Ang Basahon ni Mormon

Ngano nga ang laing tugon ni Jesukristo importante man kaayo alang sa atong panahon? Ngano nga ang Ginoo mopagawas man og laing saksi aron paglig-on sa gamhanan nga mga pamahayag sa Biblia?

Nagpuyo kita sa usa ka panahon nga lahi sa uban. Ang kalamboan sa siyensya nagtugot sa medikal nga pag-amuma, transportasyon, kakomportable, ug kaharuhay nga dili gayud mahulagway sa mga henerasyon nga nag-una kanato. Ang yuta napuno sa impormasyon ug teknolohiya, paglambo sa buhat sa family history ug sa pagpakigbahin sa ebanghelyo apan pagkuyanap usab sa pornograpiya, grabeng pang-abuso, ug uban nga “mga dautan ug sa mga laraw [nga] anaa diha sa mga kasingkasing sa dautan nga mga tawo” (D&P 89:4). Kasagaran sa kalibutan, nagpuyo kita sa panahon nga adunay dakong tinguha sa pag-angkon sa materyal nga mga butang.

Kini nga mga kahimtang, kon dili kita mag-amping, makabalda o makadani kanato sa pagpalayo gikan sa mga baruganan nga mahangturon ug tinuod alang sa matag henerasyon.

Sa batan-on pa ko nga misyonaryo didto sa Europe sayo sa mga 1970, among sugdan ang kadaghanan sa among pagtudlo sa pagpasabut mahitungod sa Apostasiya, tungod kay ang kabalaan ni Jesukristo gidawat sa kadaghanan. Sa dihang mibalik ko isip usa ka presidente sa misyon 20 ka tuig ang milabay, among sugdan ang among mga panagsultihanay sa lahi nga paagi, tungod kay ang pagtuo diha ni Jesukristo isip Anak sa Dios, nga mihatag sa Iyang kinabuhi alang sa atong mga sala ug nabanhaw sa ikatulong adlaw, nag-anam gayud og kawala.

Sa kalibutan karon, ang arogante nga mga argumento ni Korihor, ang anti-Kristo, nakabaton og daghang mga tigpaminaw:

“Ngano nga nangita kamo og usa ka Kristo? Kay walay tawo nga nasayud sa bisan unsa nga moabut.

“Tan-awa, kini nga mga butang nga inyong gitawag og mga panagna … binuang nga mga tradisyon sa inyong mga amahan.

“… Kamo dili masayud sa mga butang nga kamo dili makakita. …

“… Matag tawo mouswag sumala sa iyang [kaugalingong] kinaadman, ug … makadaug sumala sa iyang [kaugalingong] kusog” (Alma 30:13–15, 17).

Nagkinahanglan kita sa atong kaugalingong sigurado ug dili matarug nga pagtuo diha ni Ginoong Jesukristo, ug nagkinahanglan kita og tabang sa paglig-on sa atong mga pamilya aron kining pagtuo modagayday ngadto sa mga kasingkasing sa atong mga anak ug mga apo. Ang hugot nga pagtuo diha ni Jesukristo, kon lig-on nga natisok sa atong mga kalag, makahatag og tinuod nga pagkakabig, ug sa pagkadasig niini moabut ang paghinulsol, matinuoron nga pagkadisipulo, mga milagro, espirituhanon nga mga gasa, ug malungtaron nga pagkamatarung. Importante kini nga bahin sa balaan nga misyon sa Basahon ni Mormon.

Isip batan-ong misyonaryo, ako adunay maanindot kaayo nga panaghisgut uban sa usa ka pari. Giingnan mi niya nga dili siya makadawat sa Basahon ni Mormon tungod kay dayag kaayo kini nga naghisgut kabahin ni Jesukristo, naggamit sa Iyang pangalan ug mga panghitabo sa Iyang kinabuhi gatusan ka tuig sa wala pa Siya matawo. Iyang nakita nga kini nga pagkamadayagon lahi sa sumbanan sa Daang Tugon nga mipasabut sa Manluluwas sa mas tulugkaron nga paagi.

Alang kanako ang dayag nga pagpahayag kabahin ni Jesukristo mao gayud ang gahum sa Basahon ni Mormon. Siyempre, kinahanglan gayud kita nga makadawat og espirituhanon nga pagsaksi nga ang basahon iya sa Dios. Apan sa higayon nga maangkon kana, ang mga katuyoan ni Kristo, ang katinuod sa Iyang kinabuhi ug Pagkabanhaw, ug ang katin-aw kon unsay gikinahanglan sa pagsunod Kaniya ug pagbaton og kinabuhing dayon uban Kaniya kahibulongang ipakita sa atong atubangan.

