Pagpangandam sa Priesthood: “Nagkinahanglan Ko sa Inyong Tabang”

Akong mga kaigsoonan, dako nakong kalipay nga makauban mo niining tibuok kalibutan nga miting sa priesthood sa Dios. Karon mamulong ko kabahin sa pagpangandam sa priesthood, sa atong kaugalingon ug sa atong gihatag nga tabang sa uban.

Kadaghanan nato maghunahuna gyud sa atong kaugalingon usahay, “Andam na ba ko alang niini nga buluhaton sa priesthood?” Ang akong tubag, “Oo, kamo andam na.” Ang akong tuyo karon mao ang pagtabang ninyo nga mahibalo niana nga pagpangandam ug makatigom og kaisug gumikan niini.

Sama sa inyong nahibaloan, ang Aaronic Priesthood gipili isip igpapangandam nga priesthood. Ang dakong pundok sa nanaghupot sa Aaronic Priesthood mao ang batan-ong mga deacon, mga teacher, ug priest nga nanag-edad og 12 ngadto sa 19.

Tingali naghunahuna kita bahin sa pagpangandam sa priesthood nga nahitabo sa katuigan sa pagka-Aaronic Priesthood. Apan ang atong Langitnong Amahan miandam na kanato sukad pa niadtong gitudloan pa kita sa Iyang presensya didto sa Iyang gingharian sa wala pa kita matawo. Kita giandam Niya karong gabhiona. Ug Siya mopadayon sa pag-andam nato samtang kita motugot pa Kaniya.

Ang katuyoan sa tanang pagpangandam sa priesthood, sa kinabuhi sa wala pa dinhi sa yuta ug niining kinabuhia, mao ang pag-andam kanato ug niadtong atong giserbisyohan alang Kaniya, alang sa kinabuhing dayon. Ang pipila sa unang mga leksyon didto sa kinabuhi sa wala pa dinhi sa yuta naglakip sa plano sa kaluwasan, nga si Jesukristo ug ang Iyang Pag-ula mao ang sentro niini.Wala lang kita tudloi sa plano apan didto kita sa mga konseho diin kita mipili niini.

Tungod kay ang tabil sa kalimot gibutang man sa atong hunahuna sa atong pagkahimugso, kita kinahanglang mangita og paagi aron mahibaloan og balik niining kinabuhia ang unsay atong nahibaloan ug gidepensahan kaniadto. Kabahin sa atong pagpangandam niining kinabuhia mao ang pagpangita nianang bililhong kamatuoran aron kita makapasalig og usab niini pinaagi sa pakigsaad. Nagkinahanglan kana og hugot nga pagtuo, pagpaubos, ug kaisug sa atong bahin ingon man usab sa tabang gikan sa mga tawo nga nakakaplag sa kamatuoran ug dayon mipakigbahin niini ngari kanato.

Sila tingali ang mga ginikanan, mga misyonaryo, o mga higala. Apan kana nga tabang usa ka bahin sa atong pagpangandam. Ang atong pagpangandam sa priesthood kanunayng naglakip sa uban kinsa giandam nang daan aron motanyag ngari kanato og oportunidad sa pagdawat sa ebanghelyo ug dayon mopili sa paglihok pinaagi sa pagtuman sa mga pakigsaad aron motuhop kini sa atong kasingkasing. Aron mahimo kitang takus sa kinabuhing dayon, ang atong pagserbisyo niining kinabuhia kinahanglang maglakip sa pagtrabaho sa tibuok natong kasingkasing, hunahuna, ug gahum ug maningkamot sa pag-andam sa uban aron makabalik sa Dios uban kanato.

Mao nga ang ubang bahin sa pagpangandam sa priesthood nga himoon nato niining kinabuhia mao ang mga oportunidad sa pagserbisyo ug pagtudlo sa uban. Kini maglakip sa pagkahimong mga magtutudlo sa Simbahan, pagka-maalamon ug pagka-mahigugmaong mga amahan, pagkasakop sa korum, ug pagka-misyonaryo sa Ginoo. Ang Ginoo mohatag kanato sa mga oportunidad, apan kon andam ba kita kana magdepende kanato. Ang akong tuyo karon mao ang pagpakita sa pipila ka mahinungdanong mga pagpili nga gikinahanglan aron magmalampuson ang pagpangandam sa priesthood.

