2013
Vakatavulici kei na Vulici ni Kosipeli
Julai 2013


iVaqa ni Veisiko, Julai 2013

Vakatavulici kei na Vulici ni Kosipeli

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko. Me ikuri ni itukutuku, gole ki na reliefsociety.lds.org.

Vakabauta, Matavuvale, Veivukei

A dua na qasenivuli cecere o Jisu Karisito. A vakarautaka o Koya na ivakaraitaki vei keda ena Nona “vakatavulici ira na marama vakailawalawa ka vakayadua talega, ena gaunisala kei na baravi, ena drano ka vakakina ena nodra veivale. E vakaraitaka o Koya vei ira na loloma dina ka vakabulai ira kei na lewe ni nodra matavuvale.”1

A vakatavulici Maca kei Meri o Koya ka “sureti rau me Nona tisaipeli ka vakaitavi ena veivakabulai, ‘na ivotavota vinaka’ (Luke 10:42) o koya ena sega ni kau tani mai vei rau.”2

Ena noda ivolanikalou edaidai, e veivakaroti na Kalou meda “veivakavulici vakai kemudou ena ivakavuvuli ni matanitu” (V&V 88:77). Ena vakatavulici kei na vulici ni ivunau, a tukuna kina o Cheryl A. Esplin, ikarua ni daunivakasala ni Lalai ena veiliutaki raraba, “Na vulici ni kena kilai deivaki sara na ivunau ni kosipeli e sa ituvatuva ni dua na bula taucoko ka yaco vaka ‘vosa ena vosa, na vunau ena vunau, vakalailai eke ka vakalailai mai kea’ (2 Nifai 28:30).”3

Ni da vulica, vakasamataka, ka masu, eda na veivakatavulici ena kaukauwa ni Yalo Tabu, o koya ka na kauta na noda itukutuku “ki na yalodra na luve ni tamata” (2 Nifai 33:1).

Mai na iVolanikalou

Alama 17:2–3; 31:5; Vunau kei na Veiyalayalati 42:12–13; 84:85

Mai na Keda iTukutuku Makawa

Era sa vakananumi keda vakamarama na noda parofita eliu ni sa noda na itavi bibi vaqasenivuli ena itikotiko kei na Lotu. Ena Sepiteba 1979, a kerei keda kina o Peresitedi Spencer W. Kimball (1895–1985) meda “marama dauniivolanikalou.” A tukuna okoya: “Mo kenadau ena ivolanikalou—ka mo kakua ni beca kina e dua, ia mo laveti ira cake kina! Sa dina sara, o cei e gadreva vakalevu cake me ‘vakamareqeta’ na dina ni kosipeli (ni ra na dau gadreva ena gauna dredre) mai vei ira na marama kei na tina era maqusa ena veisusu kei na veivakatavulici?”4

Eda sa qasenivuli ka dauvuli taucoko. Ni da vakatavuvuli mai na ivolanikalou kei na vosa ni parofita bula, sa rawa ni da vukei ira tale eso mera lako mai vei Karisito. Ni da vakaitavitaki keda vakavuli ena noda vakataroga na veitaro vakaibalebale ka qai vakarorogo toka, sa rawa ni da kunea na isaunitaro ka veiganiti kei na noda gagadre vakaikeda.

Na Cava Au Rawa ni Cakava?

  1. Au sa vakavakarau vakacava tiko me’u na qasenivuli vinaka cake?

  2. Au dau wasea beka na noqu ivakadinadina vei ira na marama au vakaraici ira tiko?

iDusidusi

  1. Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 3.

  2. Luvequ Yalewa ena Noqu Matanitu, 4.

  3. Cheryl A. Esplin, “Vakavulici Ira na Luveda Mera Kila,” Liaona kei na Ensign, Me 2012, 10.

  4. Spencer W. Kimball, ena Luvequ Yalewa ena Noqu Matanitu, 50.