Inubanan sa gahum sa Espiritu Santo, ang pagbasa ug pagpamalandong sa maanindot nga mga wali kabahin ni Jesukristo diha sa Basahon ni Mormon makahatag og piho nga pagsaksi sa kamatuoran niini. Gusto ko nga mohinay-hinay og pakli sa Basahon ni Mormon nga magbusog sa gamhanan nga mga doktrina ni Kristo: Ang panan-awon ni Nephi kabahin sa kahoy sa kinabuhi, nga ang anghel nangutana, “Nasayud ka ba sa pagpakig-angay sa Dios?” (1 Nephi 11:16); ang pagpamatuod ni Lehi nga ang “katubsanan moabut pinaagi sa atong Balaan nga Mesiyas; kay siya puno sa grasya ug kamatuoran” (2 Nephi 2:6); ang pagdugang ni Jacob nga Siya mao ang “magbalantay sa ganghaan … ug wala siya mogamit og sulugoon didto” (2 Nephi 9:41).

Dayon atong sundan si Haring Benjamin nga nagtudlo kanato kabahin sa mga kinaiya sa pagkadisipulo, gamit ang iyang dili mapaling nga pamahayag nga “walay lain nga ngalan nga gihatag ni lain nga mga agianan ni mga paagi diin ang kaluwasan modangat ngadto sa mga katawhan, lamang diha ug pinaagi sa ngalan ni Kristo” (Mosiah 3:17).

Hapit na kita moabut ni Abinadi, nga hapit na mohatag sa iyang kinabuhi alang sa unsay iyang gituohan:

“Apan adunay usa ka pagkabanhaw, busa ang lubnganan walay kadaugan, ug ang kahapdos sa kamatayon gituhop diha kang Kristo.

“Siya mao ang kahayag ug ang kinabuhi sa kalibutan; oo, usa ka kahayag nga walay katapusan, nga dili gayud mahimo nga mongitngit” (Mosiah 16:8–9).

Si Alma nagdala og maanindot nga mga doktrina kabahin sa Pag-ula, kaangayan, ug kalooy ngadto sa kinabuhi: “Ang laraw sa kalooy dili mapadangat gawas nga usa ka pag-ula kinahanglan pagahimoon; busa ang Dios sa iyang kaugalingon miula sa iyang dugo alang sa mga sala sa kalibutan, aron pagpadangat sa laraw sa kalooy, pagtagbaw sa mga gipangayo sa kaangayan, nga ang Dios unta mahimo nga usa ka mahingpit, makiangayon nga Dios, ug usa ka maloloy-on nga Dios usab” (Alma 42:15).

Dayon moadto kita sa maanindot nga pagbisita sa Manluluwas ngadto sa mga anak ni Lehi. Bation usab nato ang Iyang gugma, Iyang kalooy, Iyang pagtulun-an, Iyang kaugalingong pagpamatuod:

“Kini mao ang ebanghelyo diin Ako mihatag nganha kaninyo—nga Ako mianhi dinhi sa kalibutan aron sa pagbuhat sa kabubut-on sa akong Amahan. …

“Ug ang akong Amahan mipadala kanako nga Ako unta ituboy nganha sa krus … nga Ako unta makadala sa tanan nga mga tawo ngari kanako, nga ingon nga Ako gituboy sa mga tawo mao usab ang mga tawo ituboy pinaagi sa Amahan, sa pagbarug sa akong atubangan, aron pagahukman sa ilang mga buhat, bisan kon sila matarung o kon sila dautan” (3 Nephi 27:13–14).

Sa katapusan ang panapos nga pangaliyupo nila ni Mormon ug Moroni: “Hibaloi ninyo nga kamo kinahanglan … maghinulsol sa tanan ninyong mga sala ug mga kadautan, ug motuo diha kang Jesukristo, nga siya mao ang Anak sa Dios” (Mormon 7:5). “Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:32).

Kining gamhanan, makapakumbinsir sa espirituhanong paagi nga pagpamatuod nga si Jesukristo mao gayud ang gisaad nga Mesiyas—ang dinihogan nga Anak sa Dios, gipadala nganhi sa yuta aron sa pagpahinabo sa pagkabanhaw sa tanang mga tawo ug sa espirituhanong paglimpyo niadtong maghinulsol ug mosunod Kaniya—gipahayag diha sa mga asoy sa mga kasaysayan kabahin sa mga pamilya.

