Tabela Kronologjike e Librit të Mormonit

Jareditët

Ky grup u largua nga Kulla e Babelit dhe mbërriti në kontinentin amerikan rreth vitit 2200 Para K. Ata përparuan deri rreth vitit 600 Para K., kur luftërat i shkatërruan të gjithë përveç Koriantumrit. (Shih Ethëri 1–15.)

Nefitët

Grupi i Lehit u largua nga Jeruzalemi rreth vitit 600 Para K. dhe erdhi në kontinentin amerikan. Pak nga pak, pasardhësit e tij u ndanë. Pasi vdiq Lehi, të drejtët e ndoqën birin e tij, Nefin, drejt veriut. Ata u njohën me emrin nefitë. (Shih 1 Nefi 1–22; 2 Nefi 1–5.)

Lamanitët

Pas vdekjes së Lehit, të ligjtë mbetën me birin e tij Lamanin dhe u njohën me emrin Lamanitë. (Shih 2 Nefi 5.)

Mulekitët

Muleku, biri i Mbretit Zedekia, udhëhoqi një grup nga Jeruzalemi rreth vitit 587 Para K. dhe erdhi në kontinentin amerikan. Ata zbuluan Koriantumrin. (Shih Omni 1:14–21.)

Mosia₁

Rreth vitit 225 Para K. nefitët ishin bërë të ligj, kështu që Mosia₁ udhëhoqi një grup me nefitë të drejtë për në Zarahemla dhe u bashkua me mulekitët. Ata e quajtën veten e tyre nefitë. Mosia₁ u bë mbreti i tyre i drejtë. Mbreti Beniamin ishte biri i tij. (Shih Omni 1:12–23.)

Zenifi

Rreth vitit 200 Para K. Zenifi, një nefit, drejtoi një grup për në veri për të zotëruar tokat nefite. Sapo mbërritën Zenifi dhe grupi i tij, lamanitët i kapën rob. Më vonë, mbreti Mosia₂ dërgoi Amonin që të gjente grupin dhe Amoni ktheu në besim mbretin Limhi. (Shih Mosia 7; 9–22.)

Alma₁

Lindur mes popullit të Zenifit, Alma₁ u bë një nga priftërinjtë e ligj të mbretit Noe. Profeti Abinadi u vra pasi ai i bëri thirrje mbretit Noe të pendohet. Por Alma₁ i besoi mësimet e Abinadit dhe u largua së bashku me një grup besimtarësh, duke u bashkuar përfundimisht me nefitët. (Shih Mosia 11; 17–18; 23–24.)

Alma₂ dhe Bijtë e Mosias₂

Kur ishin të rinj, Alma₂ dhe bijtë e mbretit Mosia₂ punuan për të shkatërruar Kishën. Një engjëll i qortoi ata dhe ata u penduan. Alma₂ u bë një udhëheqës i drejtë. (Shih Mosia 27–29.) Bijtë e Mosias u bënë misionarët e lamanitëve. Pas një suksesi të madh, ata dhe Alma₂ u ribashkuan dhe u gëzuan. (Shih Alma 17–26.)

Hajdutët e Gadiantonit

Ndikimi i kësaj bande të fshehtë vrasëse ishte më i fortë kur populli ishte i lig dhe më i dobët kur populli ishte i drejtë. Rreth vitit 350 Pas K.ata kërcënuan sigurinë e të gjithë njerëzve. (Shih Helamani 2; 6; 4 Nefi 1:42–46.)

Jezu Krishti

Pas Ringjalljes së Tij në Jeruzalem, Shpëtimtari u shfaq në kontinentin amerikan, kreu shërbesa ndaj popullit, u mësoi ungjillin e Tij dhe organizoi Kishën e Tij. Për 200 vite pas vizitës së Tij, njerëzit jetuan në paqe. (Shih 3 Nefi 11–28).

Nefitët e Shkatërruar

Pak nga pak ligësia u rikthye, luftërat u egërsuan dhe nefitët u shkatërruan. I vetmi i mbijetuar, Moroni, mbajti analet e nefitëve dhe i groposi ato përpara se të vdiste. (Shih 4 Nefi 1:24–28; Mormoni 8:1–8; Moroni 10.)