandam sa kinatibuk-ang komperensya, tuguti ko nga mosugyot og tulo ka nag-unang mga konsepto nga mahimong makatabang kanato nga mas madawat, mahinumduman, ug magamit ang mga pulong nga gipamulong sa mga sulugoon sa Ginoo.
1. Ang mga miyembro sa Simbahan adunay katungod sa personal nga pagpadayag samtang sila naminaw ug nagtuon sa dinasig nga mga pulong nga gipamulong atol sa kinatibuk-ang komperensya.
Samtang nangandam kamo alang sa kinatibuk-ang komperensya, dapiton ko kamo sa pagpamalandong sa mga pangutana nga gusto ninyong matubag. Pananglitan, tingali nangandoy kamo alang sa direksyon ug giya sa Ginoo kalabut sa mga hagit nga inyong giatubang.
Ang mga tubag sa inyong piho nga mga pag-ampo mahimong direktang moabut gikan sa usa ka partikular nga pakigpulong o gikan sa piho nga hugpong sa mga pulong. Sa laing mga higayon ang mga tubag mahimong moabut gikan sa mora og walay kalabutan nga pulong, hugpong sa mga pulong, o awit. Ang kasingkasing nga napuno sa pasalamat alang sa mga panalangin sa kinabuhi ug ang dakong tinguha sa pagpaminaw ug pagsunod sa mga pulong sa tambag moandam og agianan alang sa personal nga pagpadayag.
2. Ayaw ibaliwala ang mensahe tungod lamang kay pamilyar na kini nga paminawon.
Ang mga propeta kanunayng nagtudlo pinaagi sa pagbalik-balik; usa kini ka balaod sa pagkat-on. Madungog ninyo ang balik-balik nga mga tema ug mga doktrina diha sa kinatibuk-ang komperensya. Akong ipaniguro kaninyo og usab: dili kini tungod sa kakulang sa pagkamamugnaon o imahinasyon. Padayon kita nga makadungog og mga mensahe kabahin sa sama nga mga isyu tungod kay ang Ginoo nagtudlo ug nagsilsil sa atong mga hunahuna ug mga kasingkasing og piho nga sukaranang mga baruganan nga adunay dakong mahangturong importansya nga kinahanglan gayud nga masabtan ug buhaton sa dili pa kita makapadayon ngadto sa laing mga butang. Ang maalamong tigtukod mouna og butang sa pundasyon sa dili pa mopabarug sa mga bongbong ug sa atup.
3. Ang mga pulong nga gipamulong atol sa kinatibuk-ang komperensya kinahanglan mao ang kompas nga mogiya sa atong dalan sa moabut nga mga bulan.
Kon kita maminaw ug mosunod sa mga aghat sa Espiritu, magsilbi kini isip Liahona, nga mogiya kanato ngadto sa wala mahibaloi, mahagiton nga mga walog ug kabukiran nga anaa sa unahan (tan-awa sa 1 Nephi 16).
Sukad sa sinugdanan sa kalibutan, ang Dios mitawag og mga propeta kinsa namulong sa kabubut-on sa langit ngadto sa katawhan sa ilang kapanahonan. Responsibilidad nato nga maminaw ug dayon gamiton ang mga mensahe nga gihatag sa Ginoo alang kanato.
Ang atong maloloy-on ug mahigugmaong Langitnong Amahan wala mosalikway ug dili mosalikway sa Iyang mga anak. Karon, sama usab sa nanglabay nga mga panahon, mipili Siya og mga apostoles ug mga propeta. Nagpadayon Siya sa pagpadayag sa Iyang pulong ngadto kanila.
Pagkatalagsaon nga pribilehiyo nga makadungog sa mga mensahe sa Dios alang sa matag usa kanato atol sa kinatibuk-ang komperensya! Mangandam kita og maayo alang niining dakong panalangin sa balaanong paggiya nga gihatag sa Iyang pinili nga mga sulugoon.
Kay kini dili ordinaryo nga panalangin.
Sa tuo: gilitratohan ni Les Nilsson