2012
ʻEletā Richard J. Maynes
Mē 2012


ʻEletā Richard J. Maynes

ʻO e Kau Palesitenisī ʻo e Kau Fitungofulú

ʻĪmisi
ʻEletā Richard J. Maynes

Naʻe pehē ʻe ʻEletā Lisiate Sione Meini, naʻe toki ui foʻou ki he Kau Palesitenisī ʻo e Kau Fitungofulú, “Ko e taha kotoa pē he funga māmaní ko ha fānau ʻa e ʻOtuá, pea ʻoku ʻofa tatau ki Heʻene fānaú kotoa.” Naʻá ne pehē ko e ʻuluaki tefitoʻi moʻoni ia ʻoku haʻu ki heʻene fakakaukaú ʻi heʻene fakakaukau loto ki heʻene ngāue lahi fakavahaʻa puleʻangá, kau ai mo haʻane ngaahi ngāue ki ʻUlukuai, Palakuai, Mekisikou, ʻEkuatoa, Pelū, pea mo e ʻOtu Filipainí.

Naʻá ne toe pehē, “Ko e ngaahi tāpuaki taʻengata ʻoku maʻu mei hono tali mo moʻui ʻaki e ngaahi tefitoʻi moʻoni naʻe akoʻi ʻe Sīsū Kalaisí te ne hākeakiʻi e fānau kotoa ʻa e Tamai Hēvaní, tatau ai pē pe ʻoku nau nofo ʻi fē pe ko e hā ha faingataʻa ʻoku nau fehangahangai mo ia ʻi he tuʻunga fakataimi ko ʻení.”

Naʻe kamata ʻa e ngāue fakavahaʻa puleʻanga ʻa ʻEleltā Meiní, ʻa ia naʻe fāʻeleʻi ʻi ʻOkatopa ʻo e 1950 ʻi Pēkilī ʻi Kalefōnia, kia Siteni mo Peti Meini, ʻi he 1969, ʻi he taimi naʻe hoko ai ko e faifekau taimi kakato ki Palakuai mo ʻUlukuai ʻo aʻu mai ki he 1971.

Naʻá ne mali mo Nenisī Pēlingitoni ʻi he Temipale Manitai ʻIutaá, ʻa ia naʻá na fetaulaki lolotonga ʻene ngāue ʻi ha hōtele ʻi ʻAitahō ʻi ʻAokosi 1974. ʻOku ʻi ai haʻana fānau ʻe toko fā.

Naʻe ʻosi ʻi he taʻu tatau pē ʻa ʻEletā Meini mei he ʻUnivēsiti Pilikihami ʻIongí ʻi he puleʻi ʻo e meʻa fakapisinisí pea toki maʻu ki mui ange hono MBA mei he Thunderbird School of Global Management. Naʻá ne hoko ʻi heʻene ngāue maʻuʻanga moʻuí ko e taha ʻoku ʻi ai ʻene kautaha pea mo toe ʻOfisa Pule (CEO) ʻo e kautaha naʻe nofotaha ki he fakafehokotaki ʻo e ngāue he falengāué (factory automation).

Naʻe hoko ʻa ʻEleltā Meini ko e palesiteni ʻo e Misiona Mekisikou Moniteleí mei he 1989 ki he 1992. Naʻe ui ia ko ha Taki Māʻolunga ʻi he 1997. Talu mei ai mo ʻene ngāue ʻi he Kau Palesitenisī ʻo e ʻĒlia Saute ʻAmelika Tokelau-hihifó, ʻĒlia Saute ʻAmelika Hihifó, mo e ʻĒlia ʻOtu Filipainí. Naʻe ʻosi ngāue foki ʻi he Fakataha Alēlea Pule ʻo e Lakanga Fakataulaʻeiki ʻo e Siasí, hoko ko ha Tokoni Talēkita Pule ʻi he Potungāue Ngāue Fakafaifekaú, pea mo e Talēkita Pule ʻo e Potungāue Hisitōlia Fakafāmilí.

Naʻe ui ia ʻi he ʻaho 20 ʻo Sānuali 2012, ke kau ʻi he Kau Palesitenisī ʻo e Kau Fitungofulú, ʻo fetongi ʻa ʻEletā Sitīveni E. Sinou, ʻa ia naʻe ui ke hoko ko e Faihisitōlia mo e Tauhi Lekooti ʻo e Siasí.