Vukei o Violet

A qumia matua o Emma na nona beqi ka gole yani ki na rumu ni kalasi. Sa imatai ni siga ni vuli. A dara tiko na nona vinivo taleitaki duadua, ka sa tawa vata tu mai kei na kena ivakasigalevu totoka o Nana— na bisikete kamica bulicaki vakamanumanu.

“Ena totoka na siga nikua,” a vakananuma voli o Emma. “Kevaka ga me na—”

A tu vakadua o Emma ka rai takoso yani ena rumu ni kalasi. Sa toka o koya. O Violet.

Ena yabaki sa oti, a dau laki qito tu ga o Violet ena ililili. E dau vakatokayacataki Emma. A butakoca talega eso na itokani nei Emma!

A rai mai o Violet ka darayame mai vei Emma. A wadra yani vakaukauwa o Emma, ka ququmi vakaukauwa sara ki na nona beqi. Ena yabaki taucoko sa oti e a ivakarau ca tu ga o Violet, ka rairai ena sega ni duidui ena yabaki oqo.

“Ni bula vinaka mai kalasi, ki na dua na yabaki vou!” A kaya yani o Miss Caldwell mai na mata ni rumu. “Me sa lesi mada na nomuni idabedabe.”

Sa tuvai takoso vakayarurua na desi ena rumu ni kalasi. A raica sara o Miss Caldwell na yacadra; ka dusia yani e rua na desi veitikivi ena yatu e muri. “Emma. Iko mo dabe e kea.”

A laki dabe sara o Emma ena dua vei rau na idabedabe e muri. Sa nuitaka tiko mena laki dabe e yasana o Liselle. Se o Jaime. Se o—

“Violet.”

A duri cake vakasauri na ului Emma. Sa donu beka na ka a rogoca?

Io. Sa dusi tikoga mai o Miss Caldwell ki na desi e yasana. “O iko Violet, mo na dabe yasai Emma,” a kaya mai.

A gole ga yani vakamalua o Violet kivei Emma ena matacudrucudru. A davora sobu na uluna ena desi o Emma ka wadrava yani na lalaga. Sa na dua na yabaki balavu.

Ena gauna ni fika, a vola o Miss Caldwell eso na medre ni fika ena vava ni volavola mera walia na kalasi. “ Sa rawa mo cakacaka duadua se vata kei koya e yasamu,” a kaya.

A solega sara vakatotolo o Emma na nona pepa, me vaka ga ni sa volavola tiko. A rawarawa tu ga na medre vakafika o ya. Sa saga tiko me lako tani mai vei Violet. A sega mada ga ni raici koya vakadua ena mataka taucoko oya.

E dua na ka sa qisora mai na dakuna. E vaka na penikau. A sega ni via kila o Emma.

Se baci qisori tale mai. Sa qisori koya tiko mai o Violet! Sa volavola tikoga vakayalokaukauwa o Emma.

Na ikatolu ni qiso nei Violet sa kaukauwa sara ka mosi. Sa vakila o Emma ni sa katakata mai na yalona. Sa na vaka beka oqo na yabaki taucoko? Sa nanuma sara me sa laveliga me tukuna vei Miss Caldwell. Se me wadravi Violet tale vakaukauwa.

Sa qai rogoca o Emma na cerucake. E dua beka e tagi? Sa qisori koya tale mai na penikau. A rai yani ka sa wanonovi koya tu mai o Violet. A taura toka na nona peni, ka tonawanawa na matana. Sa bokobokoci tu ena raba na nona pepa.

E cowiritaka e ligana o Violet na nona peni. “E rawa beka ni o vukei au?” a kerea vakamalua.

E vakawadravi koya o Emma me dua na miniti, ka kurabui sara. E gadreva beka o Violet me vukei koya? Ni sa dau vakacacani koya tu mai? A railesu o Emma ki na nona pepa. E rawa vei Violet me cakacakataka ga. E sega ni gadreva na veivuke nei Emma, e dina ni …

… dabe tiko e yasana?

A rai yani vakamalua ki liu o Emma. E rawa ni rogoca na tagi vakamalua nei Violet. E tukuna tiko na ivolanikalou me lomani ira nona neiba—ia e duatani o Violet! E dabe tikivi koya tiko e yasana o Emma ena kalasi!

A tekivu volavola tale o Emma. Sa tarova na nona volavola. E rairai sega beka ni duatani o Violet. E rairai beka ni gauna e tukuna kina na ivolanikalou meda lomani ira noda neiba, sa kena ibalebale meda lomani ira na tamata kecega. Vakakina o ira era tamata ca sara. E dina ga ni sa rui ka dredre.

Sa luluvu o Emma ka biuta sobu vakamalua na nona penikau. A qai vuki yani vei Violet ka saga vakaukauwa me dredre. “E rawa niu veivuke?” a taroga.

A deguvacu o Violet, ka qusia e ligana na wai ni matana.

A kala yani o Emama ki na pepa nei Violet ka tekivu vukei koya ena imatai ni medre vakafika. Sa vakasinaiti oti tu na lomana ena vakacegu. A vakasamataka ni na vinakata beka o Violet na bisikete kamica.