2012
Faalavelave Faalenatura: E Le Tatau Ona Tatou Fefefe
Aokuso 2012


O Tatou Aiga, O Tatou Auaiga

Faalavelave Faalenatura

E Le Tatau Ona Tatou Fefefe

Ata
Elder Stanley G. Ellis

A o tatou saili atu i le taitaiga a le Tama Faalelagi, o le a fesoasoani le Agaga Paia ia i tatou e saunia, onosai, ma toe faaleleia mai faalavelave faalenatura.

O aso e gata ai o le a iloga i le tele o faalavelave ma le faateteleina o le leaga i le lalolagi. O le tetee atu i nei mea taufaamatau ua tuu mai ai e le Alii ma Ana perofeta ni fautuaga ia i tatou i auala e amiotonu ai ma aloese ai mai tulaga lamatia faaleagaga ma le leaga. Peitai, o faalavelave—e pei o asiosio, mafuie, ma galulolo—ua foliga mai e osofai faasoloatoa ma faatamaia ai e amiotonu faapea ma e amioletonu. O nei faalavelave ua faamatau ai le tele o i tatou. Ae ua ou aoaoina e le tatau ona tatou fefefe i faalavelave. Pe a mauaa i tatou i le talalelei ma pe a tatou saunia, e mafai ona tatou tatalia soo se matagi.

A o Le i O’o ina Matagi: Ia Avea Sauniuniga ma se Mea e Faamuamua e le Aiga

Ia Setema 2005, sa avea ai au ma se Fitugafulu Eria sa auauna atu i le Eria a Amerika Matu Sautesisifo, lea sa aofia ai ma vaega o le Iunaite Setete e pei o Houston, Texas. Sa matou iloaina o le Afa o Rita—le afa sili ona malosi na faamaumauina i talafaasolopito na matauina i le Fagaloa o Mekisiko—sa agai sa’o mai ia i matou. Sa talosagaina au e pulefaamalumalu i le polokalama e tali atu ai i faalavelave faafuasei a le Ekalesia i le eria. Sa faia ia valaau faafonotaga ma taitai perisitua, peresitene o siteki, peresitene o misiona, sui o fesoasoaniga o uelefea ma galuega agaalofa a le Ekalesia, ma taitai o le polokalama e tali atu ai i faalavelave faafuasei. Sa matou talanoa i ituaiga uma o mea—pe o faatulaga lelei le faleoloa o le epikopo, o nofoaga e mafai ona o i ai tagata, ma auala sili e mafai ona faamaopoopo ai taumafaiga o galuega toe faalelei pe a uma le afa. O se tali a le Ekalesia na lelei ona faamaopoopoina ma o se aafiaga musuia.

Sa musuia lava se tasi o peresitene o siteki i le eria i le valu po o le iva masina a o le i oo ina matagi, e uunaia tagata o le siteki ina ia saunia. Sa ia faailoa mai na te le i faapea o ia o se perofeta ae sa manino lava ia uunaiga mai le Agaga. Sa mulimuli ia tagata o le siteki i fuafuaga autu o sauniuniga na fautuaina e le Ekalesia. Ina ua oo mai le afa, e leai ma se tagata o le siteki na maliu. Ma le isi, ona sa ao mai e tagata ia sapalai manaomia ma sa i ai se fuafuaga sa faatulaga, sa sili atu ona lelei o latou tulaga nai lo le mea semanu e ono oo i ai. Sa latou gauai atu i lena lapataiga mai le Agaga.

Sa tupu foi se tulaga tali tutusa faapea ia te au ma lo’u aiga. Pe tusa toe tolu masina a o le i oo ina matagi, sa uunaia i matou e faalelei le matou afi faaleoleo. E toatele tagata i le eria e i ai ni afi faaleoleo laiti, a oo mai la ni matagi ma motusia le eletise, e mafai ona maua ai le eletise e teu ai meaai i a latou pusa aisa mai le faaleagaina. Ina ua siaki le matou afi faaleoleo, sa matou iloa ai e le o lelei. Sa mafai ona matou faaleleia ae le i taitai oo mai le matagi. Sa iu ina faaaoga uma e lo matou aiga, tagata o le matou uarota, ma tuaoi le matou afi faaleoleo ina ua uma le afa. O le faaleleia o le afi faaleoleo sa avea lea ma se faamanuiaga sili.

