2012
ʻEletā Craig A. Cardon
Mē 2012


ʻEletā Craig A. Cardon

ʻO e Kau Fitungofulú

ʻĪmisi
ʻEletā Craig A. Cardon

Naʻe fakamoʻoni ʻa ʻEletā Kuleki ʻĀlani Kātoní, ʻa ia naʻe toki ui ki he Kōlomu ʻUluaki ʻo e Kau Fitungofulú mei he Kōlomu hono Uá, ki he kau ʻa e ivi takiekina ʻo e Laumālié ʻi he ngaahi meʻa lelei kotoa pē ʻi heʻene moʻuí.

Naʻá ne pehē, “Naʻe tokoniʻi au heʻeku faʻeé mo ʻeku tamaí ʻi heʻeku kei siʻí ke u kamata fakatokangaʻi e leʻo ʻo e Laumālié mou ʻiloʻi ʻa e meʻa naʻá ku ongoʻí. ʻOku ʻatā ʻa e fetuʻutaki ko ia mei he ʻEikí ki he taha kotoa pē ʻoku fekumi faivelenga ki aí pea ʻoku mahuʻinga ia ʻi he ngāue maʻongoʻongá ni.”

Hili e ngāue fakafaifekau ʻa ʻEletā Kātoni ki ʻĪtalí, naʻá ne mali leva mo Tēpola Luʻisi Teina ʻi Nōvema 1970 ʻi he Temipale Mesa ʻAlesoná. Hili mei ai ha taʻu ʻe 13, ne hoko ʻa ʻEletā Kātoni ko e palesiteni ʻo e Misiona ʻĪtali Lomá. ʻI he taimi ko iá, kuo ʻosi fāʻeleʻi ha toko fitu ʻo ʻena fānau ʻe toko valú pea naʻa nau fakaholoholo mei he māhina ʻe hivá ki he taʻu 11.

Naʻe pehē ʻe ʻEletā Kātoni, “ʻOku fakamatalaʻi ʻe he meʻa pē ko iá ʻe taha ʻa Sisitā Kātoni. Kuo hoko ʻene tuí, ʻofá, faʻa-kātakí, mo ʻene angaʻofá ko ha tāpuaki fakaofo kiate au, ki homa fāmilí, pea mo kinautolu kotoa ʻoku nau ʻiloʻi iá.”

Mei he 2006 ki he 2011, naʻe ngāue ai ʻa ʻEletā Kātoni ʻi he Kau Palesitenisī Fakaʻēlia ʻo ʻAfilika Hihifó, ko ha meʻa ʻokú ne fakamatalaʻi ko ha “tāpuaki fakaofo ke ngāue ʻi he lotolotonga ʻo ha kakai naʻá na ʻofa mamae ki ai.”

Naʻe līʻoa ʻe ʻEletā Kātoni ha konga lahi ʻo hono taimí ʻi heʻene moʻuí ki he ngāue tokoni ʻofá mo e ngaahi kautaha fakavahaʻa puleʻanga ki he fāmilí mo e toʻu tupú.

Naʻe fāʻeleʻi ʻa ʻEletā Kātoni kia Uilifooti Palati mo Vīlate ʻĀlani Kātoni ʻi Mesa, ʻAlesona ʻi he USA, ʻi Tīsema 1948. Hili hono maʻu hono mataʻitohi BA ʻi he tauhitohí mei he ʻUnivēsiti ʻo e Siteiti ʻAlesoná, naʻe ngāue pē ʻiate ia ʻi ha ngaahi meʻa fakapisinisi lahi. Naʻá ne maʻu ki mui hono MPA mei he Akoʻanga Kenetií ʻi he ʻUnivēsiti Hāvatí.

Kimuʻa pea toki ui ko ha Taki Māʻolungá, naʻe hoko ko ha palesiteni he kōlomu ʻo e kaumātuʻá, faifekau fakasiteiki, palesiteni fakamisiona, pīsope, palesiteni fakasiteiki, faiako ʻo e Tokāteline ʻo e Ongoongoleleí, mo ha faiako ʻinisititiuti.

Naʻe pehē ʻe ʻEletā Kātoni, “ʻOku tānaki ʻe he ʻEikí ʻa ʻEne fānaú ʻi he funga ʻo e māmaní. Tatau ai pē pe ko e hā e ngaahi tūkung fakafoʻituituí, ʻoku feʻunga ʻa e ʻaloʻofa ʻa Sīsū Kalaisí ki he taha kotoa pē ʻoku haʻu kiate Iá.”