2011
Bililhong mga Saad sa Basahon ni Mormon
Oktubre 2011


Mensahe sa Unang Kapangulohan

Bililhong mga Saad sa Basahon ni Mormon

Imahe
President Thomas S. Monson

Daghang mga katuigan ang milabay nagbarug ko sa kilid sa higdaanan sa usa ka batan-ong amahan samtang siya nanlimbasog tali sa kinabuhi ug kamatayon. Ang iyang nabalaka kaayo nga asawa ug ilang duha ka anak nagbarug sa kiliran. Iyang gikuptan ang akong kamot ug, uban sa nagpakiluoy nga panagway, miingon, “Bishop, nasayud ko nga ako hapit na mamatay. Sultihi ko unsay mahitabo sa akong espiritu kon mamatay ko.”

Nag-ampo ko sa hilum alang sa langitnong paggiya ug nakabantay diha sa lamesa kilid sa iyang higdaanan og usa ka kopya sa triple combination. Gikuha nako ang basahon ug gipakli ang mga pahina. Diha-diha dayon akong nadiskobrehan nga ako, sa walay pagpaningkamot sa akong bahin, mihunong sa ika-40 nga kapitulo sa Alma diha sa Basahon ni Mormon. Akong gibasa kining mga pulong ngadto kaniya:

“Tan-awa, kini gipahibalo ngari kanako pinaagi sa usa ka anghel, nga ang espiritu sa tanan nga mga tawo, sa diha-diha nga sila mobiya gikan niining mortal nga lawas, … dad-on sa panimalay ngadto niana nga Dios kinsa mihatag kanila sa kinabuhi.

“Ug … ang mga espiritu niadto kinsa mga matarung pagadawaton ngadto sa kahimtang sa kalipay, diin gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nila nga mga kasamok ug tanan nga kabalaka, ug kasubo” (Alma 40:11–12).

Samtang nagpadayon ko sa pagbasa kabahin sa Pagkabanhaw, ang kasanag nakita sa iyang panagway ug pahiyum diha sa iyang ngabil. Sa pagtapos sa akong pagbisita, nanamilit ko niining buotang pamilya.

Sunod nakong nakita ang asawa ug mga anak diha na sa haya. Naghunahuna ko kabahin niadtong gabii sa dihang ang batan-ong amahan mihangyo alang sa kamatuoran ug, gikan sa Basahon ni Mormon, nakadungog sa tubag sa iyang pangutana.

Sa Basahon ni Mormon naggikan ang uban pang bililhong mga saad, lakip na ang mga saad sa kalinaw, kagawasan, ug mga panalangin kon kita “moalagad sa Dios sa yuta, kinsa si Jesukristo” (Ether 2:12).

Gikan sa mga pahina niini moabut ang mga saad nga “walay katapusan ang kalipay” ug “niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon” (Mosiah 2:41).

Gikan sa mga pahina niini moabut ang mga saad sa “dili matukib nga hingpit nga kalipay” niadtong kinsa nga nahimong “[mga] himan diha sa mga kamot sa Dios” sa pagluwas sa Iyang bililhong mga anak nga lalaki ug anak nga mga babaye (Alma 28:8; 29:9).

Gikan sa mga pahina niini moabut ang mga saad nga ang nagkatibulaag nga Israel mapundok—usa ka buhat diin kita nalakip pinaagi sa atong talagsaong misyonaryo nga mga paningkamot sa tibuok kalibutan (tan-awa sa 3 Nephi 16: 21–22).

Gikan sa mga pahina niini moabut ang saad nga kon kita mag-ampo ngadto sa Amahan sa sagradong pangalan ni Jesukristo, ang atong pamilya mapanalanginan (tan-awa sa 3 Nephi 18:21).

Gikan sa pagtuon niining mga pahina moabut ang katumanan sa propetikanhon nga saad nga “moabut sa inyong kinabuhi ug sa inyong panimalay ang dugang giya sa Espiritu sa Ginoo, usa ka lig-on nga desisyon sa pagsunod sa Iyang mga sugo, ug usa ka mas lig-on nga pagpamatuod nga buhi gayud ang Anak sa Dios.”1

Ug gikan sa mga pahina sa Basahon ni Mormon moabut ang saad ni Moroni nga pinaagi sa pag-ampo, matinud-anong tinguha, ug hugot nga pagtuo kang Kristo, kita mahimong masayud sa kamatuoran niining mga saad “pinaagi sa gahum sa Espiritu Santo” (tan-awa sa Moroni 10:4–5).

Kauban sa uban pang moderno nga mga propeta, ako mopamatuod sa katinuod niining “labing tukma sa bisan hain nga basahon dinhi sa yuta,”2 gani ang Basahon ni Mormon, lain nga tugon ni Jesukristo. Ang mga mensahe niini mokatap sa kalibutan ug modala sa mga mambabasa niini ngadto sa kahibalo sa kamatuoran. Kini ang akong pagpamatuod nga ang Basahon ni Mormon makapausab sa kinabuhi. Unta ang matag usa kanato mobasa niini ug mobasa niini pag-usab. Ug unta kita malipayong mopakigbahin sa atong mga pagpamatuod sa talagsaong mga saad niini ngadto sa tanang mga anak sa Dios.

Mubo nga mga sulat

  1. Tan-awa sa Gordon B. Hinckley, “A Testimony Vibrant and True,” Liahona, Ago. 2005, 6.

  2. Mga Pagtulun-an sa mga Presidente sa Simbahan: Joseph Smith (2007), 75.

Paghulagway sa litrato pinaagi ni Christina Smith