E faatatau lenei mataupu faavae o le sauniuni i tagata taitoatasi faapea foi ma aiga. Matua, e mafai ona i ai ia te outou se aafiaga malosi i o outou aiga e ala i le faaaofiaina o a outou fanau i sauniuniga ma i tatalo faaleaiga mo le taitaiga a le Alii. I se isi faaupuga, pe a iloiloina e lo outou aiga a outou sauniuniga, o le fesili, o le a se mea e tatau ona tatou faia? e ao ona avea ma se vaega tele o a outou tatalo faaleaiga. E mafai foi ona outou talanoa e uiga i nei autu ma fefaasoaai ni manatu i afiafi faaleaiga. Ona faatino lea o na fuafuaga.

Ma le isi, o le mea sili e mafai ona fai e matua o le ola lea i nei aoaoga. Sa fai mai se tagata e faapea o tulaga faatauaina e “pu’eina” e le “aoaoina.” Ua ou iloa e moni lena mea. A o vaaia e fanau o latou matua o saili atu ma mulimuli i le taitaiga a le Agaga, o le a latou aoao foi pe faapefea le faagasologa o faaaliga.

I le taimi o le Matagi: Mulimuli i le Faaaliga E te Mauaina mo Lou Aiga

A o latalata mai le matagi, o se fesili tele lava sa matou fesiligia pe faamata e tatau ona o ese tagata mai le eria pe leai. Sa faatonuina au e le Agaga ina ia aua nei faia se fautuaga lautele mo le eria atoa ae ia fai atu i taitai o siteki taitasi, au epikopo taitasi, ma aiga taitasi ina ia iloilo ma le agaga tatalo le tulaga o i ai ma maua a latou lava musumusuga i le mea e tatau ona latou faia. A o faasolo ona tutupu mai mea, sa oo ina iloatino na silafia e le Agaga le mea sa sili mo aiga taitoatasi.

Mo se faataitaiga, sa silafia e taitai o se tasi siteki sa latou i ai tonu i le ala o le afa ma fautuaina ai tagata ina ia o ese. Sa o ese atu le peresitene o le siteki ma lona faletua i le fale o lona tuafafine. Ina ua maea, sa toe liliu mai le afa, ma toe faasaga mai foi ia i latou. Sa latou o ese sa’o atu i le matagi!

Atonu e te fesili ifo ia te oe lava, “O le a lena ituaiga o musumusuga?” Ae mafaufau i le mea sa tupu. Sa silafia e lenei peresitene o le siteki ma lona faletua le auala e saunia ai se fale mo se afa, ae sa le i iloa e lona tuafafine. Sa mafai ona la fesoasoani i o latou aiga e sauniuni mo le matagi, ma ina ua oo mai, sa itiiti ni mea sa faaleagaina e faatusatusa i mea semanu e ono faaleagaina. Sa taitai e le Alii i la’ua e fai le mea sili e mafai.

I le tulaga o lo matou aiga, sa matou lagonaina e le tatau ona matou o ese. O lea na matou nonofo ai. Sa le gata na matou tatalia ma le saogalemu le matagi, ae sa mafai foi ona matou fesoasoani atu i isi tagata i le eria. O nisi o a matou fanau ua faaipoipo na uunaia ina ia o ese, o lea na latou o ese ai. O le faalogo i le Agaga sa faamanuiaina ai ia aiga taitasi, uarota, ma le siteki.

Ina ua Maea le Matagi: Tuu i le Talalelei e Aveesea le Tui

O nisi taimi e puapuagatia ai tagata lelei i taimi o faalavelave. E le aveesea e le Alii ia puapuaga—o se vaega o le fuafuaga. Mo se faataitaiga, sa faaleagaina talu ai nei se nofoaga autu o se siteki e se asiosio i le Iunaite Setete tutotonu. Sa faataumaoia ai foi e lena asiosio le fale o le peresitene o le siteki. Sa gotouga uma meatotino faalelalolagi a ia ma lona aiga. Peitai, e na o le pau lava lena: o meatotino faalelalolagi. O se faanoanoaga ia mea na maumau, ae e le o se faalavelave faataumaoi e faavavau. O nisi taimi o mea tatou te mafaufau i ai e taua, e le o ni mea taua ia. O le iloaina o lenei mea e le faapea e faigofie ona taliaina, ae e moni, ma o le malamalama i lenei mea e maua ai se toefaamautinoaga.

