ʻEletā Stanley G. Ellis

Naʻe ʻilo ʻe ʻEletā Sitenilī Sēleti ʻĒlisi he ʻikai lava ʻe ha taha ʻo fakamoʻoniʻi ʻoku ʻi ai ha ʻOtua ʻaki e ngaahi founga fakasaienisí, ka naʻá ne ʻilo ʻi he ʻUnivēsiti Hāvatí te ne lava ʻo fakamoʻoniʻi ʻa e ʻOtuá ʻaki haʻane ʻahiʻahiʻi ʻEne ngaahi talaʻofá. Naʻe vaeua pē hono ʻuluaki taʻú he akó, kuo ʻikai ke toe ʻi ai haʻane paʻanga pea kumi ngāue leva ke tokoni ʻi hono totongi ʻene ngaahi fakamolé. Neongo naʻe ʻikai tui ʻe lava ʻo totongi vahehongofulu pea mo kei totongi kotoa ʻene ngaahi fakamolé, ka naʻá ne pehē ke ne “siviʻi” ʻa e ʻEikí (vakai, Malakai 3:10).

Naʻe pehē ʻe ʻEletā ʻĒlisi, ʻa ia ne toki uí ni mei he Kōlomu hono Ua ʻo e Kau Fitungofulú ki he Kōlomu ʻUluakí, “Naʻá ku ʻuluaki totongi ʻeku vahehongofulú, pea naʻe hoko ha mana. Naʻá ku aʻu ki he vahe hono hokó. Pea naʻe hoko ia ʻi he uike ʻe ua kotoa pē ʻi he faʻahitaʻu fakaakó kotoa. ʻI heʻeku siviʻi ko ia ʻa e ʻEikí, naʻá ku fakamālohia ai ʻeku fakamoʻoni ʻoku moʻoni pea ʻokú Ne tauhi ʻEne ngaahi talaʻofá.”

Naʻe fāʻeleʻi ʻa ʻEletā ʻĒlisi kia Sitīveni pea mo Heisolo ʻĒlisi ʻi Sānuali 1947 ʻi Pēlī, ʻAitahō ʻi he USA, pea tupu hake ʻi ha ngoueʻanga pea mo ha faama. Hili hano taʻu ʻe taha ʻi Hāvati, ne ngāue fakafaifekau leva ʻi he Misiona Palāsilá mei he 1966 ki he 1968. Naʻá ne mali mo Kefilini Kolopefā ʻi Sune 1969 ʻi he Temipale Losi ʻEniselisi Kalefōniá, hili ʻene foki maí. ʻOkú na hoko ko ha mātuʻa ki ha fānau ʻe toko hiva.

Hili ʻene ʻosi mei Hāvatí, ʻa ia ne maʻu mei ai hono mataʻitohi BA ʻi he meʻa fakapuleʻangá, naʻá ne toe maʻu hano mataʻitohi lao mei he ʻUnivēsiti ko Pilikihami ʻIongí. Naʻe ngāue ʻa ʻEletā ʻĒlisi ʻi he palani ʻo e tukuhaú pea hoko ko ha ʻōfisa pule ʻo ha kautaha faleʻi fakapaʻanga.

Kimuʻa pea ui ki he Kōlomu ʻUluaki ʻo e Kau Fitungofulú, ne kau ʻa ʻEletā ʻĒlisi ʻi he kau palesitenisī ʻo e ʻĒlia Tonga-hihifo ʻo ʻAmelika Noaté, ʻĒlia Palāsila Noaté, ʻĒlia Palāsilá, pea ʻi he Kōmiti ʻo e Kau Takí ki he Liliu ʻo e Ngaahi Ngataʻangá. Mei he 1999 ki he 2002, naʻe hoko ai ko e palesiteni ʻo e Misiona Palāsila Sao Paulo Noaté. Naʻe ʻosi hoko foki ko ha palesiteni fakasiteiki, tokoni ʻi he kau palesitenisī fakasiteikí, aleaʻanga māʻolunga, tokoni ʻi ha kau pīsopelikí, palesiteni he kōlomu ʻo e kaumātuʻá, mo ha palesiteni ʻi he Kau Talavou he uōtí mo e siteikí.