iTukutuku ni Mataveiliutaki Taumada, Janueri 2013
Na Domo ni Turaga
Na Vunau kei na Veiyalayalati e sureta na tamata taucoko ena veivanua kecega me ra rogoca na domo ni Turaga o Jisu Karisito (raica na V&V 1:2, 4, 11, 34; 25:16). E vakasinaiti tu ena Nona itukutuku, na ivakasala ni qaqarauni, kei na veivakauqeti ni veivakayaloqaqataki ka vakatakilai mai vei ira na parofita digitaki. Ena ivakatakila eso oqo eda rawa ni raica kina na sala e rawa ni sauma kina na Kalou na noda masu ni vakabauta ena itukutuku eso ni veidusimaki, ni sautu, kei na ivakasala ni qaqarauni.
Ena noda masu eda segata kina me da kila na veika e vinakata na Kalou me da cakava, na veika me da cakava me da kunea kina na sautu kei na marau ena bula oqo kei na kena e tarava, kei na veika e waraki keda tu mai. Na Vunau kei na Veiyalayalati e vakasinaiti tu ena isau ni taro eso era dau taroga na tamata walega kei ira na parofita ena masu ni yalomalumalumu. E rawa ni idusidusi talei sara me vakavulici keda ena ivakarau me da ciqoma kina na isau ni taro me baleta na noda tiko vinaka vakayago kei na noda vakabulai tawamudu.
Sa kena idola na yalomalumalumu kei na vakabauta na Turaga o Jisu Karisito. A ciqoma o Oliver Cowdery e dua na isaunitaro mai vua na Turaga ena vuku ni nona gagadre me veivuke ena kena vakadewataki na iVola i Momani: “Nanuma tiko kevaka e sega na vakabauta o na sega ni rawata e dua na ka; o koya me da kerekere kina ena vakabauta. Kakua ni vakawaletaka na veika oqo; mo kakua ni kerea na veika e sega na betena” (V&V 8:10).
Sa dau gadreva vakavuqa na Turaga ena Vunau kei na Veiyalayalati, na vakabauta kei na yalomalumalumu ni bera ni qai solia mai na Nona veivuke. E dua na vuna oya ni rawa ni sega ni dau yaco mai ena sala eda namaka na Nona isaunitaro. E sega talega ni dau rawarawa na noda ciqoma.
E vakaraitaki na dina oqo ena itukutuku ni Lotu kei na veika era a sotava na tubuda. A masu vagumatua na tukaqu vakarua o Henry Eyring me kila na veika me cakava ena gauna e rogoca kina na kena vakatavuvulitaki na kosipeli vakalesui mai ena 1855. A yaco mai na kena isau ena dua na tadra.
E tadrā ni dabe tiko ena dua na teveli vata kei Elder Erastus Snow mai na Kuoramu ni iApositolo Le Tinikarua kei na dua na italatala na yacana o William Brown. E vakatavuvulitaka tiko o Elder Snow na ivakavuvuli ni kosipeli me rauta ni dua na auwa. Oti qai kaya o Elder Snow, “Ena yaca i Jisu Karisito au vakaroti iko mo na papitaiso ka na papitaisotaki iko na turaga qo [Elder Brown].”1 E vakavinavinaka na noqu matavuvale ni a tu vei Henry Eyring na vakabauta kei na yalomalumalumu me papitaisotaki ena dua na tobu wainiuca ena 7:30 ena mataka lailai mai St. Louis, Missouri, Amerika, mai vei Elder Brown.
Na isau ni nona masu e sega ni yaco mai na dua na rorogo ni domo ni Turaga. E yaco mai ena dua na raivotu kei na tadra ena bogi, me vaka a yaco vei Liai (raica na 1 Nifai 8:2).
Sa vakatavuvulitaka vei keda na Turaga ni isau ni taro e rawa ni yaco mai ena veika eda vakila. E vakavulici Oliver Cowdery o Koya ena Vunau kei na Veiyalayalati, “Raica ena vakatakila vei iko na Yalo Tabu, ena lako yani vei iko ko Koya ka tukutuku sara ki lomamu” (V&V 8:2).
Ka vakayaloqaqataki Oliver vaqo o Koya: “Au a sega li ni vakaceguya kina na yalomu? Ai vakadinadina cava tale ko gadreva me uasivia na ivakadinadina sa solia na Kalou?” (V&V 6:23).
Na Vunau kei na Veiyalayalati, na itukutuku ni Lotu, kei na itukutuku a maroroya tiko o Henry Eyring ena nona kaulotu ni oti toka ga nona papitaiso sa vakavulica vei au ni isaunitaro e rawa ni vakilai me ivakasala ni qaqarauni ka vu ni vakacegu talega.
Ena Epereli ni 1857, a tiko kina o Elder Parley P. Pratt mai na Kuoramu ni iApositolo Le Tinikarua ena dua na koniferedi ena vanua sa kilai tu nikua me o Oklahoma, Amerika. E vola o Henry Eyring ni “a vakasinaiti tu na vakasama” nei Elder Pratt, “ena yalolailai … , ka sega ni rawa ni kila na veika se bera ni yaco mai se dua na sala me dro tani kina.”2 A qai vola o Henry na itukutuku rarawataki ni oti sara ga oya me baleta na nona solibula na iApositolo. A lako ga o Elder Pratt e dina ni vakila tu na veika rerevaki ena sotavi, me vaka ga a cakava na Parofita o Josefa ena nona lako ki Carthage.
Sa noqu ivakadinadina ni dau sauma na Turaga na masu ena yalomalumalumu ni vakabauta. Na Vunau kei na Veiyalayalati kei na veika eda sa dau sotava yadua sa vakatavulici keda ena ivakarau me da dau raica kina na isaunitaro eso oqori ka ciqoma ena vakabauta, se ivakadei ni ka dina, se ivakasala ni qaqarauni. Sa noqu masu me da dau vakarogoca tikoga na domona dauloloma na Turaga.
© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12. Vakadonui me vakadewa: 6/12. Vakadewa ni First Presidency Message, January 2013. Fijian. 10661 858
Veivakavulici mai na iTukutuku Oqo
1. Tovolea mada mo ni wilika vata na parakaravu me baleta na masu ena itukutuku oqo. Ni da wiliwili tiko, kerei ira na lewe ni matavuvale me ra vakarorogo sara vakavinaka ki na ivakarau e dau saumi masu kina na Kalou. Tovolea mada mo vakadinadinataka na bibi ni masu.
2. Na Vunau kei na Veiyalayalati e vakasinaiti tu ena isau ni taro eso era taroga na tamata ena masu. Vakacava mada kevaka a sega ni volai tu na isau ni nodra taro (na ivakatakila)? Vakauqeti ira na matavuvale me ra vulica me ra dau kila ka muria na veivakauqeti ni Yalotabu. Era na vinakata beka me ra vola na veika era vakasamataka me baleta na masu ena nodra ivolaniveisiga.