Au Sa Qai Rawata Meu Sereka Laivi na Noqu Rarawa

Au a marautaka dina na gauna rau a papitaiso kina ena neitou tabanalevu na noqu itokani o Baraca Chen kei watina. Ni oti e dua na yabaki mai na gauna ni nodrau papitaiso, rau a laki vauci ena valetabu, ka vauci sara vei rau na luvedrau gonetagane ka mate ni bera ni rau lewena na Lotu. A totoka ni da raica nodrau sa tubu ena kosipeli na Chen

Sa qai mate ena dua na vakacalaka o Baraca Chen ena yabaki ka tarava. Ni oti na vakacalaka o ya e tara saraga na noqu vakasama na nona mate ka dau vaka me vakaleqa na noqu vakanananu. Au dau yadra vata mai na wai ni mataqu ka dau vakataroga tu ga, “Se cava na vuna? Na cava e dau vakatara kina na Turaga me yaco na veivakacalaka vakaoqo? Na cava me yaco kina ki na dua na matavuvale vinaka vakaoqo na ka oqo?” Ena dua na siga niu vakananuma tiko na taro oqo, au taura cake e dua na ivola ni veituberi ka wilika sara na veivosa oqo mai vei Peresitedi Spencer W. Kimball (1895–1985):

Kevaka meda nanuma tiko ni bula oqo e baleta walega na mai tiko eke, ia sa ka ena veivakararawataki sara na mosi, na rarawa, na sega ni rawa-ka kei na bula lekaleka. Ia, kevaka meda raica na bula me ka e tawamudu ka na tete yani ki na veika sa oti taumada ka toso yani ki na mate tawamudu ni veika e se bera mai, sa na qai veisemati vinaka sara na veika e yaco tiko. …

“Eda sega beka ni temaki me vakatovolei kina na noda kaukauwa, tauvimate meda vulica na yalomalua, meda mate me rawa kina ni da na sega ni mate rawa tale ka qai vakalagilagi.¹

Ena gauna oqori, au sa sereka laivi saraga na noqu rarawa ka vakanamata yani ki na veika sa yalataki ka na rawati talega. Au qai raica ena mata ni yaloqu ni sa sotavi ratou na nona matavuvale ena marau o Baraca Chen. A vakacegui au sara ga na ka au raica. Au kila ni Tamada Vakalomalagi ena solia vei keda na vuku kei na kaukauwa meda sotava kina na dredre.