2011
Nakabig sa Ebanghelyo—ug usa ka Misyon
Septyembre 2011


Nakabig sa Ebanghelyo—ug usa ka Misyon

Marco Brando, Italy

Nagdako ko sa Simbahan ug kanunay nga nagplano nga moserbisyo og misyon. Apan samtang ang panahon sa akong pagserbisyo nagsingabut, nangandoy ko nga makabaton og gamhanang kasinatian sa pagkakabig nga akong kaugalingon sama sa akong nadunggan nga gihisgutan sa mga tawo sa dihang ilang gihulagway ang ilang pagpasakop sa Simbahan.

Nasayud ko nga ang pag-adto sa misyon nagkinahanglan og mga sakripisyo. Ako adunay maayong trabaho nga dako og sweldo, ug naghunahuna ko kon makakita pa ba kaha ko og lain nga ingon ka maayo sa akong pagbalik. Nabalaka ko mahitungod sa pagkabalda sa akong edukasyon ug pagbiya sa akong pamilya ug mga higala. Apan nasayud ko sa akong kinahiladman nga ang pagserbisyo og misyon husto, mao nga nagpadayon ko sa pagpangandam.

Isip kabahin niana nga pagpangandam, mikuyog ko sa mga elder sa akong dapit ngadto sa ilang mga sabut sa pagtudlo. Usa ka gabii ang mga misyonaryo ug ako nagtudlo sa usa ka tawo mahitungod sa Pulong sa Kaalam, apan dili siya modawat sa baruganan. Sa dihang mibiya kami sa iyang panimalay, masulti nako nga ang mga elder nawad-an og paglaum, ug mibati usab ako og kaguol.

Wala ko kasiguro nganong kinahanglan ko nga maguol, kay wala gayud ako makaila niini nga tawo. Kanunay kong naghunahuna mahitungod niini, ug akong naamguhan nga aduna ko niini nga mga pagbati tungod kay mibati ko sa Espiritu atol sa leksyon. Naguol ko nga kini nga tawo misalikway sa usa ka butang nga nakahatag kanako og hilabihan nga kalipay.

Uban niana nga hunahuna ako nakaamgo nga ako sa tinuoray nakabig. Nasayud ko nga ang ebanghelyo tinuod, ug dili ko kapaabut nga mopakigbahin niini. Wala madugay gitawag ko nga moserbisyo sa Italy Rome Mission.

Hilabihan ko nga napanalanginan tungod sa mga sakripisyo nga akong gihimo sa pagpangandam alang sa akong misyon. Nagtudlo ko sa ebanghelyo ngadto sa daghang talagsaon nga mga tawo, nakabaton ko og tibuok kinabuhi nga mga higala, ug nakakat-on ko og Iningles. Ang mga panalangin nagpadayon human sa pag-uli nako. Gidawat ko sa samang trabaho nga akong nabatunan sa wala pa ang akong misyon ug gani nakadawat pa og promosyon.

Tingali ang pinakadako nga panalangin, hinoon, mao ang napalambo nga pagpamatuod sa ebanghelyo. Ang akong misyon usa ka panahon sa dili hitupngan nga espirituhanong paglambo, alang niini ako kanunay nga mapasalamaton.