Ang Istorya sa Basahon ni Mormon

Ang Basahon ni Mormon nagsugod sa usa ka propeta nga ginganlan og Lehi. Iyang gipasidan-an ang dautan nga mga tawo sa Jerusalem sa paghinulsol, apan ang mga tawo wala maminaw. Ang Ginoo misugo kang Lehi sa pagdala sa iyang pamilya, naglakip sa iyang asawa, si Sariah, ug ilang mga anak nga lalaki nga sila si—Laman, Lemuel, Sam, ug Nephi—ngadto sa kamingawan. (Tan-awa sa 1 Nephi 1–2.)

Gipabalik ni Lehi ang iyang mga anak nga lalaki sa pagkuha sa mga kasulatan nga gisulat sa mga palid nga tumbaga. Kining mga palid adunay kasaysayan sa ilang mga kaliwatan ug sa ubang mga butang nga gisugo sa Ginoo nga ilang isulat. Giampingan nila ni Lehi ug Nephi kining mga palid. Gisulat usab nila sa mga palid nga metal kon unsa ang nahitabo sa ilang pamilya. (Tan-awa sa 1 Nephi 3–5.)

Ang Ginoo mihatag kang Lehi og usa ka kompas nga gitawag og Liahona aron sa paggiya sa iyang pamilya sa kamingawan ngadto sa yuta nga saad. (Tan-awa sa 1 Nephi 16.)

Ang Ginoo misugo kang Nephi sa paghimo og barko aron modala sa pamilya ni Lehi ngadto sa yuta nga saad. Si Nephi mituman sa iyang amahan ug sa Ginoo, apan sila si Laman ug Lemuel wala. (Tan-awa sa 1 Nephi 17.)

Si Lehi ug ang iyang pamilya milawig padulong sa yuta nga saad sakay sa barko nga ilang gihimo. (Tan-awa sa 1 Nephi 18.)

Sila si Laman ug Lemuel nagpadayon nga dili motuman sa ilang amahan ug sa Ginoo. Ang ilang mga kaliwatan naila nga mga Lamanite. Si Nephi nagpadayon sa pagsunod sa iyang amahan ug sa Ginoo. Ang iyang mga kaliwat gitawag og mga Nephite. (Tan-awa sa 2 Nephi 4–5.)

Pagkamatay nila ni Lehi ug Nephi, ang ubang mga tawo, sama sa igsoon nga lalaki ni Nephi nga si Jacob, mao ang gisangunan sa pagsulat sa importanting mga pagtulun-an ug mga panghitabo diha sa mga palid. (Tan-awa sa Jacob 1.)

Si Enos nag-ampo aron mapasaylo sa iyang mga sala, ug siya napasaylo. (Tan-awa sa Enos 1.)

Si Haring Benjamin nagtukod og tore aron sa pagtudlo sa iyang katawhan sa ebanghelyo. (Tan-awa sa Mosiah 2–6.)

Ang dautan nga hari nga ginganlan og Noah misugo nga ipapatay ang propeta nga si Abinadi. Apan ang mga pagtulun-an ni Abinadi nakakabig sa usa sa mga pari ni Noah nga si Alma. (Tan-awa sa Mosiah 11–17.)

Si Alma nakaeskapo sa korte ni Haring Noah, mitudlo sa ubang mga tawo kabahin sa ebanghelyo, ug mibunyag kanila. (Tan-awa sa Mosiah 18.)

Ang anak ni Alma nga si Alma nga Batan-on masinupakon. Siya ug ang iyang mga higala, mga anak nga lalaki ni Mosiah, mga dautan. Dayon usa ka anghel ang misugo kanila sa paghinulsol. Si Alma ug ang anak nga mga lalaki ni Mosiah naghinulsol ug naggahin sa nahabilin nilang panahon sa kinabuhi sa pagsangyaw sa ebanghelyo. (Tan-awa sa Mosiah 27–28.)

