Tutu Faatasi mo le Faamoemoe o Keriso

O lenei tusiga na sii mai i se lauga na tuuina atu i le Aai o Sate Leki i le aso 10 Mati, 2011, i se vaega o taitai Kerisiano o le atunuu.


Jeffrey R. Holland
E mautinoa lava o loo i ai se ala mo tagata o faamoemoega lelei e alolofa i le Atua ma ua latou tauave i o latou luga le suafa o Keriso e tutu faatasi mo le faamoemoe o Keriso ma tetee atu i malosiaga o le agasala.

Uo, ua outou iloa mea ua ou iloa—o loo i ai i le lalolagi faaonapo nei le tele o le agasala ma le faataumaoia o amioga mama ua aafia ai tagata uma, aemaise lava le autalavou, ma ua foliga mai o loo faateteleina le leaga i lea aso ma lea aso. Ua taufai tele na’ua lo tatou popole e uiga i le salalau solo o ponokalafi ma le mativa, faatautala ma le faapau pepe, solitulafono o feusuaiga le talafeagai (i feusuaiga a itupa eseese ma itupa lava e tasi), limatētē, amio faatufanua, agaleaga, ma faaosoosoga, ua matilatila uma mai e pei o le latalata mai o le telefoni feaveai a lou afafine po o le iPad a lou atalii.

E mautinoa lava o loo i ai se ala mo tagata o faamoemoega lelei e alolofa i le Atua ma tauave i o latou luga le suafa o Keriso ma tutu faatasi mo le faamoemoe o Keriso ma tetee atu i malosiaga o le agasala. I lenei vaega ua ia te i tatou le aia uma e lototoa ai ma talitonu, aua “afai ua au ma i tatou le Atua, o ai se e faasaga tau mai ia i tatou?” (Roma 8:31).

Tou te auauna atu ma talai atu, aoao atu ma galulue i lena talitonuga, e faapena foi au. Ma o le faia o lenei mea, ou te talitonu e mafai ona tatou faatuatuaina le isi foi fuaiupu e sosoo ai mai le Roma: “O Ia lava sa na le faasaoina lona lava Alo, a ua tuuina mai o ia e sui a’i i tatou uma lava, e le foai fua mai ea e ia ia te i tatou mea uma lava faatasi ma ia i se a? Ou te talitonu moni lava afai e mafai ona tatou taumafai malosi uma i le lalolagi atoa ia aua nei vavaeeseina le tasi ma le isi mai le “alofa o Keriso,” o le a tatou “manumalo a’ia’i i nei mea uma lava, ona o ia ua alofa mai ia te i tatou” (Roma 8:32, 35, 37).

Talanoaga Faalelotu

O le aufai evagelia ma le Au Paia o Aso e Gata Ai e seasea lava ona feiloai i ni tulaga filemu. Mai uluai taimi o le seneturi lona 19 ina ua sau Iosefa Samita ua uma ona ia vaai i se faaaliga faalelagi i lona talavou ma faia sana tautinoga toa e faatatau i ai, sa tele a tatou felafolafoaiga sa faia ae lē manuia.

Ae, e ese ai lava—ma ua leai se isi mea ae talitonu i ai o se vaega o se faatulagaga faalelagi o mea e tutupu i nei taimi faigata—i tulaga faaleatamai a le AAG ma taitai faale-ekalesia ma ua soofaatasi talu mai le taufaasiusiuga o le 1990 i le mea ou te manatu ua avea ma se talanoaga faaosofia ‘anoa faalelotu. O se taumafaiga faamaoni ia malamalama ma ia faamalamalamaina, o se taumafaiga e tafiese ai ni tala faaanamua ma tala e ave sese i itu uma e lua, o se galuega o le alofa lea e lagona ai e tagata auai le faaosofiaina ma uunaia ai i se malosiaga le leoa loloto ma sili atu ona mautu nai lo se felafolafoaiga o manatu o ni faatuatuaga masani.

