Erreo ilo juon Laļ Ejjab Erreo


Māākjiin ko an Kabun̄ in kar ioon juon kurup in rūm̧m̧aan ded ro jen kajjojo jikin ko ilo laļ in n̄an kōnono kōn apan̄ ko im kōjeram̧m̧an ko an mour erreo ilo juon laļ ejjab kaorōki—im barāinwōt kōnanaik—kien erreo. Kōm kar lo aer wujlepļo̧k, m̧ool im kam̧m̧oolol kōnono in lijur im im̧we im kōtmāne bwe kōm naaj barāinwōt lo ilo kajjitōk ko aer jet men ko n̄an jipan̄ kōm̧ kaorōk kwojarjar eo an mour in pālele im ippān doon an kanniōk.

Kōn an lukkuun lōn̄ armej rej kwaļo̧k m̧antin mour eo ejjab erreo, ta m̧ool ko an ko̧jpeļ rejipan̄ eok kōjparok erreo eo am?

Martin Isaksen, Norway: Ej ba ilo jeje ko rekwojarjar n̄an erreo. Ebwe n̄an n̄a.

Lizzie Jenkins, California, USA: Erreo ej juon kalim̧m̧ur. Kwoj mour ekkar n̄ane. Ej juon wāween mour.

Liz West, England: Meļeļe wōn N̄a, meļeļe bwe men ko ikijeen mour kiiō im menin kar juon bon̄ eaar lukkuun jipan̄ eō. Karōk in lo̧mo̧o̧r—men̄e Iaar juon jodikdik Ijjab maron̄ kar kōmeļeļeik i—ej lukkun jipan̄. Katak eo an m̧are indeeo eaiboojoj! Eļan̄n̄e armej rej meļeļe kōn kien in, rej kile jon̄an an em̧m̧an ej bwe Anij eaar likūt kōj ijin ippān baam̧le ko im kar letok n̄an kōj kien ko bwe jen jab wōt bōk lo̧mo̧o̧r ak bwe jen maron̄ m̧ōņōņō. Ilo aō mour kōn katak kein im kwaļo̧ki n̄an ro m̧ōtta, ilo ba, ‟Ijjab maron̄ idaak” ak “Ijjab maron̄ etal n̄an bade in”ak “Ijjab maron̄ kōm̧m̧ane menin,” rej kauteij eō. Āliktata rej lukkuun bōbraeik eō. Meļeļe bwe ewōr aō wānōk āinwōt juon ajri eo nejin Anij im bwe Jemedwōj Ilan̄ ejeļā wōn N̄a im lukkuun kea kōn eō ej juon kajoor eļap.

Anna (Anya) Vlasova, Russia: Eļap an jipan̄ eō n̄e ij ļōmņak kōn m̧ōttan baam̧le eo ilan̄. Ij iakwe im kautiej Anij im jab kōņaan bwe En jook kōn kālōt ko Ij kōm̧m̧ani.

Kaylie Whittemore, Florida, USA: Ij lukkuun in ļōmņak meļeļe kōn kwojarjar eo an baam̧le ko kar litok n̄an n̄a juon uwaak ekajoor n̄an mour kōn kien erreo. Bar juon men ej kile bwe eļan̄n̄e jej rubi kien ko, ewōr kaje ko renana Ijjab kōņaan en̄jaki.

Falande (Fae) Thomas, Haiti: Iaar lukkuun in ļōmņak kōn ekōjkan an armej ba, “Etke kōttar n̄e emaron̄ wōt men otemjej kiiō?” Ak Iaar bwilōn̄ kōn jon̄an aitokan kain m̧ōņōņō in maron̄ jem̧ļo̧k. Em̧m̧an n̄e ij mour kōn kien erreo im, āinwōt juon tōprak, wōr aenōm̧m̧an.

Hippolyte (Hip) Kouadio, Ivory Coast: Juon iaan men ko ekar ļap an jipan̄ eō ej naan in kean̄ an baam̧le: “Jej … kean̄ bwe Anij eaar kakien bwe kajoor ko rekwojarjar an tim̧oon im wōrļo̧k rej jerbal ikōtaan wōt em̧m̧aan im kōrā, m̧are āinwōt ļeo im lio̧ pālele.”1

