Faamanatuina o se Aso o Auaunaga

Sa faamanatuina e tagata o le Ekalesia i Lonetona le [75] tausaga e ala lea i le fesoasoani e faamama ia Tottenham, o se aai lea na oo i ai fetauaiga ia Aokuso o le 2011. I se paka mo tagata lautele, sa vele ai e volenitia le vao, fai ni togalaau, ma faamama le lapisi.

Sa auauna atu foi tagata o le ekalesia i falemai o tamaiti, lea sa latou faamamaina ai alasavali o togalaau ma faamatagofie ia lotoa o falemai mo tamaiti ma o latou aiga. Sa fesoasoani ia Salote Ilera e faamaopoopo le galuega faatino. O se galuega faigata tele, ae o se galuega faafiafiaina tele foi,” na ia fai mai ai. “E oo lava i sina mea itiiti e pei o le saluina e mafai lava ona avea o se faamanuiaga. E te le manaomia ona i ai ni tomai sili. Tau lava o nai mea iti e mafai lava ona faia ai se eseesega i isi tagata.”

Sa faasoa mai e Rudi Siamupeni ona manatu e uiga i le musumusuga sa i tua atu o le valaaulia a le Au Peresitene Sili ia auauna atu: “Ou te manatu o lenei faaaliga o le tuufaatasia lea o i tatou—ia aumai i tatou i le nuu, ia feiloai ai ma tagata fou.” Sa ia faaauau, “O le vaaia o le Ekalesia o auai i faiganuu o se mea matagofie. O le avea ai ma sona vaega e sili atu ona faapitoa lena. Ua faamalosia ai la’u molimau, ma ua ou maua ai le manao e fai nisi mea.”

Sa talosagaina e taitai matutua o le autalavou i le Siteki a Hong Kong i Saina le aufono a le autalavou ia filifili a latou lava galuega fesoasoani. Ina ua maea ona tagatagai le autalavou i manaoga a o latou nuu, sa latou filifili loa e aoao ia tamaiti mai aiga e maualalalo tupe maua i se aoga i le lotoifale. Pe a ma le 125 talavou sa aoaoina le silia ma le 80 tamaiti aoga e uiga i le atiina ae o taleni, faia o meaai maloloina, faia o faatasiga faaleaiga, ma le amataina o faigauo moni.

“Sa le na o se aafiaga e tasi se taimi e tupu ai,” sa fai mai ai Anita Shum, o le peresitene o Tamaitai Talavou a le siteki. “O mea sa faia e le autalavou i tamaiti e mafai ona i ai se aafiaga tumau.” Sa ia faaopoopo mai ua i ai nei i le autalavou ni mea lelei e manatuaina ma ni aafiaga o le a faamanuiaina ai i latou e faavavau.

Sa auai tagata o le ekalesia i Accra, Ghana, i se aso o auaunaga i le valiina o faleaoga, saluina o alatele ma alavai, ma faamama ia lotoa faataamilo i falemai ma fale tausi soifua.

Sa i ai Ema Ovusu Anasa o le Siteki a Accra Ghana Christiansborg i le fuafuaina o la latou aso o auaunaga. “O le o mai faatasi o tagata o le Ekalesia ua tuufaatasia ai i matou ma faafaigofie ai ona usitaia se mataupu faavae e pei o le auauna atu,” sa ia fai mai ai. I le faaiuga o le galuega faatino, sa potopoto ai tagata e fefaasoaai a latou molimau. Sa fai mai ia Sister Anasa, “Ina ua uma ona faalogo atu i molimau taitasi, sa ou iloa ai le tele o mea tatou te misia pe a le auauna atu i isi.”

Ina ua tuuina mai e Peresitene Henry B. Eyring, o le Fesoasoani Muamua i le Au Peresitene Sili, le valaaulia ia auai i se aso o auaunaga, sa ia saunoa i le aafiaga tuufaatasi o le a i ai i galuega faatino: “O se … mataupu faavae o le talalelei o loo avea pea ma se taiala ia te au i le galuega faaleuelefea, o le mana lea ma faamanuiaga o le lotogatasi. A tuu faatasi o tatou lima e auauna atu ai i tagata e i ai manaoga, e tuufaatasia e le Alii o tatou loto.”¹

E ui lava na timuga se aso ia Oketopa, ae 1,601 tagata o le Au Paia o Aso e Gata Ai mai siteki e lima i Córdoba, Atenitina, sa ofoina atu ni itula tuufaatasi se 10,234 o auaunaga i se nofoaga mo tagata matutua. Sa muai tiliva atu e tagata o le au paia ia lavalava, meaai, ma pusa o mea mo togafitiga faafomai. Sa latou faia foi togalaau, vali puipui ma nofoa uumi, ma faatino ia faaaliga taleni. Sa ofofua atu foi e ni tuafafine ni auaunaga mo le tausiaina o lauao, vae ma lima.

“Ou te iloa o lena galuega fesoasoani o se fesoasoani sa le gata mo i latou ae faapena foi mo au,” sa fai mai ai ia Rocío B. e 14 tausaga le matua ina ua maea le galuega fesoasoani. “Na ou iloa sa ou faia le mea sa’o ma sa fiafia le Tama Faalelagi ia te au.”

