Pīsope Dean M. Davies

Ko e taimi ʻoku ʻeke ai ʻe he Palesiteni ʻo e Siasí kia Pīsope Tiini Tēvisi ʻa e fakaikiiki fekauʻaki mo ha tuʻunga ʻo ha temipale, hangē ko e mamaʻo ʻo e luelue mei he tauʻanga pasi ofi tahá, ʻoku ʻikai fakamatalaʻi ʻe Pīsope Tēvisi ia ha ngaahi moʻoniʻi meʻa pē. ʻOkú ne ʻiloʻi tonu ʻa e meʻa ʻoku foua ʻe he pataloní he naʻá ne lue lalo he hala ko iá.

Naʻe fehuʻi ange ʻe Palesiteni Kōtoni B. Hingikelī ʻi ha meʻa ʻe taha, “ʻOku anga fēfē hoʻo fai iá?”

Ko e founga ʻoku moʻui ʻaki ʻe Pīsope Tiini Mailoni Tēvisí—ʻa ē naʻe toki ui foʻou ke Tokoni Ua ʻi he Kau Pīsopeliki Pulé—ko e līʻoa mo e tokanga taha ki he ngaahi fakaikiikí.

Naʻe fāʻeleʻi ʻa Pīsope Tēvisi ʻi Sōleki Siti, ʻIutā ʻi he USA, ʻi Sepitema 1951 kia ʻŌliva T. pea mo Maila Tēvisi, pea naʻe ohi hake ia ʻi ha fāmili naʻe hoko ai ʻa e ʻofá mo e ngāué ko e ongo tefitoʻi moʻoni. Kapau naʻá ne fie maʻu ha meʻa, naʻe pau ke ne ngāueʻi ia. Ko e taimi naʻe ʻikai ola ai ʻene kole taʻetuku ki heʻene faʻeé ke maʻu ha meʻavaʻinga naʻe fuoloa ʻene fakaʻamuá, naʻá ne fakakaukauʻi leva ʻene ngaahi meʻa ke faí. ʻOkú ne kei manatuʻi pē ʻa e ongosia fakaesino pea mo e fiefia ne maʻu ʻi hono teke ha mīsini kosi motuʻa he musie loloa ʻo ha kaungāʻapi.

Hili ʻene ngāue ʻi he Misiona ʻUlukuai/Palakuaí mei he 1970 ki he 1972, naʻe foki leva ʻo mali mo Tala Sēmisi, ko hano maheni mei heʻene kei ʻi he toʻu tupú, ʻi Sune 1973 he Temipale Sōlekí. Naʻe maʻu e mataʻitohi BA ʻa Pīsope Tēvisi ʻi he ngoue fakaʻekonōmiká mei he ʻUnivēsiti Pilikihami ʻIongí he 1976 pea mo toe ako ki he tuʻunga fakapulé kimui ange ʻi he ʻUnivēsiti Sitenifōtí mo e ʻUnivēsiti Tokelau-hihifó (Northwestern).

ʻI he ngaahi taʻu kuo maliu atú, ne nofo ai mo hono uaifí pea mo ʻena fānaú ʻe toko nima ʻi ha siteiti ʻe ono he naʻe fekauʻaki ʻene ngāué mo e fakatau kelekelé. Naʻá ne hoko ko ha palesiteni fakasiteiki, tokoni ʻi he kau palesitenisī fakasiteikí, kau ʻi ha fakataha alēleaʻanga ʻe nima, kau ʻi ha kau pīsopeliki, pea mo ha ngaahi fatongia fakauooti kehekehe. Naʻe toe hoko foki ko e palesiteni ʻo e Misiona Pueto Liko Seni Uaní mei he 1998 ki he 2001. ʻI he taimi ne hoko ai hono ui fakamuimui tahá, naʻe ngāue ko ha talēkita fakahoko ngāue ʻa e Potungāue ʻo e Ngaahi Ngāue Makehe ʻa e Siasí (Churchʻs Special Projects Department).

ʻOku kau ʻi he ngaahi meʻa mahuʻinga kuó ne aʻusiá ʻa e “ʻofa ʻa e ʻEikí mo tataki ʻEne fānaú.”