Ang maayo nga mga pagpili sa tawo nga tigbansay ug sa tawo nga gibansay magdepende sa pagsabut kon giunsa pag-andam sa Ginoo ang Iyang mga sulugoon sa priesthood.

Una, Siya motawag og mga tawo, batan-on ug tigulang, nga kon tan-awon sa kalibutanong mga mata, ug bisan sa ilang kaugalingon, huyang ug yano. Ang Ginoo makausab niadtong klaro nga mga kahuyang ngadto sa kalig-on. Makausab kana sa pamaagi unsaon sa pagpili sa maalamon nga lider kon si kinsa ang bansayon ug unsaon sa pagbansay. Ug kini makausab sa pamaagi kon unsay buhaton sa naghupot sa priesthood ngadto sa mga oportunidad alang sa kalamboan nga gitanyag kaniya.

Atong ikonsiderar ang pipila ka mga ehemplo. Kaniadto usa ko ka walay kasinatian nga priest sa dako nga ward. Ang akong bishop mitawag nako sa telepono usa ka Dominggo sa hapon. Dihang akong gitubag, siya miingon, “Duna ka bay panahon sa pagkuyog nako? Nagkinahanglan ko sa imong tabang.” Siya mipasabut nga gusto lang niya nga ikauban ako sa pagbisita sa usa ka babaye nga wala nako mahibaloi, nga walay pagkaon ug kinahanglang makat-on unsaon pagdumala sa iyang kwarta sa maayong paagi.

Karon, nahibalo ako nga duna siyay duha ka eksperyensyadong magtatambag sa bishopric. Ang duha mga hingkod na nga may daghang kasinatian. Ang usa ka magtatambag tag-iya sa dakong negosyo, kinsa sa kaulahian nahimong presidente sa misyon ug General Authority. Ang laing magtatambag usa ka ilado nga huwes sa siyudad.

Ako bag-o lang nga gitawag nga unang assistant sa korum sa mga priest. Nahibalo siya nga gamay ra ko og nasabtan mahitungod sa mga baruganan sa welfare. Gamay ra gani ako og nahibaloan mahitungod sa pinansyal nga pagdumala. Wala pa gani ko makasulay og pirma og tseke, walay bank account, o wala pa gani ko makakita og personal nga badyet. Apan, bisan sa akong pagkawalay kasinatian, akong gibati nga tinud-anay kaayo siya sa dihang miingon siya nga, “Nagkinahanglan ko sa imong tabang.”

Akong nasabtan unsay gipasabut niadtong dinasig nga bishop. Iyang nakita nako ang bulawanong oportunidad sa pag-andam sa usa ka naghupot sa priesthood. Sigurado ko nga wala niya makita daan nianang walay kasinatian nga batang lalaki ang umaabut nga mahimong sakop sa Presiding Bishopric. Apan siya mitratar kanako nianang adlawa, ug sa tanang adlaw sa akong pagkaila kaniya sa mga katuigan, isip usa ka proyekto sa pagpangandam sa talagsaon nga saad.

Daw nalingaw siya niini, apan kadto trabaho alang kaniya. Sa among pagpauli sa akong balay human sa among pagbisita sa biyuda nga nanginahanglan, iyang giparking ang sakyanan. Iyang giablihan ang ginamit na kaayo ug puno sa marka nga mga kasulatan. Mihatag siya kanako og mabinationg pagkorihir. Miingon siya nga kinahanglan pa kong magtuon ug magkat-on sa mga kasulatan. Apan tingali iyang nakita nga ako huyang ug yano kaayo nga matudloan. Hangtud karong adlawa akong mahinumduman ang iyang gitudlo nianang hapona. Apan labaw sa tanan, akong nahinumduman unsa siya ka masaligon nga ako makakat-on ug mahimong mas maayo—ug ako mahimo gayud.

Nakita niya lapas pa sa kamatuoran kon kinsa ko sa umaabut ngadto sa mga posibilidad nga naa sa usa ka tawo kinsa mibati nga huyang ug yano ra kaayo sa pagpangayo og tabang sa Ginoo ug sa pagtuo nga kini moabut.

Ang mga bishop, mga presidente sa misyon, ug mga amahan makapili sa paglihok niadtong mga posibilidad. Akong nakita kana nga nahitabo sa miting sa pagpuasa karong bag-o samtang ang usa ka presidente sa korum sa mga deacon mihatag sa iyang pagpamatuod. Mahimo na siya nga teacher ug mobiya na sa iyang mga sakop sa korum.