O le talanoaga muamua o na talanoaga aloaia sa fai i le tautotogo o le 2000 i le Iunivesite o Polika Iaga. A o amata faagasolo le talanoaga, sa iloagofie lava o loo sailia e tagata auai se ituaiga o mamanu, se faataitaiga, se manatu e faasino i ai. Pe sa fai ea nei mea o ni feupua’iga, finauga, po o ni felafolafoa’iga? Pe latou te sailia ai se e manumalo po o se e faiaina? Pe o le a le tele o le faamaoni ma le naunautai sa faamoemoeina mai ia i latou? Sa manatunatu nisi o le Au Paia o Aso e Gata Ai: Pe o vaaia e “isi tagata” nei talanoaga o ni mea e “suesue” ai i tatou mo se nofoaga i le au Kerisiano? Pe o se taumafaiga silisili ea le “faatumauina” o le faa-Mamona, ina ia avea atili ai ma Kerisiano masani, sili atu ona taliaina e tagata e vaavaai mai ma le le talitonu?

I le isi itu, e manatunatu ai le au faievagelia: Pe moni ea “isi tagata”, pe ua na o se isi ituaiga o a latou tala’iga faafaifeautalai? Pe mafai ona avea se tagata ma se Kerisiano o le Feagaiga Fou ae le malie i talitonuga ua leva ona taliaina e le tele o Kerisiano anamua? O se fesili o loo faaauau pea ona tulai mai i itu uma e lua pe fia se tele o “aoaoga faalelotu leaga” e mafai ona tauia e le alofa tunoa o le Atua? E le i umi tele, ae avea na ituaiga o faafitauli o se vaega o le talanoaga lava ia, ma i le faagasologa, sa amata ona fāi ifo le finauvale.

O le uluai lagona lava o le faasologa sa tuuavanoa ai i se tulaga faasamasamanoa sa sili atu ona tausaafia, o se ituaiga moni lava o le faaleusoga ma faaletuafafine, i se agalelei i ni feeseeseaiga, se faaaloalo mo manatu tetee, se lagona o le tiutetauave ia malamalama moni ai (pe a le ioe i ai) ia i latou o isi faatuatuaga—o se tiutetauave e fai ma sui o aoaoga faavae ma faiga masani ua tonu a le tasi faatuatuaga ma pu’e mai ai aoaoga a isi i le ala lava e tasi. Na i’u talanoaga i le olioli ai i le “feavata’i i talitonuga maumaututu o isi.”1

O le iloaina ai e fai lava si ese o le faatulagaga faalepulega ma faalefaalapotoptoga a le Au Paia o Aso e Gata Ai nai lo le lautele o le lalolagi faaevagelia, e leai se sui aloaia o le Ekalesia sa auai i nei talanoaga, po o ni fautuaga faaletaitai faalelotu ia i latou. E pei o outou, e le o i ai so matou manao e fetuunai lo tatou tulaga ese faaleaoaoga faavae pe lafoai ia talitonuga ua fausia ai le ituaiga o tagata o tatou i ai. Peitai, tatou te naunau ina ia le malamalama sese tagata ia i tatou, ina ia le tuuaia i talitonuga tatou te le tausiaina, ma ia le aveesea mai ia i tatou la tatou tautinoga ia Keriso ma Lana talalelei, ia le fai atu se mea e faatiapolo i le faiga.

Ma le isi, tatou te vaavaai pea mo talitonuga tutusa ma paaga tutusa i le “pulupululima faatasi” i le galuega o le talaiga. O le a tatou naunau e uu lima faatasi ma a tatou uo faaevagelia i se taumafaiga tuufaatasi faa-Kerisiano e faamalolosia aiga ma faaipoipoga, ia faamalosia atili le ola mama i ala o faasalalauga, ia tuu atu taumafaiga o toomaga mo tagata i taimi o faalavelave faalenatura, ia taulimaina le mala o i ai pea i le taimi nei o le mativa, ma ia faamautu le saolotoga o tapuaiga lea o le a faatagaina ai i tatou uma e talanoa e uiga i mataupu o le lotofuatiaifo faa-Kerisiano e faatatau i faafitauli faaleagafesootai i o tatou aso. I lenei tulaga i aso nei ia aua lava nei oo mai le aso e faasaina ai oe po o a’u po o soo se tasi o failotu i lenei malo e talai atu mai lana pulelaa ia aoaoga faavae e moni i lena tagata. Ae i le iloa ai o mea o tutupu o aga faaupufai talu ai nei ma luitau faaletulafono o i ai i le taimi nei ua faapogai mai ia i latou, aemaise le mataupu e faatatau i le paia o le faaipoipoga, e mafai ona oo mai lena aso sei vagana ua tatou galulue ma le mautinoa ia puipuia.2