Bar juon men me ej jipan̄ m̧aan ro jeid im jatid wāween kōmeleleik kien erreo n̄an kōj. Rej kakkōl kōj ekōjkan an jab erreo ijjino im katakin bwe eļan̄n̄e jej kakkure ānbwin eo, jej kakkure jetōb eo. Elder Jeffrey R. Holland eaar katakin bwe Rilo̧mo̧o̧r eo eaar kōļļāik juon wōņāān n̄an kōj n̄an juon raan bōk juon ānbwinnin ejerkakpeje. Wāween eo jemaron̄ kam̧m̧oolol kōn wōņāān eo Eaar kōļļāik ej n̄an kōjparok im karreoik ānbwinnid.2

Liz: Ij kememej juon bwebwenato ippān juon armej ke eaar enan̄in 15 iiō detta. Kōm kar kōnono kōn wāween aō kar jab tōmak kōn ippān doon m̧okta jen m̧are, im Ij keememej an kar ba, “Aaet, ak eļan̄n̄e ebaj waļo̧k? Eļan̄n̄e juon bon̄, kwo baj … ?” Ak Ijeļā bwe ejjeļo̧k aō kālōt. Ejjeļo̧k men ej make “waļo̧k.”

Eaiboojoj n̄an eō bwe Jemedwōj Ilan̄ ar letok n̄an kōj anemkwoj im kien ko n̄an kanemkwoj ad im bwe Setan ej kōm̧m̧ane men otemjeļo̧k emaron̄e n̄an likoj ak kiene kōj. Iien ko eo m̧ōtta ej kōnono kaki ej n̄e jet men remaron̄ “waļo̧k” kar ilo bade ko ijo armej ro rekar kadōk im kar ilo̧k ruo ļo̧k ruo. Kōn menin ijjab likūt n̄a make ilo jekjek ko. Jokālōt eo ejjab aikuj kōm̧m̧an ilo jem̧ļo̧kin n̄e kwoj ba aaet ak jaab. Kālōt eo ej kōm̧m̧an m̧okta, n̄e kwoj kajjitūkin eok make, “Ij ke etal n̄an bade eo?

Elōn̄ armej, eļan̄n̄e rejjab ļōmņak bwe men kein em̧ōkaj kitien aer waļo̧k im jab ļōmņak kōn kaje ko, rej kōm̧m̧an jabdewōt rekōņaan ilo iien eo. Bōtaab, n̄e kwoj ba, “Ikōņaan menin āinwōt tōprak ilo jem̧ļo̧k eo aō; kōnke menin Ij wōnm̧aanļo̧k n̄an kōm̧m̧ani jokālōt kein,” innām kwonaaj karmejete elōn̄ jorrāān ko.

Kom̧ kar kōnono kōn anemkwoj im kien ko. Ak kōm̧m̧ani bujen ko—bujen peptaij ko ak bujen ko an tampeļ— ej jipan̄ eok mour kōn jon̄ok ko am̧?

Fae: Iaar ļōmņak kōn mour eo aō m̧okta jen aō kar peptaij im jon̄an an ļap an em̧m̧an mour kiiō bwe em̧ōj aō kōm̧m̧ani bujen ko. Ekabwilōn̄lōn̄ ekōjkan jemaron̄ bōk jeorļo̧k bōd ko ad kōn wōt Pinmuur eo. N̄e Ij kememej bujen ko aō, Ij ļōmņak ekōjkan aō maron̄ ukweļo̧k, erom̧ em̧m̧an im wōnm̧aanļo̧k wōt.

Anya: Eļaptata ilo tampeļ kwoj lo juon piktokin indeeo. Tampeļ ej jipan̄ eok kōlmenļo̧kjeņ kōn indeeo eo am im jab kōn rainin wōt, innām kwon kōm̧m̧ane kālet ko remālōtlōt.

Lizzie: Elōn̄ iien jej tōmak bwe ippān doon ilo jerā enana, bōtaab ejjab. Ej aikuj erreo jen kōmālim eo ejim̧we, ilo iien eo ejjejet, im ippān armej eo ekkar. En̄in ej ta eo kōn bujen ko. Kwoj kōm̧m̧ane kalim̧m̧ur ko. Kwoj ba, “Ilukkuun pojak n̄an bun̄tōn in ilo mour eo aō.” Bujen ko rej jipan̄ eō kōnke Ijeļā bwe Ij kōm̧m̧ane men ko ilo kōlaajrak eo iaikuj in kōm̧m̧ane n̄ani. Im Ijeļā eļan̄n̄e Ij kōm̧m̧ane ta eo Jemedwōj Ilan̄ ekōņaan, enaaj ļapļo̧k aō m̧ōņōņō.

