Ang Templo Gisirhan!

Ang among kaminyoon sa templo gitakda sa Hulyo 7, 2009—usa ka petsa nga naghinamhinam kami sa pagpaabut. Nagtubo duol sa Templo sa Aba Nigeria, kami nalipay nga bisan tuod og kami mibalhin sa layo, daghang mga higala ug sakop sa pamilya ang nagpuyo gihapon diha sa dapit nga makahimo sa pagkuyog kanamo sa templo o sa salo-salo ba inig ka human.

Miabut kami sa Aba human nagbiyahe og sobra sa unom ka oras gikan sa Lagos ug mihimo sa among katapusan nga pagpangandam alang sa among pagbugkos ug salo-salo. Apan tulo ka mga adlaw sa wala pa ang among gitakda nga petsa sa kasal, gisultihan kami nga ang templo wala damha nga sirhan hangtud ipahibalo ang pag-abli. Kami naguol ug naglibug. Walay usa nga makasulti kanamo kon kanus-a ang templo, nga gisirhan tungod sa kagubot diha sa lugar, mahimo nga ablihan pag-usab. Napakyas, gisultihan namo ang mga higala ug pamilya nga ang among pagbugkos gisibug, ug magul-anon kaming mibalik ngadto sa Lagos nga wala masayud kon kanus-a kami mahimo nga motakda pag- usab og lain nga petsa sa pagbugkos didto sa templo.

Sa pag-abut sa Lagos, mainiton kaming nag-ampo alang sa Templo sa Aba Nigeria nga moabli og balik. Usa ka semana ang milabay nga walay bisan unsang balita mahitungod sa petsa sa pag-abli og balik. Kining usa ka semana ingon og usa ka tuig ngari kanamo. Naglantaw kami ngadto sa among kaminyoon sa templo ug sa pagsaulog uban sa mga higala ug pamilya sa labing madali kon mahimo.

Samtang milabay ang panahon nga walay balita kalabut sa petsa sa pag-abli og balik gibati namo nga kinahanglan maghunahuna kami og mga kapilian. Tungod kay ang Templo sa Aba Nigeria mao lamang ang templo sa Nigeria, naamgohan namo nga kami kinahanglan nga mobiyahe ngadto sa Templo sa Accra Ghana kon kami magpabugkos bisan kanus-a nga madali. Sa kaalaut, ang biyahe mokantidad og kwarta nga kami wala. Apan sa kanunay giplano namo ang usa ka kaminyoon sa templo, ug nasayud kami nga kinahanglan namo nga mopadayon.

Nanghulam og kwarta gikan sa pamilya ug sa mga higala, among gihikay ang internasyonal nga pasaporte, gitawagan ang Templo sa Accra Ghana sa pagtakda og petsa, ug mipalit og ticket sa eroplano aron sa paglupad ngadto sa Ghana.

Miabut kami sa Accra sa Agosto 14, 2009, ug miadto sa templo sa pagkasunod nga adlaw. Diha sa sealing room, ang tigbugkos lamang diha sa templo ug ang duha ka mga saksi ang kauban namo. Walay mga higala, walay pamilya, ug walay usa nga among kaila nga uban kanamo. Apan diha sa dili sinati nga nasud, diha sa usa ka dapit layo sa among panimalay, kami nasayud nga diha kami diin kami kinahanglan nga maanaa, nagbuhat unsay kinahanglan nga buhaton. Atol niana nga higayon, gibati namo ang mga gahum sa kahangturan ug mas tataw nga nasabtan ang gugma sa Langitnong Amahan nga aduna alang kanato ug alang sa Iyang tanan nga mga anak.

Sa kasubo, ang akong asawa namatay sa pagka 2010 human manganak sa among unang bata. Gimingaw kaayo ako kaniya apan adunay dako nga kahupayan sa kahibalo nga kami nabugkos didto sa templo. Mapasalamaton ako sa walay katapusan nga wala namo ilangan ang among kaminyoon sa templo pinaagi sa paghulat og hamugaway nga panahon. Ang among kaminyoon maoy usa ka butang nga kanunay nakong mahalon ug naglakip og usa ka istorya nga dili gayud nako makalimtan.