O le tulaga e sili ona leaga i se tasi o nei faalavelave o se tagata e ono maliu ai. O se mea e sili ona faanoanoa lena. Ae e talu ai ua tatou iloaina le upumoni, tatou te iloa ai e oo lava i sea ituaiga o tiga o se vaega lava o le fuafuaga a le Tama Faalelagi. Ua tatou iloa le uiga moni o le olaga; ua tatou iloa le mafuaaga ua tatou i ai iinei ma le mea tatou te o i ai. Ona o lenei la vaaiga e faavavau, e mafai ona faatoafimalieina ai le tiga. O le malamalama i le ata o le faaolataga e aveesea ai le tui o le oti (tagai i le 1 Korinito 15:55).

I aso ua leva, sa le iloa ai e Sataraka, Mesako ma Apeteniko le mea o le a tupu ina ua lafo i latou i totonu o le ogaumu aasa ona o le mumusu e tapuai i se atua ese. Sa latou fai atu i le tupu, “[E] mafai e lo matou Atua … ona laveai mai ia te i matou. … A e peitai, a le o lea, … matou te le auauna [lava] i ou atua” (Tanielu 3:17–18).

E faapena foi, sa toatele paionia o le Ekalesia toefuataiina na naunau e taumafai e asaina laufanua valevalenoa o Amerika Matu i le ogatotonu o le 1800, tusa lava pe oti ai i luga o le ala. O loo faamatala mai i le Tusi a Mamona le fasiotia o tagata lelei ma aoao mai ai e faapea “ua faamanuiaina i latou, ona ua latou o atu e mau faatasi ma lo latou Atua” (Alema 24:22).

I tulaga taitasi, sa feagai ai tagata taitoatasi ma le oti i le faatuatua. Ia i latou, ona o le filemu e aumai e le talalelei, na aveesea ai le tui o le oti. E ui e tiga tele le oti o se tasi e te alofa i ai ma e ui o le toatele o i tatou e le fiafia e oti ona e tele naua mea e tele tatou te fia ola pea e maua, ae o le mea moni, e i ai lava se taimi o le a feoti ai tagata uma lava. Pe a e iloaina le fuafuaga a le talalelei, ua e iloa foi o le oti e le o le mutaaga lea o le lalolagi. O le a faaauau pea ona e ola, ma e mafai ona faaauau pea mafutaga faaleaiga e tusa lava pe tuu ifo o tatou tino i tuugamau. I se tulaga aoao o mea, o le oti e le lofituina ai e faavavau. E pei ona aoao mai ia Elder Russell M. Nelson o le Korama a Aposetolo e Toasefululua: “Ua tatou ola ina ia oti, ma tatou te oti foi ina ia toe ola ai. Mai se vaaiga e faavavau, e na o le pau le oti faapea ua vave moni ona oo mai, o le oti o le tagata e le o saunia e fetaiai ma le Atua”1 O se vaaiga e faavavau o se vaega lea o le filemu e mafai ona aumai e le talalelei ia i tatou.

E silafia e le Alii i tatou. E alofa le Alii ia i tatou. Ma e finagalo le Alii e fesoasoani mai ia i tatou. O le a oo mai ia faalavelave, ae e le tatau ona tatou fefefe ai. Afai tatou te naunau ina ia taialaina ma ole atu mo Lana taitaiga, o le a fesoasoani mai le Alii e ala mai i le Agaga Paia e saunia i tatou, tumau, ma toe faaleleia mai soo se faalavelave faalenatura.

Faamatalaga

  1. Russell M. Nelson, “Fetaiai ma le Lumanai i le Faatuatua,” Liahona, Me 2011, 34.

Itulau ua tea: O tagata faigaluega o loo sueni solo toega o se falemautotogi na solo i lalo i le taimi o le mafuie ia Ianuari 2010 i Haiti.

Ata na pueina e Jeffrey D. Allred © Deseret News

O tagata ua o ese mai Houston, Texas, ISA, a o le i taia i le Afa o Rita.

O volenitia o Lima Fesoasoani Mamona o loo sueniina toega o mea na faaleagaina i Joplin, Misuri, ISA, ina ua mavae se asiosio ia Me 2011.

Ata na pueina e Carmen Borup