Mipamatuod siya uban sa talagsaong pagbati diha sa iyang tingog kabahin sa kalamboan sa pagkamaayo ug gahum nga anaa sa mga sakop sa iyang korum. Wala pa ako makadungog og tawo nga midayeg sa iyang organisasyon nga labihan ka nindot kay sa iyang gihimo. Siya midayeg sa ilang pagserbisyo. Ug dayon miingon siya nga nasayud siya nga nakahimo siya sa pagtabang sa bag-ong mga deacon sa dihang mibati sila nga nabug-atan tungod kay gibati na niya kana sa dihang miabut siya sa priesthood.

Ang iyang mga pagbati sa kahuyang naghimo kaniyang mas mapailubon, mas maloloy-on, ug sa ingon mas nakapalig-on ug nakaserbisyo sa uban. Niadto nga katuigan diha sa Aaronic Priesthood, alang kanako, nahimo siyang lig-on ug maalamon. Iyang nakat-unan nga gitabangan siya isip presidente sa korum sa klaro ug tataw nga panumduman kabahin sa kaugalingon niyang panginahanglan sa miaging duha ka tuig. Ang hagit sa iya nga pagpangulo ug sa atoa moabut kon kana nga mga panumduman molubad ug magkahanaw tungod sa dagan sa panahon ug sa atong kalampusan.

Si Pablo nakakita tingali nianang kakuyaw sa pagtambag sa iyang mas manghud nga kompanyon sa priesthood, nga si Timoteo. Siya miawhag ug mitudlo kaniya sa kaugalingon niyang pagpangandam sa priesthood ug sa pagtabang sa Ginoo sa pag-andam sa uban.

Paminawa usay gisulti ni Pablo kang Timoteo, nga mas manghod niya nga kompanyon:

“Ayaw itugot nga adunay magatamay kanimo tungod sa imong kabatan-on; hinonoa alang sa mga magtotoo pagkinabuhi ingon nga panig-ingnan, sa sinultihan, ug sa paggawi, sa gugma, sa pagtuo, sa kaputli.

“Kugihi ang pagbasa sa kasulatan ngadto sa kapunongan, ug ang pagmaymay, ug ang pagpanudlo, hangtud sa akong pag-anha diha.

“Ayaw pasagdi ang hiyas nga anaa kanimo, nga gikahatag kanimo pinaagi sa gipamulong nga propesiya, inubanan sa pagpandong kanimo.… 

“Tagda ang imong kaugalingon, ug ang imong pagpanudlo;¹ magpadayon ikaw niini: kay sa pagbuhat mo sa ingon pagaluwason mo ang imong kaugalingon, ug ang mga magapatalinghug kanimo.”²

Si Pablo mihatag og maayong tambag alang natong tanan. Ayaw og kabalaka kon sa inyong hunahuna dili kamo eksperyensyado apan hunahunaa, uban sa tabang sa Ginoo, kamo mamahimo.

Ang doktrina nga giawhag ngari kanato ni Pablo sa atong pagbusog sa pagpangandam sa priesthood mao ang mga pulong ni Kristo ug mahimong takus sa pagdawat sa Espiritu Santo. Dayon kita makahibalo kon unsay gusto sa Ginoo nga ipabuhat kanato sa atong pagserbisyo ug makadawat og kaisug sa paghimo niini, bisan unsa pa ang kahimtang nga atong atubangon sa umaabut.

Giandam na kita alang sa pagserbisyo sa priesthood nga mahimong mas mahagiton inig-abut sa panahon. Sama pananglit, ang atong mga braso ug mga utok matigulang sama nato. Ang atong kapasidad sa pagkat-on ug paghinumdom sa atong mga nabasa mokunhod. Sa paghatag og serbisyo sa priesthood ang Ginoo naglaum nga kita mohimo og dugang pa gayud nga pagdisiplina matag adlaw sa atong kinabuhi. Kita makaandam niana nga pagsulay pinaagi sa pag-ugmad og hugot nga pagtuo pinaagi sa pagserbisyo samtang nagpadayon kita.

Ang Ginoo mihatag kanato og oportunidad sa pag-andam pinaagi sa butang nga Iyang gitawag og “ang panumpa ug pakigsaad [sa] priesthood.”³

Usa kini ka pakigsaad nga atong himoon uban sa Dios sa pagsunod sa tanan Niya nga mga sugo ug paghatag og serbisyo sama sa Iyang ihatag kon ania pa Siya dinhi. Ang pagsunod niana nga mga sumbanan kutob sa atong mahimo nag-ugmad og espirituhanong kalig-on nga atong kinahanglanon sa paglahutay sa katapusan.