Sa musuia tagata o le Siteki a São Paulo Pasila e ao le suka, ga’o, araisa, ma pi ma foai atu meaai i ni faalapotopotoga lima foai se lua. Ona latou aoaoina lea o sui mai faalapotopotoga lima foai i vaega faavae o le teuina o meaai. Sa ofofua atu foi e tagata o le siteki e tuu atu ni aoaoga tau i a’oga, mea tau tupe, ma galuega i tagata o le siteki ma le nuu e fesoasoani ai ia i latou ia atiae ni tomai e talafeagai e tauva ai mo ni galuega e avanoa.

“Sa fiafia lava le nuu na matou valaaulia i le galuega a le Ekalesia. E toatele latou te le i iloaina i matou, ae na latou o ese atu ma ni lagona lelei,”sa fai mai ai le tagata o le siteki o Kátia Ribeiro. “Sa i ai i tagata o le au paia se agaga o le lotogatasi ma le auauna atu, ma sa i ai i tagata sa tuu atu i ai le auaunaga se agaga o le lotofaafetai loloto.”

Sa lagona e tagata o le Falls Church, Virginia, ISA, le olioli o le auauna atu faatasi i nofoaga e lua o tagata ua leai ni aiga. O le fufuluina o se puipui, sa ta’u atu ai e Adeana Alvarez i se tagata o le uarota, “sa faanoanoa lava lo’u vaiaso, ma sa manaia le faalogoga i le aveesea o le faanoanoa i lenei puipui! Tatou te manaomia uma lava se auaunaga i nisi taimi i o tatou olaga, ma e lelei le faia mo isi tagata.”

Sa faapea mai se isi tagata o le uarota, o Anne Sorensen, “O se ala sili lea e fesootai ai ma lou nuu. Ua ou lagonaina nei le saofagā atili atu i le mea o loo tupu i lena faalapotopotoga. O taimi uma lava ou te pasia ai iinei, o le a ou mafaufau i tagata o auai i vasega iinei ma faamoemoe o le galuega sa matou faia e tuu atu ai ia i latou se ala e vaaia, e lagona ai e le o tuua na o i latou i mea o latou faia e faaleleia ai o latou olaga.

I se aoga maualalo i Tokorozawa, sa faia ai e tagata o le Ekalesia se semina i le teuina o meaai i matua ma faiaoga e 50. Ona o le mafuie ia Mati 2011, sa naunau ai tagata o le nuu e aoao ia auala e saunia ai mo faalavelave faafuasei, aemaise lava le auala e tuufaatasi ai se sapalai o meaai mo se taimi umi.

“E ui lava sa tupu le mafuie tele i sasae o Iapani, ae ou te lei faia lava se mea e sauni ai,” sa fai mai ai se tasi o tagata auai. “Sa ou fiafia lava sa mafai ona ou aoaoina lenei mea. Ou te fia maua se nofoaga e teu ai meaai, ma ou te fia manao e fai lenei mea e puipui ai lo’u aiga pele.”

Sa matauina e Akihito Suda o se tagata o le Siteki a Musashino Iapani e faapea na pai atu le malamalama o Keriso i le nuu a o faaali atu e tagata o le siteki ia sauniuniga sa latou faia pe a tulai mai se faalavelave. “O Keriso o le Malamalama o le Lalolagi,” sa ia fai mai ai. “O Ana aoaoga ua faamalamalamaina ai le nuu.”

Sa faaalu e tagata o le Ekalesia i Tallinn se aso e fesoasoani ai i tagata o le nuu o loo manaomia se fesoasoani i le faatinoina o galuega faaleleia i o latou fale. Sa tata e nisi o tagata na auai ia fafie ma asu le malala, a o faamama e isi ia kapeta, sui ie faamalama, ma fufulu faamalama ma puipui.

Sa malaga atu ia Maila Chan ma lona aiga e asiasi i se tina matua ma tata fafie mo ia. “I le avea ai o se tina ua ou fiafia lava ua maua e lo matou aiga sea aafiaga matagofie,” sa ia fai mai ai. “E maeu lava lena mea a o auauna atu i isi, e galo atoa ia te oe ou lava faafitauli. Ou te iloa a o auauna atu i isi, o lo tatou auauna atu lava lena i lo tatou Atua.”

Sa matauina foi e Makita Timakovu, “O le tuueseina o o’u lava tiute ma tuuto atoa atu a’u lava ia e fesoasoani i se tagata, sa ou malamalama ai i le mea moni o loo i ai i le mana o le ositaulaga. E le manaomia ona tatou fesili pe aisea, pe faamata foi sa mafai ona tatou faia se isi mea. Tau lava o lo tatou aapa atu ma fesoasoani atu. Tatou te fesoasoani atu ona tatou te alolofa. Tatou te fesoasoani atu ona tatou te fia mananao e mulimuli i le faataitaiga a Keriso.”

O molimau a i latou na auauna atu i o latou nuu i le lalolagi atoa ua aoao ai i tatou e faapea e ala i le auauna atu, e tuputupu ae ai a tatou molimau ma tatou lagona atili ai lo tatou lelei. Sa faamautu mai e Peresitene Eyring e faamanuiaina i tatou mo a tatou auaunaga: “Ou te faafetai atu mo le Matai mo a outou taumafaiga, maelega, ma osigataulaga. Ou te tatalo ina ia Ona tuu atu ia te outou le faamanuiaga o le vaaia o fua o a outou galuega i le fiafia o i latou sa outou fesoasoani i ai ma i latou sa outou fesoasoani i ai mo le Alii.”²