Pagkat-on, Paglihok, Pakigbahin

Si Helaman Ayala ganahan og ninjitsu (usa ka Japanese nga martial art). Kini nga priest sa Hacienda Ward, Mexico City Tecamac Stake, migahin og daghang panahon sa pagpraktis sa iyang nakat-unan. Kasagaran ang iyang mga higala mohangyo kaniya sa pagpakita kanila og lain-laing mga pamaagi.

Ganahan usab siya og musika ug nagtuon og pipila ka mga leksyon sa gitara. “Apan wala koy daghang panahon sa pagpraktis,” miingon siya. “Mao nga wala kaayo ko mouswag. Ug dili kaayo ko makahimo sa pagpakigbahin og daghan niini.”

Si Helaman nakasabut sa kaimportante sa pagpraktis sa inyong nakat-unan ug dayon sa pagpakigbahin niini. “Dili kay igo lang nga kamo makahibalo. Kinahanglan kamo nga mobuhat,” miingon siya. “Makakat-on kita sa mga butang, apan kon dili nato kini gamiton, dili kini makahatag kanato og kaayohan. Ug ang pagpakigbahin mahinungdanon sa pagtabang kaninyo sa pagsiguro nga inyo kining nakat-unan.”

Mao kana ang iyang giganahan sa bag-ong Katungdanan ngadto sa Dios. “Ganahan ko sa ideya sa ‘pagkat-on, paglihok, pakigbahin,’” miingon siya. “Nakatabang kini og maayo kanako. Ang pagkasayud og dugang pa ug ang paggamit sa akong nakat-unan nakatabang sa akong pagpamatuod.”

Iyang gigamit ang plano sa kaluwasan isip ehemplo. Usa kini ka doktrina nga iyang nadunggan sa makadaghan. “Apan ang pagtuon niini nga ako mismo, akong nakita ang gugma sa Langitnong Amahan alang kanato. Ang Espiritu Santo mitandog sa akong kasingkasing, ug akong gibati sa akong kahiladman nga kini tinuod. Akong gibati ang Iyang gugma alang kanako nga Iyang gipadala ang Iyang Anak.”

Samtang si Helaman naghimo ug nagtrabaho sa iyang mga tumong sa Katungdanan ngadto sa Dios, iyang gipasalamatan ang suporta nga iyang nadawat gikan sa iyang mga ginikanan. “Ang akong mga ginikanan miawhag kanako, sila nagpahinumdom kanako kon makalimot ko, ug mangutana sila kon nakahimo na ba ko sa akong mga tumong,” miingon siya.

Ang iyang amahan, nga mao ang bishop sa ilang ward, naggahin og panahon sa pagtabang kaniya. “Iya kong gitabangan nga makasabut sa mga butang nga wala nako masabti,” miingon si Helaman. “Ang akong amahan ug inahan parehong nagsuporta kanako og maayo nianang butanga.”

Si Helaman miingon nga ang mga tumong nga gihangyong buhaton sa batan-ong mga lalaki diha sa Katungdanan ngadto sa Dios alang sa ilang kaayohan. Ang Katungdanan ngadto sa Dios nakapalig-on sa iyang pagtuo ug nakatabang kaniya nga makalikay sa tintasyon. Nakatabang usab kini kaniya nga maandam alang sa umaabut. “Ang basahon makatabang kaninyo sa pagpangandam sa pagdawat sa Melchizedek Priesthood ug makatudlo kaninyo og daghang mga butang nga inyong gikinahanglan isip misyonaryo.”

Ingon nga siya nag-uswag sa ninjitsu pinaagi sa paghimo og mga tumong sa pagkat-on, paglihok sa iyang nakat-unan, ug pakigbahin sa uban, si Helaman nasayud nga “aron mouswag sa kinabuhi, kinahanglan kitang mohimo og mga tumong ug motan-aw sa umaabut.”

Gamit ang Katungdanan ngadto sa Dios ug inubanan sa tabang sa iyang mga ginikanan, nakahimo si Helaman og maayo nga pagsugod.