Ang maayo kaayong mga tigbansay mipakita kon unsaon nako sa pagtukod niana nga kalig-on: kini mao ang paghulma og usa ka kinaiya nga batukan ang pagkaluya ug kahadlok nga mag-agni kaninyo sa paghunong. Ang epektibo nga mga magtutudlo sa Ginoo mipakita nako nga ang pagpabilin sa espirituhanong gahum naggikan sa paglatas sa dapit diin ang uban mipahulay.

Kamo bantugang mga lider sa priesthood nga nag-ugmad nianang espirituhanong kalig-on sa inyong kabatan-on aduna pa gihapon niini samtang ang pisikal nga kalig-on magkaluya.

Ang akong manghud nga lalaki didto sa gamayng siyudad sa Utah nagnegosyo. Nakadawat siya og tawag sa telepono sa hotel nga gikan ni Presidente Spencer W. Kimball. Gabii na kaayo kadto human sa kapoy kaayo nga trabaho sa akong igsoon ug labaw pa kang Presidente Spencer W. Kimball, nga misugod sa pakigsulti sa telepono niini nga paagi. Miingon siya, “Akong nadunggan nga anaa ka karon sa lungsod. Kahibalo ko nga gabii na kaayo ug nga unta matulog ka na, apan makatabang ka ba nako? Nagkinahanglan ko nimo isip akong kompanyon sa pagsusi sa kahimtang sa tanang chapel niini nga siyudad.” Ang akong igsoon mikuyog kaniya nianang gabhiona, kulang sa kahibalo kabahin sa pagmentinar og mga chapel o bisan unsa mahitungod sa mga chapel ug wala masayud nganong si Presidente Kimball mobuhat pa niining butanga human sa iyang kapoy nga adlaw o nganong nagkinahanglan man siya og tabang.

Mga katuigan ang milabay nakadawat ko og susama nga tawag didto sa usa ka hotel sa Japan. Ako ang bag-ong komisyoner sa edukasyon alang sa Simbahan nianang higayuna. Nahibalo ko nga si Presidente Gordon B. Hinckley didto sa maong hotel sa iyang assignment sa Japan. Akong gitubag ang bagting sa telepono nga mao pa lang gyud ang akong paghigda aron matulog, gikapoy sa pagbuhat sa tanan nga sa akong hunahuna kaya nakong buhaton.

Si Presidente Hinckley malipayong nangutana, “Nganong natulog na man ka nga nagbasa pa man ko sa dokumento nga atong ribyuhunon?” Busa mibangon ko ug mitrabaho bisan kon nahibalo ko nga si Presidente Hinckley makahimo ra og mas nindot nga pagribyu sa dokumento kay sa akong mahimo. Apan daw iyang gipabati nako nga nagkinahanglan siya sa akong tabang.

Si Presidente Thomas S. Monson, dapit sa katapusan sa hapit tanang miting, mangutana sa secretary sa Unang Kapangulohan, “Up to date ba ko sa akong trabaho?” Ug kanunay siyang mopahiyom inig tubag: “Oo, President, updated ka.” Ang makapahimuot nga pahiyom ni Presidente Monson naghatag kanako og mensahe. Makapahunahuna dayon ni nako, “Aduna pa ba koy angayng buhaton sa akong mga assignment?” Ug dayon mobalik ko sa akong opisina aron motrabaho.

Ang bantugang mga magtutudlo mipakita kanako unsaon pag-andam sa pagtuman sa panumpa ug pakigsaad kon ang panahon ug edad maghimo niining mas lisud. Sila mipakita ug mitudlo kon unsaon nako sa pagdisiplina ang akong kaugalingon sa pagtrabaho og mas maayo kutob sa akong mahimo samtang himsog ug lig-on pa.

Dili ko mahimong hingpit nga sulugoon matag oras, apan makapaningkamot ako nga makahatag og dugang nga paningkamot kutob sa akong mahimo. Tungod niana nga kinaiya nga naugmad og sayo, andam na ko sa mga pagsulay sa umaabut. Kamo ug ako mahimong andam uban sa kalig-on sa pagtuman sa atong panumpa ug pakigsaad nga makabuntog sa mga pagsulay nga siguradong moabut kon magkaduol na ang katapusan sa kinabuhi.

