Vakarogoca na Veivakauqeti

Ena dua na bogi a dro mai nodratou vale na tavalequ gone, au mani kusa yani meu vaqarai koya. Niu draiva tiko, au masuta na Yalotabu me vukei au. Au kila ni na sauma mai na Kalou ka dusimaki au, kau tovolea meu vakarogoca na veivakauqeti ni Yalotabu. Niu sega ni rogoca rawa e dua na ka, sa tekivu meu nuiqawaqawa kau vakila ni sega ni vakauqeti au tiko na Yalotabu.

E dina niu vinakata meu lako vakayawa yani ena noqu vaqaqara, au vakila ni dodonu meu tiko wavolita ga na vanua e tiko kina nodratou vale na tavalequ. Au mani nakita kina meu draiva wavoki tale mada vakadua. Niu kele ena dua na ilesu ni sala, au raica ni taubale tiko e dua na goneyalewa ena vanua buto. Au sa kunei tavalequ!

Niu sobu ka cici yani vua, au qai kila ni a tuberi au tikoga na Yalotabu ena nona vukei au meu vakila ni dodonu meu tiko voli ga ena dua na vanua. Baleta niu a vakarorogo tiko ki na dua na domo malumu, a voleka sara meu vagaluya na veivakauqeti ni Yalotabu. Au qai kila mai na gauna oya ena vuqa na gauna eda na sega ni rogoca e dua na domo, ia eda na vakila na veivakauqeti e lomada.

Au a vakavinavinakataka vakalevu na veituberi ni Yalotabu. E dina sara ni dau tiko voli ga e yasada o Koya! Me vaka e tukuna na ivolanikalou, “Ena sala vata voli ga kei iko na Yalo Tabu” (V&V 121:46).

Kevaka eda sa kilikili kaya na veituberi ni Yalotabu ka da vakarorogo, e rawa ni da iyaya ni cakacaka ena ligana na Kalou me da caka vinaka vei ira e vuqa na tamata. Ena veitokani tudei ni Yalotabu, eda na kila na sala me da lako kina.