Ang Basahon ni Mormon nagsugod sa usa ka pamilya, usa ka amahan ug inahan, anak nga mga lalaki ug anak nga mga babaye nga nagapatalinghug sa pinadayag sa ilang amahan nga propeta nga mobiya sa ilang kalibutanong mga kabtangan ug mosunod sa tambag sa Ginoo. Ang mga asoy sa basahon puno sa mga ginikanan nga nagtinguha nga masilsil sa ilang mga anak ang saad ug paglaum diha ni Jesukristo. Sa usa ka higayon akong gikuha gikan sa mga pahina niini ang piho nga tambag gikan sa mga amahan ngadto sa ilang anak nga mga lalaki—misumada kini og 52 ka mga pahina nga gi-type. Diha sa Basahon ni Mormon, atong makita kon giunsa pagtudlo sa mga ginikanan ang hugot nga pagtuo diha ni Kristo ug pagsunod sa mga sugo sa Dios ngadto sa mga anak nga masulundon gikan sa ilang pagkabata ug ngadto sa mga anak nga kinahanglang mangita og paagi nga makabalik—usahay diha sa sama ra nga pamilya. Kini usa ka leksyon alang sa atong panahon, alang sa atong mga anak, alang sa atong mga pamilya.

Ang piho nga buluhaton sa mga babaye ug sa anak nga mga babaye sa pipila ka hinungdan wala hisguti, nga maoy sagad sa karaan nga sinulat. Apan magtan-aw lapas pa sa makita, atong makita ang ilang mahangturon ug malungtaron nga impluwensya. Atong gihambin ang bililhon nga mga tipik nga naghisgut kabahin sa mga babaye ug mga inahan, sama sa dihang ang ilang mga pagbati gihulagway nga “malumo ug putli ug huyang sa atubangan sa Dios” (Jacob 2:7) o sa dihang si Helaman mihulagway sa kamaayo sa iyang batan-ong mga sundalo nga giimpluwensyahan sa ilang matarung nga mga inahan:

“Sila mituman ug naninguha sa pagbuhat sa matag pulong sa sugo nga walay pagkasayop niini; oo, ug gani sumala sa ilang hugot nga pagtuo kini nahimo ngadto kanila; ug ako nahinumdom sa mga pulong diin sila misulti ngari kanako nga ang ilang mga inahan mitudlo kanila. …

“Karon kini mao ang hugot nga pagtuo niini kinsa ako nakapamulong; sila mga batan-on, ug ang ilang mga hunahuna mga lig-on, ug sila mibutang sa ilang pagsalig diha sa Dios sa kanunay. …

“… Sila gitudloan sa ilang mga inahan, nga kon sila dili magduha-duha, ang Dios moluwas kanila.

“Ug sila misaysay pagbalik ngari kanako sa mga pulong sa ilang mga inahan, nga nag-ingon: Kami wala magduha-duha nga ang among mga inahan nasayud niini” (Alma 57:21, 27; 56:47–48).

Dapiton ko kamo sa pagpamalandong niini nga mga pangutana sa pagtabang kaninyo sa pagpahisama sa mga pagtulun-an sa Basahon ni Mormon nganha sa inyong pamilya:

• Unsa nga mga tudling diha sa Basahon ni Mormon ang nagtudlo kanato nga ang mga anak kinahanglan nga makakita sa integridad ug pagkamatarung diha sa hugot nga pagtuo sa ilang mga ginikanan?

• Unsa nga tambag sa mga amahan diha sa Basahon ni Mormon ang gihatag ngadto sa ilang anak nga mga lalaki nga gusto natong ipakigbahin sa atong mga anak?

• Unsa ang atong makat-unan mahitungod sa atong mga paningkamot ngadto sa mga anak nga dili masulundon?

• Sa unsang paagi nga ang mga ginikanan diha sa Basahon ni Mormon nagpakigbahin sa ilang lawom nga mga gituohan ngadto sa ilang mga anak?

• Unsa ang atong makat-unan mahitungod sa hugot nga pagtuo samtang ipasa kini gikan sa usa ka henerasyon ngadto sa lain?

Walay lain pa nga mas mahinungdanon nga ipakigbahin ngadto sa uban kay sa hugot nga pagtuo diha ni Ginoong Jesukristo. Naghatag kini og pagsabut sa mga hagit niini nga kinabuhi, kalipay taliwala sa kalisud, ug kinabuhing dayon didto sa kalibutan nga moabut.

Adunay daghang kalibutanon nga mga impluwensya nga mobitad kanato ug sa atong mga pamilya gikan niining labing mahinungdanon nga hugot nga pagtuo. Ang Basahon ni Mormon nagdapit kanato ug sa atong mga pamilya sa pagbaton og hugot nga pagtuo ni Ginoong Jesukristo, ug nakigbahin kini sa mga baruganan nga makatabang sa atong mga pamilya nga magmalampuson.

Ako mopamatuod nga ang Basahon ni Mormon tinuod ug sa pagkatinuod gayud nga gihatag kini ngadto ni Propeta Joseph Smith pinaagi ni anghel Moroni, ubos sa mando ni Ginoong Jesukristo. Kini alang sa atong panahon, alang sa atong mga anak ug mga apo. Sa atong pag-abli niini kada adlaw uban sa hugot nga pagtuo, ako mosaad nga ang Espiritu sa Ginoo maanaa kanato ug ang atong mga pamilya mapanalanginan hangtud sa kahangturan.