Kagandahan sa Buong Paligid
Kunwari bumibisita ka sa Africa. Habang tinitingnan mo ang mababangis na hayop gamit ang iyong largabista, napansin mo ang isang hugis na papalapit sa iyo. Agilang kuwago pala! Habang papalapit ito, itinaas mo ang iyong mga bisig bilang panangga. Ngunit sa halip na manakit, ang kuwago ay dahan-dahang lumapag sa iyong kamay, humuni-huni at tumingin sa iyo sandali bago muling lumipad. Ito ay talagang nangyari kay Pangulong Boyd K. Packer, Pangulo ng Korum ng Labindalawang Apostol. Gustung-gusto niya ang mga hayop lalo na ang mga ibon.
Ang isang paraan na ipinakikita ni Pangulong Packer kung gaano niya kamahal ang kalikasan ay sa pamamagitan ng sining. Mula pa noong bata siya, gustung-gusto na niya ang magdrowing, magpinta, at umukit. “Lahat ng nakikita ko ay nagpapatunay sa aking kaluluwa na mayroong Diyos, na lumikha sa lahat ng ito,” sabi ni Pangulong Packer.
Idinrowing ni Pangulong Packer ang mga hayop na ito noong siya ay 11 taong gulang. Nag-uuwi ang kanyang Itay ng mga sobrang papel na hindi ginamit ng lokal na pahayagan, at nakadapang nagdodrowing si Pangulong Packer. “Kung ang pagdodrowing ay isang karamdaman, parang matindi ang pagdapo nito sa akin,” sabi niya.
Si Pangulong Packer ay mga 10 taong gulang nang gawin niya ito mula sa mga pinecone na nakalap nang minsang magkamping ang pamilya.
Habang naglilingkod bilang piloto sa militar, nagpadala si Pangulong Packer ng mga liham sa kanilang tahanan na nakasilid sa mga sobreng pinalamutian niya sa mga sandaling wala siyang gaanong ginagawa.
Si Pangulong Packer ay nakapag-ukit ng napakaraming ibon sa paglipas ng mga taon. Sinabi niya na ang pag-ukit ay nakatutulong sa kanya na magrelaks at makapag-isip kung ano ang dapat niyang sabihin sa susunod na pagbibigay ng mensahe.
Tinabas at pininturahan ni Pangulong Packer ang mga ibong ito na yari sa kahoy noong bata pa siya, gamit ang tabla mula sa mga lumang kahon at pinturang ibinigay sa kanya ng isang kapitbahay.
Mga larawan sa kagandahang-loob ni Pangulong Boyd K. Packer