Ang anak nga lalaki ni Mosiah nga si Ammon mikabig og daghang mga Lamanite human miprotekta sa panon sa mga hayop ni Haring Lamoni ug naangkon ang iyang pagsalig. (Tan-awa sa Alma 17–19.)

Gisulat ni Kapitan Moroni ang bandila sa kalingkawasan ug nakig-away sa pagdepensa sa kalingkawasan sa iyang katawhan. (Tan-awa sa Alma 46, 48.)

Si Helaman nangulo sa kasundalohan nga may 2,000 ka matarung nga batan-ong mga lalaki. (Tan-awa sa Alma 53, 56–58.)

Usa ka propeta nga Lamanite nga ginganlan og Samuel nanagna nga si Jesukristo sa dili madugay matawo. (Tan-awa sa Helaman 13–16.)

Sa layo nga dapit, sa Bethlehem, natawo si Jesukristo. Siya mitudlo sa Iyang ebanghelyo, miayo ug mipanalangin sa mga tawo, ug mitukod sa Iyang Simbahan. Dayon Siya gilansang sa krus ug nabanhaw. (Tan-awa sa 3 Nephi 1, 8–10.)

Human sa Iyang Pagkabanhaw, Siya mibisita sa matarung nga mga Nephite ug mga Lamanite. Siya mitudlo kanila sa Iyang ebanghelyo, miayo kanila, ug mipanalangin kanila, sama gayud sa Iyang gibuhat sa Jerusalem. (Tan-awa sa 3 Nephi 11–28.)

Usa ka 10 anyos nga batang lalaki nga ginganlan og Mormon ang napili nga mosulat sa mga palid inig ka dako niya. Sa edad nga 24 siya nagsugod sa paghiusa sa labing importante nga mga istorya gikan sa tanang mga rekord nga nasulat diha sa mga palid nga metal. (Tan-awa sa Mormon 1.)

Sa wala pa mamatay si Mormon, iyang gihatag ang mga palid ngadto sa iyang anak nga lalaki nga si Moroni. Si Moroni mao ang heneral sa kasundalohan. Siya ang katapusang Nephite nga naluwas sa dakong gubat tali sa mga Lamanite ug mga Nephite. (Tan-awa sa Mormon 6, 8.)

Sa wala pa mamatay si Moroni, iyang gilubong ang mga palid sa dapit nga gitawag og Cumorah. Mga 1,400 ka tuig human gilubong ni Moroni ang mga palid, ang 14-anyos nga batang lalaki nga ginganlan og Joseph Smith nag-ampo aron masayud kon asa nga simbahan ang tinuod. (Tan-awa sa Joseph Smith—Kasaysayan 1:5–16.)

Ang Langitnong Amahan ug si Jesukristo mibisita kang Joseph Smith ug miingon kaniya nga wala niining mga simbahan ang tinuod ug hingpit. Si Joseph motabang sa pagpahiuli sa tinuod nga Simbahan ni Jesukristo. (Tan-awa sa Joseph Smith—Kasaysayan 1:17–20.)

Si Moroni mibisita kang Joseph Smith ug misulti kaniya kabahin sa gilubong nga mga palid. Inigka dako ni Joseph Smith, iyang kuhaon ang mga palid ug hubaron kini. (Tan-awa sa Joseph Smith—Kasaysayan 1:27–54.)

Sa dihang si Joseph Smith 21 anyos na, siya miadto sa Bungtod sa Cumorah ug gikuha ang mga palid sa dapit diin gilubong kini ni Moroni. (Tan-awa sa Joseph Smith—Kasaysayan 1:59.)

Pinaagi sa gahum sa Dios, gihubad ni Joseph Smith ang sinulat diha sa mga palid. Iyang gimantala kining paghubad. Kini gitawag og Basahon ni Mormon. (Tan-awa ang ulohan nga pahina ug pasiuna sa Basahon ni Mormon.)