O le faateleina ma le tuufaatasia atili o leo o Kerisiano, o le tele foi lena o lo tatou tauaveina o le aso i nei mataupu. I lena tulaga e tatau ona tatou manatuaina le lapataiga a le Faaola e faatatau i “se aiga e fevaevaeai [lava ia]”—o se aiga lea e le mafai ona tu e faasagatau atu i fili ua tuufaatasia e tulimata’i pea ni mea e le paia (tagai i le Luka 11:17).

O Le Keriso Tatou te Faamamaluina

O le fausiaina i luga o nisi o lenei talafaasolopito ma manao tatou te le tetee i mea e le manaomia ona tatou tetee i ai, ou te fia molimau atu ia te outou, o a matou uo, i le Keriso matou te faamamaluina ma faamemelo i ai i Le Ekalesia a Iesu Keriso o le Au Paia o Aso e Gata Ai. Matou te talitonu i le Iesu logologoa sa savalia ala pefu o le Nuu Paia ma tautino atu o Ia lava e tasi ma le Atua lava e tasi o le Ieova Paia o le Feagaiga Tuai. Matou te tautino atu o Ia o le Atua atoatoa i Lona tulaga paia ma le tagata atoatoa i Lona soifuaga faaletino, o le Alo sa avea ma se Atua ma le Atua sa avea ma se Alo; o Ia, i le gagana o le Tusi a Mamona, “o le Atua Faavavau” (itulau autu o le Tusi a Mamona).

Matou te molimau atu e tasi o Ia ma le Tama ma le Agaga Paia, o le Toatolu ua Tasi: tasi i le agaga, tasi i le malosi, tasi i le faamoemoe, tasi i le leo, tasi i le mamalu, tasi i le loto, tasi i le lelei, ma tasi i le alofa tunoa—tasi i ituaiga ma foliga faigofie uma o le lotogatasi sei vagana ai o Latou tino faaletino mavaevae (tagai i le 3 Nifae 11:36).Matou te molimau atu sa fanau mai Keriso i Lona Tama faalelagi ma se tina taupou, ma mai le 12 tausaga e agai atu i luma, sa Ia femaliuai ma faia le galuega moni a Lona Tama, ma i le faia o lena, sa Ia soifua ai i se olaga atoatoa ma e leai se agasala ma o lea sa saunia ai se mamanu mo i latou o e o mai ia te Ia mo le faaolataga.

Matou te molimau atu i lauga uma sa Ia tuuina mai, o tatalo uma sa ia fofogaina, o vavega uma sa ia aumaia mai le lagi, ma galuega faaola uma sa ia faatinoina. I lenei tulaga i aso nei matou te molimau atu ai i le faataunuuina o le fuafuaga paia mo lo tatou faaolataga, sa Ia tauave i Ona luga agasala uma, faanoanoaga ma ma’i o le lalolagi, sa tafetoto mai pu laiti uma o le tino i tiga uma, na amataina i Ketesemane ma maliu ai i luga o le satauro o Kalevario e fai ma taulaga sui mo na agasala ma tagata agasala, e aofia ai i tatou taitoatasi.