Jonathan Tomasini, France: Ijjamin m̧ool n̄an ņa make im n̄an Anij eļan̄n̄e Ij rubi bujen ko aō. Bujen ko an mour in pālele rej jipan̄ eō kile bwe ikōņaan bwe in maron̄ leļo̧k n̄an lio pāleeō juon eo ejeļā anjo ioon make, eaar kōpooj e make n̄an erom juon ļeo pālele em̧m̧an im kar dāpij erreo eo an.

Ewōr iakweleel ko ilo laļ in—elōn̄ iaer ealikkar aer kareel im kapokpok—kōn etke kien erreo ejamin m̧or. Ta iakweleel ko emōj am ron̄ im ekōjkan am kar uwaaki n̄an ro rekar idajon̄jon̄e jon̄ok eo am̧?

Lizzie: Iiō eo aō āliktata ilo high school, Iaar keememej an rūkaki eo letok n̄an kōm jet “naan in rōjan̄.” Eaar m̧are ālkin wōt an high school, im enana an kar jem̧ļo̧k, innām ej jiron̄ kōj bwe “eļap an lōn̄ armej kom̧ maron̄ kar pād ippāer.” Ej meļeļein bwe elōn̄ men ko n̄an kōj n̄an kajjieon̄i, bwijin rijipadōk n̄an kajjieon̄. Ij keememej aō kar bwilōn̄ bwe rūkaki eo aō emaron̄ kar ba menin. Jen iien eo Iaar ļōmņak bwe, aaet, elōn̄ armej, ak ijjab kōņaan elōn armej!

Jonathan: Juon eo ijeļā kajjien eaar ba bwe ekar pād ilo juon jemerā, eaar kōņaan lale eļan̄n̄e em̧m̧an an pād ippān armej eo. Eaar letok waanjon̄ak in an bwebwenato ippān likao eo ekōņaan, im ālkin aer ippān doon ekar en̄jake bwe rejōkkar n̄an doon im jemjerā eo eaar jab to an pād. Eaar kōjerbal en̄jake eo n̄an rie ļo̧k iakweleel eo an, im aejemjem. Āliktata, Iaar kōmeļeļeik n̄an e bwe Ij tōmak kom̧ maron̄ em̧m̧an ami jeļā kajjien doon ilo bar jet wāween, im eļan̄n̄e kom̧ij kōm̧m̧an āindein im kālōt lōke ilo tōreo mour kōn kien erreo, enaaj wōr eļapļo̧k jemdo̧o̧n eļan̄n̄e kom̧ naaj m̧are.

Anya: Iakweleel eo ekka Aō kijon̄ ron̄ ej n̄e ruo armej relukkuun iakwe doon, em̧m̧an; ippān doon ej juon kilen kwaļo̧k iakwe.

Martin: Juon men eaar itok n̄an kōlmenļo̧kjeņ eo aō eļān̄n̄e Ij ron̄ jekpen “Jen iakwe doon” ej juon kout jen Būreejtōn Spencer W. Kimball. Emmakijkij an kijen ba menin ļōn̄ ej itok ilo juon wāween etiņņo eļān̄n̄e armej rej tōmak repād ilo iakwe.3 Wāween dein n̄an elōn̄ armej eļān̄n̄e rej ippān doon ilo jerā m̧okta jen m̧are. Menin ej ļōn̄ men̄e rej ļōmņak rej iakwe doon. Eļan̄n̄e rej lukkuun iakwe doon, rej kautiej doon eļapļo̧k, jipan̄ doon, im meļele bwe ewōr iien n̄an ippān doon. Im, n̄an eō, ippān doon m̧okta jen m̧are ej kwaļo̧k bwe kom̧ ban lukkuun jipan̄ doon āinwōt ami ļōmņak bwe kom̧ naaj. Kōnke kom̧ ban maron̄ jipan̄ doon mour kōn jon̄ok ko ami, innām ekōjkan ami naaj jipan̄ doon tokālik?

Kaylie: Jet armej rejjab tōmak ilo Anij rej en̄jake bwe Baibōļ im kien erreo ejem̧ļo̧k kitier. Ewōr jet m̧ōtta ilo high school ro rekar ri-kōjekdoon ak ri-pere bwe ewōr Anij—im ewōr juon m̧ōtta eo ejjab lukkuun tōmak katak ko ilo kabun̄ eo an. Ej baj mour wōt ekkar n̄an ta eo ekōņaan, ta eo ej en̄jake bwe ejim̧we n̄ane. Ippān doon ilo kanniōk, jen an etale ļo̧k, ej n̄iajō, im jabdewōt men ej kam̧oik n̄iajō ejjab kōņaan.

