Ngaahi Fakataha Ako ʻa e Houalotú ʻi he Lea Faka-Pilitāniá mo e Lea Faka-Sipeiní he ʻInitanetí

Naʻe pehē ʻe Losemalī M. Uikisomú, ko e palesiteni lahi ʻo e Palaimelí, ʻi he lolotonga ʻo e ako maʻá e kau taki ʻo e Palaimelí he ʻaho 28 mo e ʻaho 29 ʻo Māʻasí, ko e taumuʻa ʻo e Palaimelí ke tokoniʻi ʻa e fānaú ʻi he hala ki he uluí.

Naʻá ne pehē, “ʻOku tau fie maʻu ʻa e [fānau Palaimelí] ke nau ongoʻi, ke nau ʻofa, ke nau ngāue. ʻOku tau fie loto ke nau maʻu haʻanau fakamoʻoni. … ʻOku ʻuhinga ʻa e fakamoʻoní ko e fanongonongo. ʻOku tau loto ke toe hoko atu ʻaki ha sitepu ʻe taha. ʻOku ʻuhinga ʻa e uluí ke ngāue. ʻOku tau fie maʻu e fānaú ni ke nau maʻu mo ongoʻi ʻa e fakaʻilonga ʻo e uluí ʻi heʻenau moʻuí.”

Naʻe fakahā ʻe Sisitā Uikisomu mo hono ongo tokoní, Siini A. Sitīveni mo Sēlati A. ʻEsipilini, ki he kau taki fakauooti mo fakasiteiki ʻo e Palaimelí te nau lava ʻo tokoni ki he mātuʻá ʻi hono fakatō e ngaahi fakaʻilonga ʻo e uluí. Naʻe pehē ʻe Sisitā Uikisomu ʻoku kamata ʻa e uluí ʻi he kei siʻí. “ʻOku kamata moʻoni ia ʻi ʻapi, ʻa ia ʻoku ʻofa ai ʻa e mātuʻá ki he ʻEikí ʻaki hona lotó kotoa, mo ʻena moʻuí kotoa, pea ʻaki hona iví kotoa. Peá na toki akoʻi leva ʻena fānaú.”

Naʻá ne pehē ʻe mahino ki he fānaú ʻa hono ʻuhinga ke uluí “kapau pē te tau tuku ha taimi ke akoʻi ai kinautolu.” Pea naʻá ne toe pehē, kapau he ʻikai akoʻi ʻe he mātuʻá mo e kau taki ʻo e Palaimelí kinautolu, “ʻe fakahoko ia ʻe he māmaní.”

Naʻe toe fakahoko foki ʻe he kau mēmipa ʻo e poate lahi ʻo e Palaimelí ha ngaahi ako ʻi hono fakaʻaongaʻi ʻo e hivá ke akoʻi ʻa e ngaahi tefitoʻi moʻoni ʻo e ongoongoleleí pea mo e ngaahi maʻuʻanga tokoni maʻá e kau taki ʻo e Palaimelí ʻoku maʻu ʻi he LDS.org.

Naʻe fakahā ʻe Sisitā Suli B. Peki ʻa ia naʻe tukuange mei he palesiteni lahi ʻo e Fineʻofá ʻi he fakataha hoʻatā ʻo e konifelenisí, ki he kau taki ʻo e Fineʻofá he lolotonga ʻo e ako fakahoualotu he ʻaho 27 mo e 28 ʻo Māʻasí, “Ko e ngāue ʻeni ʻa e ʻEikí. … ʻOku tau maʻu ha fatongia ʻoku mahuʻinga lahi.”

Naʻe fakamatala ʻa Sisitā Peki ki ha ngaahi tefito lahi, kau ai ʻa e ngaahi taumuʻa ʻo e Fineʻofá, ʻa e fatongia mahuʻinga ʻoku fakahoko ʻe he houʻeiki fafiné ʻi honau ngaahi fāmilí, akoʻí (tautautefito ki he houʻeiki fafine foʻou ʻo e Siasí), ngāue fakakōmití, mo e ngaahi tefitoʻi moʻoni ʻo e tuʻunga fakatakimuʻá.

Naʻe pehē ʻe Sisitā Peki, nofo pē ʻi he ngaahi tefitoʻi meʻá. “Ko ha ngāue faingofua, pea ʻe toki ʻomi ʻe he ʻEikí ʻa e ngaahi fakakaukaú ke mahino. Kapau te tau lava ʻo fakakaukauʻi ʻa e ngaahi meʻa ʻoku fie maʻu ke tau fakahokó, te Ne tokoniʻi kitautolu ke tau hiki mei he fakahaá ki hono fakahokó. Te tau maʻu ha fakahā ʻi hono fakahokó.”

ʻI hono kotoa ʻo ʻenau ngaahi akó, naʻe nofotaha pē ʻa e kau mēmipa ʻo e poate lahi ʻo e Fineʻofá ʻi he fekumi ki he ngaahi talí ʻi he Tohi Tuʻutuʻuni Fika 2: Ko Hono Puleʻi ʻo e Siasí pea pehē mo e Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá.