Akong nakita ang ebidensya niana diha sa miting sa Church Board of Education. Si Presidente Spencer W. Kimball nianang higayuna nakahatag og mga tuig sa pagserbisyo samtang nag-antus og sunod-sunod nga mga hagit sa panglawas nga si Job ra ang makasabut. Siya ang nangulo sa miting nianang buntaga.

Sa kalit lang, mihunong siya og sulti. Nalup-og siya sa iyang lingkuranan. Nagpiyong ang iyang mga mata. Ang iyang ulo midungoy. Naglingkod ko duol niya. Si Elder Holland naglingkod tupad namo. Kaming duha mibarug aron tabangan siya. Kay dili kami eksperyensyado sa mga emerhensya, nakahukom kami sa pag-alsa kaniya, sa gihapon naglingkod sa iyang lingkuranan, ngadto sa iyang opisina nga duol ra.

Nahimo siya namong magtutudlo nianang higayuna sa iyang kalisdanan. Ang matag usa namo nag-alsa sa matag kilid sa iyang lingkuranan, migawas kami sa kwarto nga mitinganan ngadto sa agianan padulong sa Church Administration Building. Mibuka og gamay ang iyang mga mata, makita nga nalipong gihapon, ug miingon, “O, palihug pag-amping. Ayaw pasakiti ang inyong mga buko-buko.” Samtang nagkaduol kami sa pultahan sa opisina, miingon siya, “O, lain ang akong gibati nga nakabalda ko sa miting.” Mga minutos human napasulod namo siya sa iyang opisina, sa gihapon wala mahibalo unsay iyang problema, mitan-aw siya kanamo og miingon, “Wala ba kamo makahunahuna nga kinahanglan mong mobalik ngadto sa miting?”

Milakaw kami ug nagdali-dali og balik, nagtuo nga ang among pag-adto didto gikinahanglan sa Ginoo. Si Presidente Kimball sukad sa iyang pagkabata mipugos sa iyang kaugalingon lapas pa sa iyang mga limitasyon sa paglahutay aron pagserbisyo ug paghigugma sa Ginoo. Kadto usa ka kinaiya nga lig-ong naestablisar nga anaa sa dihang siya nagkinahanglan niini. Andam siya. Ug busa nakatudlo ug nakapakita siya nato unsaon nga mahimong andam sa pagtuman sa panumpa ug pakigsaad, pinaagi sa makanunayong pagpangandam sulod sa mga katuigan pinaagi sa atong tanang kusog nga kon tan-awon daw gamayng mga buluhaton nga may gamayng mga sangputanan.

Ang akong pag-ampo mao nga unta kita motuman sa atong mga pakigsaad sa priesthood aron mahimong takus ang atong kaugalingon sa kinabuhing dayon ug ang mga tawo nga atong bansayunon. Ako mosaad ninyo nga kon kamo mohimo kutob sa inyong mahimo, ang Dios mopalambo sa inyong kalig-on ug sa inyong kaalam. Siya moandam kaninyo. Ako mosaad kaninyo nga kadtong inyong gipangbansay ug gipakitaan og ehemplo modayeg sa inyong ngalan sama sa ania kanako karon nga talagsaong mga tigbansay nga akong nailhan.

Ako mopamatuod nga ang Dios nga Amahan buhi ug nahigugma kaninyo. Siya nakaila kaninyo. Siya ug ang Iyang nabanhaw ug nahimaya nga Anak, nga si Jesukristo, mipakita sa walay kasinatian nga batang lalaki, nga si Joseph Smith. Ilang gisalig kaniya ang Pagpahiuli sa kahingpitan sa ebanghelyo ug ang tinuod nga Simbahan. Sila midasig kaniya dihang siya nagkinahanglan niini. Sila mipabati kaniya sa mahigugmaong pagpanton dihang kini modala na unta niya paubos aron siya mapataas. Sila miandam kaniya, ug Sila nag-andam nato alang sa kalig-on aron mopadayon paingon sa celestial nga himaya nga mao ang tumong ug tuyo sa tanang pagserbisyo sa priesthood.

Akong ibilin ninyo ang akong panalangin nga inyong mahibaloan ang mahimayaong oportunidad nga gihatag sa Dios kaninyo sa pagtawag ug pag-andam kaninyo sa pagserbisyo Kaniya ug sa pagserbisyo sa uban. Sa pangalan sa atong mahigugmaong lider ug magtutudlo, nga si Jesukristo, amen.