Ij ļōmņak bwe eo m̧ōtta ekar bwilōn̄ bwe Ij tōmak ilo Baibōļ im kien ko an Anij, ak Ij kajjieon̄ jipan̄ e meļeļe bwe Ijjab watōk kien ko āinwōt kamo; Ij mour kaki kōnke rekōm̧m̧an bwe in m̧ōņōņō. Men̄e jejjab errā, eaar kautiej eō, im jej pād wōt im jemjerā eo rem̧m̧an.

Liz: Aolepān iakweleel kein kar uwaaki ilo pedped in katak ko an ko̧jpeļ. Eļan̄n̄e kom̧ij tōmak bwe ewōr Anij, n̄e kōm̧ij tōmak bwe ewōr juon karōk em̧m̧anļo̧k, n̄e kom̧ij tōmak bwe ewōr juon eddo, n̄e kōm̧ij tōmak bwe ewōr ro rej iakwe kom̧, im kea kōn kom̧, im n̄e kom̧ij tōmak bwe ewōr ami wānōk kōnke kom̧ij ajri ro nejin Anij—innām eļap im ļap tokjen bwe kom̧ij watōk kom̧ make riwānōk im kautiej ānbwinnimi. Eļān̄n̄e armej rejjab jeļā ak tōmak katak kein, rej pukōt ro rej im jikin ko n̄an lale eļān̄n̄e ta eo rej tokjā.

Ta kareel ak waanjon̄ak ko raar jipan̄ kom̧ kalim̧m̧ur n̄an mour kōn kien erreo?

Hip: Ewōr juon ruum̧meit eo eaar pojak in m̧are. Juon raan kōm kar kōnono kōn m̧are eo an ej itok, im juon armej eaar kajjitōk, “Ta kalim̧m̧ur ko kom̧ro ej ļōmņak renaaj jipan̄ kōkajoor wōt kom̧iro?” Uwaak eo an ekar, “Jab kōjparok kien erreo emaron̄ kakkure jem̧jerā eo ad. Innām kōm kar ļōmņak bwe kōm ban kōm̧m̧an jabdewōt men kōm ban en̄jake aenōm̧man ilo am kōm̧m̧ane im̧aan mejān bisop ak ro jinem im jemām.” Men eo ewōr an kareel ippa.

Jonathan: Kiiō ke N̄aij juon rūm̧m̧an ded, epidodo n̄an ron̄jake rikanaan ro im ļōmņak kōn men ko ritōl ro an Kabun̄ in rej ba. M̧okta jen kejokļo̧kjeņ eo, Iaar ļōmņak kōn elōn̄ eddo ko repād ippān ro jinem im jemām im baam̧le ko. Kabun̄ in emaron̄ letok meļeļe im elōn̄ men ko rem̧m̧an, bōtaab waanjon̄ak ko an baam̧le relukkuun jipan̄ eō kile bwe ko̧jpeļ ej juon men em̧m̧an im bwe ej kōm̧m̧an ad m̧ōņōņō.

Liz: Ke Iaar rūttoļo̧k, membōr eo eaar epaaktata ilo iiō eo aō ekar jokwe juon im jim̧ettan awa ettoļo̧k, innām ejjeļo̧k bar membōr ilo jikuuļ eo. Bōtaab jet men Ij lukkuun kile ekar bwe men̄e n̄a wōt, ritōl ro aō rej itok n̄an Mutual; aolep iien rej itok n̄an jemnere; iien otemjej rej itok n̄an katakin katak eo aō—aolep kajjojo iien. Rejjan̄in kar ba, “Ekwe, ewōr wōt juon am rijikuuļ kōn menin jejjab etal n̄an kūlaaj rainin.” Ij tōmak eļap aō katak, bōtaab ta eo Iaar lukkuun keememeje ej bwe ritōl ro rekar jokkin wōt juon. Im kōn wōt er, ewōr Aō iien em̧m̧an n̄an en̄jake Jetōb.

Iaar ļōmņak jej jamin kile menin letok eo an Jetōb Kwojarjar. Mekarta, ewōr jinō im jema im baam̧le im ritōl ro aō, eļan̄n̄e Ij pād ilo jikuuļ N̄aij makeļo̧k iaō. Bōtaab Jetōb ekar pād ippa. Kōn jabdewōt men ej dāpij Jetōb ilo mour eo an bar juon enaaj erom juon kareel eļap ilo jipan̄ armej eo kōjparok kien erreo.