Ko e Laipeli ʻo e Ako Fakatakimuʻá, ʻa ia ko ha konga foʻou ʻi he LDS.org, ko ha konga mahuʻinga ia ʻi he fakataha ako fakatakimuʻa ʻa e houalotu Lautohi Faka-Sāpaté ne fakahoko he ʻaho 28 ʻo Māʻasí.

Naʻe huluʻi ha fanga kiʻi konga vitiō kehekehe mei he laipelí ke poupouʻi hono aleaʻi ʻo e meʻa naʻe naʻe pehē ʻe Lāsolo T. ʻOsikāfope, ko e palesiteni lahi ʻo e Lautohi Faka-Sāpaté, ko e tefitoʻi taumuʻa ʻe fā ʻi he fakatahá:

• Ko e fatongia ʻo e taki Lautohi Faka-Sāpate he uōtí pe siteikí.

• Founga ke tokoniʻi ai ha niʻihi ke mahino e fatongia ʻo e kau palesitenisī ʻo e Lautohi Faka-Sāpaté ʻi hono fakaleleiʻi ʻo e faiakó ʻi he ngaahi houalotu kotoa ʻo e uōtí mo e siteikí.

• Founga ke fealēleaʻaki lelei fakataha ange ai ko e kau palesitenisií.

• Founga ke fakataukeiʻi ai ʻa e kau faiakó mo fai maʻu pē ha poupou ʻoku ʻaongá.

Naʻe pehē ʻe Tēvita M. Makongikī, ko e tokoni ʻuluaki ʻi he kau palesitenisī lahi ʻo e Lautohi Faka-Sāpaté, “Te mou fakatokangaʻi, ko e Laipeli ʻo e Ako Fakatakimuʻá ʻe hoko ia ko e taha ʻo e ngaahi meʻangāue mahuʻinga taha ʻokú ke maʻu ke tokoni ʻi hono akoʻi ʻo e kāingalotu ʻo e ngaahi houalotu kehé pea mo e Lautohi Faka-Sāpaté ʻi honau ngaahi fatongiá. Naʻe teuteu ʻa e laipelí ʻe he ngaahi houalotu kotoa ʻi he Siasí, ʻe he kau mēmipa ʻo e Kau Fitungofulú, [mo e] kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. Ko ha ngāue ʻeni kuo lauitaʻu, pea kuó ne mafola ʻi ha ngaahi konitinēniti lahi.”

ʻE lava ke maʻu ʻa e laipelí ʻi he LDS.org ʻaki haʻo fua lomiʻi ʻi he Menu ʻi he peesi ʻuluakí pea toki lomiʻi ʻi he Leadership Training Library ʻi he fehokotakiʻanga ko e Service.

Naʻe pehē ʻe ʻIleini S. Tolotoni, ko e palesiteni lahi ʻo e Kau Finemuí, ʻi he lolotonga ʻo e ngaahi fakataha ako ʻa e houalotu ʻo e Kau Finemuí he ʻaho 27 mo e 28 ʻo Māʻasí, “Kuo teʻeki liliu ʻa e tūkunga ʻo e moʻuí, ka kuo ʻosi liliu ʻa māmani ia.” Naʻá ne poupouʻi ʻa e kau takí ke “liliu ʻa māmani” ʻaki ʻenau hoko ko ha sīpinga lelei ʻo e moʻui angamaʻá.

Naʻá ne pehē, “ʻOku ʻikai uiuiʻi noa pē kimoutolu. ʻE hanga ʻe homou fōtungá, teuteú, mo hoʻomou malimalí ʻo uesia ʻa e kau finemui ko ʻení … ʻi hoʻomou nofo pea akoʻi kiate kinautolu ʻa e fiefia ʻo e hoko ko ha finemuí mo moʻui ʻaki ʻa e ongoongoleleí. … Kuo pau ke tau anga molumalu. Kuo pau ke tau tokanga. ʻOku fie maʻu ke tau faiako ʻaki e tā-sīpinga pea mo e ʻofa lahi.”

Naʻe lea ʻa e ongo tokoni ʻi he kau palesitenisī lahi ʻo e Kau Finemuí, ʻa Mele N. Kuki mo ʻAna M. Tipi, ʻi hono mahuʻinga ʻo e “tuku ki he Loumailé ke takí.” Naʻe fakaʻaongaʻi ʻe he ongo tokoní ʻa e Kemi ʻa e Kau Finemuí—ʻa ia ʻokú ne fakamanatua hono taʻu 100 he taʻu ní—ko ha sīpinga ʻo ha faingamālie ke tuku ai ʻa e Loumailé ke taki, ka naʻá ne pehē ʻoku ʻi ai maʻu pē ha ngaahi faingamālie ke vahevahe ai ʻe he kau takí ʻa e ngaahi fatongiá, ʻo fakaʻatā ai ʻa e kau finemuí ke nau kau.

Naʻe toe tokanga foki ʻa e kau leá ki he ngaahi maʻuʻanga tokoni kehekehe—ʻo e uepisaití, ngaahi fakamatalá, vitioó, ngaahi tohi lēsoní, pea mo e kiʻi tohi Ki Hono Fakamālohia ʻo e Toʻu Tupú naʻe toki fakaleleiʻí—ʻa ia ʻoku ʻatā ki he kau takí ke nau maʻu mei ai ha ngaahi fakakaukau mo ha tokoni.