Nahimong Sarang pinaagi sa Pagserbisyo diha sa Simbahan

Ako 57 anyos, bag-ong nadiborsyo, nga may gamayng kasinatian sa pagpanarbaho sa gawas sa panimalay, ug nanginahanglan kaayo og trabaho. Nagpadako ko og upat ka mga anak, ug ania nag-inusara ko human sa 32 ka tuig sa kaminyoon nga nakaeskwela og kadiyot sa kolehiyo ug dakong kahadlok ang akong atubangon nga makakita og trabaho sa akong pangidaron.

Naglingkod ko nga naghulat sa interbyu alang sa usa ka posisyon isip scheduling and productions specialist sa county library district, nagsige og hunahuna nga nayabag na ko nga nagtuo nga mahimo kong sarang sa ingon nga posisyon. Sa dihang mobarug ug molakaw na unta ko ang secretary kalit nga miingon nga andam na sila alang kanako didto sa conference room. Gibati nako ang kaluya apan mibarug, hilum nga nag-ampo, ug milakaw padulong sa sulod.

Duha ka maalamon ug propesyonal nga mga tawo miingon kanako nga ang kasinatian sa piho nga mga dapit mahinungdanon kaayo alang niini nga posisyon ug misugod sa pagpangutana kanako mahitungod sa akong kasinatian. Kini nga trabaho nagkinahanglan og usa ka tawo nga makahimo sa pagpahigayon alang sa dagkong mga komperensya, lakip na ang mga pagpahibalo, mga imbitasyon, pagpakaon, ug pagpanglimpyo. Aduna ba ko sa kasinatian nga gikinahanglan? Naghunahuna ko nga wala ko niana sa dihang kalit nga misantup sa akong hunahuna ang komperensya sa Relief Society sa stake. Nahimo kong magtatambag sa kapangulohan sa Relief Society sa stake. Gikan niana nga kasinatian nakakat-on ko unsaon sa pag-organisar og dagkong mga panagpundok ug sa pagpamalit og daghang mga pagkaon alang sa dagkong mga grupo. Matinuoron kong makasulti nga aduna koy kasinatian sa paghimo sa tukmang paagi nga gikinahanglan.

Ang mga tig-interbyu mipadayon: “Kamao ka bang mogamit og computer? Makigsabut ka sa mga tawo ug kinahanglan nga maghimo og eskedyul sa paggamit sa conference room.” Ang akong mahunahunaan lamang mao kon unsa ko ka mapasalamaton ngadto sa tanang mga tawo nga mitudlo kanako sa paggamit sa computer aron makahimo ko og bulletin ug calendar sa mga kalihokan sa ward ug makasulat og newsletter sa stake. Oo, kamao kong mogamit og computer.

“Gilauman ka nga magmugna og mga programa ug mohatag og mga klase alang sa publiko. Makatudlo ka ba og mga klase ngadto sa mga bata ug mga hamtong?” nangutana sila. Tanan kadtong mga hinimo sa homemaking ug sa Cub Scout nga akong gihimo misantup sa akong hunahuna. Akong gipasabut nga nagtudlo ko og mga klase ngadto sa mga bata ug sa mga hamtong sa tibuok nakong kinabuhi sa pagkahamtong. Nasayud ko nga ako mamugnaon ug gibati ang kasigurado nga makahimo ko og maanindot nga mga programa alang sa mga bata ug sa mga hamtong.

Naghinamhinam ko sa dihang akong naangkon ang posisyon. Ganahan ko sa trabaho ug naningkamot sa paghimo sama sa akong gihimo sa calling sa Simbahan: mopalambo sa akong trabaho, mohimo og labaw pa kay sa gikinahanglan, ug dili magbagulbol mahitungod sa overtime. Nakamugna ko og mga klase sa computer sa Iningles ug naka-recruit og usa ka batan-ong estudyante nga motudlo sa mga klase sa Kinatsila. Mitudlo ko og mga klase sa arts ug crafts ug miabi-abi og daghan nga mga manunulat ug inila nga mga mamumulong. Akong gidekorasyonan ang librarya sa matag holiday ug gibutangan og mga basahon nga may kalabutan sa okasyon.

Usa ka adlaw adunay mitawag kanako sa trabahoan, nag-ingon nga gikan sa opisina sa gobernador ug gustong masayud kon ganahan ba ko sa posisyon isip assistant sa gobernador. Nagkatawa ko nga nangutana, “Kinsa ni?” Mipasabut siya nga ang tawag tinuod ug midapit kanako sa pag-adto pagkasunod adlaw alang sa interbyu. Miadto ko nga mibati og kaguol nga basin og komedya ra kini. Dili diay. Ang interbyu maayo ra kaayo, ug nadawat ko diha-diha dayon.

Sa akong bag-ong trabaho akong nagamit ang mga kahanas nga akong nabatunan gikan sa mga katuigan nga pagpamulong diha sa simbahan. Ang gobernador dili makatambong sa tanang mga kalihokan diin siya gidapit; busa, ang iyang mga sakop sa staff ang gilauman nga mamulong puli kaniya. Tanan niadtong mga pakigpulong sa simbahan ug sa pagserbisyo diha sa mga posisyon sa pagpangulo ang nakahatag kanako og kasinatian nga akong gikinahanglan sa pagpamulong diha sa publiko uban sa mga senador, lokal ug nasyonal nga mga dignitary, ug mga celebrity. Nagserbisyo ko isip assistant sa gobernador sulod sa pito ka tuig hangtud nga pareho kaming miretiro.

Asa man kaha ko kon wala pa ang nagkalain-laing mga kasinatian nga akong nadawat samtang nagserbisyo sa mga calling sa Simbahan? Tanan nga akong nakat-unan isip sulugoon sa Ginoo diha sa Iyang Simbahan nakahatag kanako og usa ka kinabuhi nga puno sa mga panalangin. Wala lamang ako makatabang sa uban samtang nagserbisyo, apan paspas usab kaayo ang akong pagtubo. Mapasalamaton kaayo ko alang sa ebanghelyo ug adunay lig-ong pagpamatuod sa bili sa pagserbisyo diha sa Simbahan.