Na Vuravura e Gadrevi ira na iVuvu Edaidai

Vei ira e vuqa, na ilakolako ni ivuvu ni 1847 a sega ni tekivutaki e Nauvoo, Kirtland, Far West, se New York ia mai na vanua yawa o Igiladi, Sikoteladi, Scandinavia, se Jamani. Era na sega ni taura taucoko sara na gone lalai na vakabauta bula ka vakauqeti ira na nodra itubutubu mera biuta tu mai kina na matavuvale, itokani, vakacegu, kei na bula rawati ira.

Ena taroga beka e dua na gone lailai, “I Nau, na cava tou sa biuta kina na nodatou itikotiko? Tou sa lako kivei?”

“Lako mai, ka talei; tou sa lako tiko ki Saioni, na koro ni noda Kalou.”

A toka ena tadrua ni itikotiko taqoqo kei na iyalayala kei Saioni na wai vakaitamera cudrucudru ka vakadomobula na Atalanitika. O cei ena rawa ni tukuna na yaluma rerevaki ka tara tu na loma ni tamata ena ilakolako ni takoso voravora oya? Ena veivakauqeti ni vakasolokakana malumu ni Yalotabu, ka tokoni ena vakabauta e tudei ka rawarawa, o ira na ivuvu Yalododonu oya era a vakadinata na Kalou ka sokota yani na nodra ilakolako.

Era qai mani yaco sara ki Nauvoo ka sega ni dede na nodra sa tekivu toso tale me tadravi na veidredre eso ni nodra ilakolako. Na vatu ni bulubulu ka tuvani vakamatau ena vatu era vakatakila na ibulubulu eso ni ilakolako mai Nauvoo ki Salt Lake City. Sa vakaoya na isau ni veika era a taura kina eso na ivuvu. E sa buluti tu na yagodra ena vakacegu, ia na yacadra ena bula tu ga me tawamudu.

Era vakavodo vakasivia na bulumakau, era tatamelamela na yava ni qiqi ni iusana, era yamaraki na turaga qaqa, e rogo na dramu ni vakacibivalu, ka ra qolou na koli daukata. Ia era a toso ga na ivuvu vakabauta vakauqeti ka ra daubole ni curuma na draki veivakatovolei eso. Ka ra dau lagata wasoma:

Era a nanuma na ivuvu oqo na vosa ni Turaga: “Raica sa kilikili mera vakatovolei na noqu tamata ena ka kecega, mera marautaka kina na veika lagilagi au sa vakarautaka tu me nodra, io na lagilagi kei Saioni.”²

Na toso ni gauna e sa vakaseavutaka na noda vakanananu ka tosoya sobu na noda vakavinavinakataki ira na a lakova na salatu ni rarawa, ka biuta tu yani, na veibulubulu, tawa vakayaca ni vakatakilakilataki ena ivakatakilakila ni veibulubulu ni wainimata. Ia vakacava na veibolebole edaidai? E sega beka na sala veivatu me lakovi, sega na ulunivanua sukusukura me cabeti, sega na qakilo me takosovi, sega na sala e vakarau me vakamai, sega na uciwai me vorati? Se sa tiko beka e dua na gagadre ni yalo vakaivuvu vakaoya me tuberi keda tani mai na veika rerevaki ka saga me tilomi keda, ka liutaki keda ki na Saioni taqomaki?

Ena veiyabaki ni mai cava na iKarua ni Valu Levu, e sa torosobu tikoga na ivakarau ni bula ni tamata. Sa tubucake tikoga na basulawa; sa tatacebaceba sobu na ivalavala maqosa. Levu era sa vodoka tiko na qiqi vakaitamera ni leqa, ena qarai tiko ni veivakamarautaki leleka ena solibulataki na reki tawamudu. Eda calata kina na vakacegu.

Eda sa guilecava na nodra vorata rawa na domobula ni vuravura na kai Kirisi kei na kai Roma kei na veika a yaco ena qaqa oya—ena kena mai lutu sobu ka malumalumu na nodra qaravi tavi ka vakavuna na nodra vakaloloma. Me kena itinitini, era a vinakata vakalevu cake mai na bula galala, na toka dei ga kei na logaloga vinaka; ka ra mai vakayalia kece yani kina na—vakacegu, na veitaqomaki kei na bula galala.

Kakua ni rawai vakarawarawa ena veibacani i Setani; ia, mo tudei tu ena dina. Na gagano sega ni sotavi ena sega ni vakacegui ena dua na sasagataki tawayalani ni reki ena maliwa ni veika taleitaki e veivakurabuitaki ka veivakacalai. Na cala ni bula ena sega ni rawata na bula dodonu. Na veisevaki e sega ni veimuataki kina loloma. Na dadatuvu ena sega ni veivakayaloqaqataki. Na lomalomarua ena sega ni vakauqeta na vakabauta.

Eso era kunea ni dredre mera vorata na veivakalialiai kei na nodra veivakacacani na lialia ka ra beca na tiko savasava, yalodina, kei na talairawarawa ki na ivakaro ni Kalou. Ia na vuravura e sa vakatorosobutaka na bulataki ni ivakavuvuli. Ena gauna sa vakaroti kina o Noa me tara e dua na waqa levu, o ira na tamata sese era a vakaraica matua na lomalagi ka sega na kena o ka qai veivakalialiai ka veivakasesei—me yacova ni sa tau mai na uca.

E dodonu li meda vulica na lesoni bibi oqo ena veigauna kecega? E veisau na gauna, ia na dina ena tudei tu ga. Ena gauna eda sega ni rawaka kina mai na veika eda sa sotakaya oti, eda sa vakaleqai meda talevi ira tale ena taucoko ni kedra vakamosiyalo, veivakaleqai vakakina na veivakararawataki. E sega beka vei keda na yalomatua meda talairawarawa kina vei Koya sa kila tu na ivakatekivu mai na ivakataotioti—na noda Turaga, o koya ka tuvana na yavu ni veivakabulai—ka kakua ki na gata oya, ka a beca na kena totoka?

Na ivolavosa e vakamacalataka na ivuvu me “dua ka lako e liu me vakarautaka se tadolava na gaunisala mera muria na kena vo.”³ E rawa beka ni da rawata na yaloqaqa kei na tudei ni inaki ka vakatakilai ira na ivuvu ni dua na itabatamata sa oti? E rawa beka vei iko kei au, vakaidina, me daru ivuvu?

Au kila ni rawa vei kedaru. Isa, sa gadreva vakaidina tu o vuravura na ivuvu edaidai!