I le amataga o le Tusi a Mamona na “vaai [se perofeta sa Nifae] ua sii a’e [Iesu] i luga o le satauro ma fasiotia mo agasala a le lalolagi” (1 Nifae 11:33). Mulimuli ane sa faamautu mai e le Alii lava lea e tasi e faapea: “Faauta, ua ou tuuina atu ia te outou la’u tala lelei, o le talalelei lenei ua ou tuuina atu ia te outou—na ou sau i le lalolagi e fai le finagalo o lo’u Tama, aua na auina mai a’u e le Tama. Ma na auina mai e lou Tama ina ia sii ae au i luga o le satauro” (3 Nifae 27:13–14; tagai foi i le MF&F 76:40–42). O le mea moni, o se meaalofa a le Agaga le “iloa o Iesu Keriso o le Alo o le Atua, ma sa faasatauroina o ia mo agasala a le lalolagi” (MF&F 46:13).

Matou te tautino atu ina ua mavae aso e tolu o le Faasatauroga, na Ia toetu mai le tuugamau i le mamalu o le tino ola pea, o le uluai fua o le Toetu, o lea na motusia ai noataga faaletino o le oti ma le saisaitia faaleagaga o seoli, ma maua ai se lumanai o le tino ola pea mo le tino atoa ma le agaga, se lumanai e mafai ona iloaina i lona mamalu atoa ma le silisili lea ua na o le taliaina o Ia ma Lona suafa ma ua na o le pau lea o le “igoa i lalo o le lagi ua foaiina mai i tagata e mafaia ona faaolaina ai o i tatou.” E leai, ma e le mafai lava ona i ai, “le faaolataga i se isi ala” (Galuega 4:12).

Matou te tautino atu o le a toe afio mai o Ia i le lalolagi, i le taimi lenei i le malosi, mamalu, ma viiga, e nofotupu o le Tupu o tupu ma o le Alii o alii. O le Keriso lenei, lea matou te viia, le ona le alofa tunoa o loo matou faalagolago i ai ma le atoatoa ma le mautinoa, ma o le o loo avea ma “Le na te leoleoina ma tausia o [matou] agaga” (1 Peteru 2:25).

Sa i ai se tasi taimi na fesiligia ai Iosefa Samita i le fesili, “O a mataupu faavae autu o la outou tapuaiga?” Na ia fai mai, “O mataupu faavae autu o lo matou talitonuga o le molimau a le au Aposetolo ma Perofeta, e faatatau ia Iesu Keriso, e faapea na maliu o Ia, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo matou talitonuga ua na o ni faaopoopoga i ai.”3

O se tulafono, ua lauiloa le Au Paia o Aso e Gata Ai o ni tagata galulue, o tagata e mafaufau lava i galuega. Mo i tatou, o galuega o le amiotonu, le mea lea tatou te ono ta’ua o le “soo tuuto,” o se fuataga mautinoa lea o le moni o lo tatou faatuatuaga. Matou te talitonu faatasi ma Iakopo, le uso o Iesu, o le faatuatua moni lava e faailoa i taimi uma ia lava i le faamaoni a’ia’i (tagai i le Iakopo 2). Matou te aoao atu sa latalata atu na tagata o se lala o le Lotu Porotesano [Puritans] i le upumoni nai lo le latou iloaina sa faamoemoeina i latou e “savavali ma le amio-atua” (MF&F 20:69) mai ia i latou ua faaosifeagaigaina.