Lizzie: Juon iaan kareel ko aō eļap ekar bōk juon naan in kam̧ool kōn n̄a make. Eļan̄n̄e kom̧ij jab kajoor im ejaake ilo ko̧jpeļ eo, elukkuun pidodo n̄an bōk juon iaļ eoktak. Bōtaab eļan̄n̄e kom̧ij jino kōm̧m̧an lukkuun lale bwe kom̧in wōr juon pedped ekajoor an ko̧jpeļ, aolep men naaj ļoore.

Hip: Eļan̄n̄e kom̧ij kōņaan wāmourour ilo kanniōk, kom̧in m̧akūtkūt, eļan̄n̄e kom̧ij m̧akūtkūt, kom̧in bōk tōprak. Eļan̄n̄e jej likūt ilo wāween an jetōb, jej aikuj m̧akūkūt ilo jetōb. Elōn̄ men ko jaikuj kōm̧m̧ani n̄an lijur jetōb, āinwōt riiti jeje ko rekwojarjar im kōm̧m̧ane men otemjeļo̧k jemaron̄ n̄an en̄jake Jetōb. Jaikuj barāinwōt kōm̧m̧ane kōttōpar ko im jipadōk kōttōpar kein. Bōtaab n̄an tōpar kōttōpar kein, jej jab aikuj kōm̧m̧ani makeļo̧k iaad. Jaikuj bōk Irooj ippād. Jen E jej bōk kajoor im Jetōb n̄an anjo ioon apan̄ ko ad. Innām jemaron̄ ļoor akweļap in an Būreejtōn̄ Thomas S. Monson:

“Jab kōtļo̧k bwe ikdelel ko rejōkkar ren kakkure ettōņak ko am̧. Jujelm̧ae kapo.

“Kememej naan ko jen Bok in Mormon: Jerawiwi ej jamin kar m̧ōņōņō.’”4

Jon̄ok eo im Kii eo

Būreejtōn Boyd K. Packer

“Jon̄ak eo ej jerbal wōt m̧okta jen m̧are im ej lukkuun jejjet ilo m̧are. Mekarta oktak in jon̄ok ko ad remaron̄ in n̄an laļ in, jekdo̧o̧n ewi aer kajjirere kake jon̄ok ko ad, jekdo̧o̧n ewi jon̄an an armej ro jet aje ļo̧k er n̄an kapo, jej jamin naaj aje ļo̧k kōj n̄an, jejjab maron̄ aje ļo̧k. …

“Kar lewaj n̄an ioom̧ menin letok eo an Jetōb Kwojarjar. Enaaj wōr unoojdikdik ko kōn mālim ak kakkōl n̄e ewōr am̧ kālet ko n̄an kōm̧m̧an. Jetōb Kwojarjar enaaj tōl eok jen nana im kōro̧o̧ltok eok eļan̄n̄e kwar jabwābwe im jako jen iaļ eo am̧. Jab meļo̧kļo̧k bwe kom̧ij ļaddik ro im leddik ro nejin Anij. Satan ejjab maron̄ kalbuuj eok. Iien otemjej kwoj kabwijer kii eo an ukweļo̧k n̄an kanemkwoj eok make jen jerawiwi.”

Būreejtōn Boyd K. Packer, Būreejtōn eo an Doulul eo an Jon̄oulruo Rijilōk ro, “The Standard of Truth Has Been Erected,” Liahona, Nov. 2003, 26.

Kwaļo̧k Kein Jipan̄ ko

    Kakememej ko

  1.   1.

    “Baam̧le Eo: Juon Naan in Kean̄ n̄an Laļ in,” Liahona, Nov. 2010, 129.

  2.   2.

    Lale Jeffrey R. Holland, “Of Souls, Symbols, and Sacraments,” in Brigham Young University 1987–88 Devotional and Fireside Speeches (1988), 77–79.

  3.   3.

    “Ilo awa in jerawiwi, karmejete ak meļo̧kļo̧k iakwe erreo ilo tōre eo ļōn̄ ej bōk jikin. Innām jāniji jelōt kōn kōņaan an kanniōk im kōņaan eo jab dāpiji. Kar errā kake eaar katak eo me devil eaar kijoror n̄an ejaake, bwe ippān doon ko itulikin m̧are ren bōk jikier.” (Teachings of Spencer W. Kimball, ed. Edward L. Kimball [1982], 279).

  4.   4.

    Thomas S. Monson, “Be Thou an Example,” Liahona, May 2005, 113.