E maua fua le faaolataga ma le ola e faavavau (tagai i le 2 Nifae 2:4); o le mea moni, o meaalofa silisili ia o meaalofa uma a le Atua (tagai i le MF&F 6:13; 14:7). E ui i lea, matou te aoao atu e ao ona saunia le tagata e maua na meaalofa e ala i le tautino atu ma faailoa atu le “faatuatua i le Alii o Iesu Keriso” (Mataupu Faavae o le Faatuatua 1:4)—e ala i le faatuatuaina ma le faalagolago i “galuega, ma le alofa mutimutivale, ma le alofa tunoa o le Mesia Paia” (2 Nifae 2:8; tagai foi i le 2 Nifae 31:19; Moronae 6:4). Mo i tatou, o fua o lena faatuatua e aofia ai le salamo, o le mauaina o feagaiga ma sauniga o le talalelei (e aofia ai le papatisoga), ma se loto faafetai lea e faaosofia ai i tatou e faafitia i tatou lava mai mea uma e le faaleatua, ia “ave e [i tatou o tatou] satauro i aso fai soo” (Luka 9:23), ma ia tausi Ana poloaiga—Ana poloaiga uma (tagai i le Ioane 14:15). Tatou te olioli faatasi ma le Aposetolo o Paulo: “A e faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso” (1 Korinito 15:57). I le agaga lava lena, e pei ona tusia ai e se tasi o perofeta o le Tusi a Mamona, “Ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso … ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala … [ma] latou tulimatai atu i luma i lena olaga ua ia Keriso” (2 Nifae 25:26, 27).

Ou te faamoemoe o lenei molimau ua ou tuuina atu ia te outou ma le lalolagi e fesoasoani ia te outou e malamalama ai i se mea o le alofa le mafaamatalaina tatou te lagonaina mo le Faaola o le lalolagi i Le Ekalesia a Iesu Keriso o le Au Paia o Aso e Gata Ai.

O Se Valaau i le Lotofuatiaifo Faa-Kerisiano

O le tuuina atu o la tatou tuuto faatasi i le Alii o Iesu Keriso ma le tuuina mai o luitau o loo tatou fetaiai i o tatou nuu, e mautinoa lava e mafai ona tatou mauaina se ala e tuufaatasia ai se valaau faalemalo—pe faavaomalo—i le lotofuatiaifo faa-Kerisiano. Sa tusia e Tim LaHaye i nai tausaga ua mavae:

“Afai e galulue faatasi ia tagata lolotu Amerika i le igoa o o tatou popolega tutusa e tasi o amioga mama, atonu lava e mafai ona faamanuiaina i tatou i le toe faamautuina o tulaga faatonuina o amioga mama faaletagata ia na manatu o tatou tuaa sa faamaonia e le Faavae o le [Iunaite Setete]. …

“… O tagatanuu uma faalelotu a lo tatou atunuu e manaomia le atinaeina o se faaaloalo mo tagata o isi lotu faapea o latou talitonuga. E le manaomia le tatou taliaina o le latou talitonuga, ae e mafai ona tatou faaaloalo i tagata ma ia iloa e sili atu mea tatou te tutusa ai ma isi nai lo se isi lava taimi i le tulaga faalelalolagi o i ai lenei atunuu. Ua oo i le taimi e tatau ona tuufaatasia ai ia tagatanuu uma ua tautino faalelotu e tetee atu i le tatou fili e tasi.”4

Ia mautinoa, e i ai se tulaga lamatia e fesootai ma le aoaoina o se mea fou e uiga i se isi tagata. O malamalamaaga fou e aafia ai lava i taimi uma ia vaaiga tuai, ma o lea o le toe mafaufauina o nai mea, toe fetuutuunai, ma le toe faatulagaina o a tatou vaaiga faalelalolagi e le mataofia. Pe a tatou vaai i tala atu o lanu o tagata, ituaiga o tagata, li’o o agafesootai, ekalesia, sunako, faletapuai a le au Mosalemi, faatuatuaga, ma faamatalaga o talitonuga, ma pe a fai le mea e sili tatou te mafaia e iloa ai pe o ai i latou ma le ituaiga tagata latou te i ai—o fanau a le Atua lava e tasi—e tupu se mea lelei ma taua i totonu ia i tatou, ma o lea e tosoina ai i tatou i se tuufaatasiga vavalalata ma lena Atua o le Tama o i tatou uma.

E tele atu nisi mea e manaomia i lenei lalolagi vevesi ma le fenumiai nai lo le talitonuga faaKerisiano, agaalofa faaKerisiano, ma le malamalama faaKerisiano. Sa matauina e Iosefa Samita i le 1843, e itiiti ifo ma le tausaga a o lei maliu o ia: “A ou manatu i tagata o loo i ai i mea sese, pe ou te tuu ai pea i latou i lalo? E leai. O le a ou siitia i latou i luga, ma i la latou lava foi ala, afai e le mafai ona ou faatauanauina i latou e lelei atu lo’u ala; o le a ou le saili lava e faamalosi soo se tagata ia talitonu e pei ona ou talitonu, ua na o le malosiaga o le mafaufau, mo le upumoni o le a faia ai lona lava ala. E te talitonu ia Iesu Keriso ma le Talalelei o le faaolataga lea na Ia faaali mai? E faapena foi au. E tatau i Kerisiano ona tuu le femisaa’i ma le fefinaua’i o le tasi ma le isi, ma faafailele ia mataupu faavae o le tutu faatasi ma le faauoga i o latou lotolotoi; ma o le a latou faia a o lei oo mai le meleniuma ma pulea ai e Keriso Lona malo.”5

Ou te faamaea atu i le alofa mo outou lea na faailoa mai e ni lauga faamavae se lua i a tatou tusitusiga paia. Muamua e mai le tusitala o le Eperu i le Feagaiga Fou:

[Talosia i] le Atua e ona le manuia, o le na toe faatuina mai nai e ua oti le leoleo mamoe sili, o lo tatou Alii o Iesu, ona o le toto o le feagaiga e faavavau,

‘Ia faaatoatoaina outou e ia i galuega lelei uma lava, ina ia outou faia lona finagalo, ia galue i totonu ia te outou le mea e malie i ona luma ona o Iesu Keriso; ia ia te ia le viiga e faavavau faavavau lava. Amene” (Eperu 13:20–21).

Ma lenei mai le Tusi a Mamona, o se tama sa tusi atu i lona atalii:

“Ia e faamaoni ia Keriso … [ma] talosia ia sii ae oe i luga e [Ia], ma talosia ia mau e faavavau i lou mafaufau ona mafatiaga ma lona maliu … ma lona alofa mutimutivale ma le tali-tiga, ma le faamoemoe o lona mamalu ma le ola faavavau.

“Ma talosia ia i ai, ma mau faatasi ma oe e faavavau, le alofa tunoa o le Atua le Tama, o le o lona nofoalii ua maualuga i le lagi, ma lo tatou Alii o Iesu Keriso, o le ua afio i le itu aao taumatau o lona mana, seia oo ina pule o ia i mea uma. Amene” (Moronae 9:25–26).

Mo nisi faamatalaga e uiga i le avea ai o le Au Paia o ASo e Gata Ai ma Kerisiano, tagai i le “About Mormons” i lalo o le Frequently Asked Questions i le Mormon.org; “Christianity: Following Jesus in Word and Deed” i lalo o le News Releases i le MormonNewsroom.org; ma le Gordon B. Hinckley, “A Prophet’s Testimony,” Ensign, Me 1993, 93.

Taliina o Fesili

Pe o ni Kerisiano le Au Paia o Aso e Gata Ai? Ioe, o tatou o Kerisiano. E pei ona faamalamalama mai e Elder Holland, “Matou te talitonu i le Iesu logologoa sa savalia ala pefu o le Nuu Paia ma tautino atu o Ia lava e tasi ma le Atua lava e tasi o le Ieova Paia o le Feagaiga Tuai.”

Faaali Mau Faasino

    Faamatalaga

  1.   1.

    O se upu na faalauiloa i le [tusi a] Richard J. Mouw, Uncommon Decency: Christian Civility in an Uncivil World (1992).

  2.   2.

    Tagai i le Dallin H. Oaks, “Preserving Religious Freedom” (speech, Chapman University School of Law, 4 Fep., 2011), newsroom.lds.org/article/elder-oaks-religious-freedom-Chapman-University.

  3.   3.

    Aoaoga a Peresitene o le Ekalesia: Iosefa Samita (2007), 55.

  4.   4.

    Tim LaHaye, The Race for the 21st Century (1986), 109.

  5.   5.

    Iosefa Samita, i le History of the Church, 5:499.