2013
Maqusataki na Cakacaka ni Veivakabulai
Okotova 2013


Maqusataki na Cakacaka ni Veivakabulai

Ni da veisureti yani, loloma, ka qaravi ira na tamata, eda sa yaco meda tisaipeli dina i Jisu Karisito ka vukea na kena maqusataki na cakacaka ni veivakabulai.

iVakatakilakila
Two families interacting together.

E dina ga ni sa marautaki tiko na nodra na cakacaka tiko ena kompiuta na daukaulotu tudei ka ra veivakasarasarataki tiko ena veivalenilotu, era sa tiki lailai sara ni cakacaka levu oqo ni veivakabulai. E ka bibi cake sara na noda rawa ni umanaki keda yani na lewenilotu ki na maqusataki na cakacaka levu oqo ni veivakabulai. Eda sega ni kerei meda vakaitavitaki keda ki na dua na parokaramu vou. Eda vakayaloqaqataki walega meda sa tisaipeli dina i Jisu Karisito. Sa noda itavi meda cokonaki keda ena loloma ka qaravi ira era tiko voliti keda—ka vakaceguya e dua eda cakacaka vata e sotava na leqa, sureti ira noda itokani ki na dua na papitaiso, vukea na nona sasamaki e tautuba e dua na neiba sa qase, sureta e dua e luluqa tu vakalotu me mai kana, se vukea e dua na neiba ena nona cakacaka ni tuva kawa. Oqo era sa sala dodonu, ka rekitaki meda sureti ira kina era luluqa tu vakalotu kei ira eda sega ni lotu vata ki na noda bula ka dewa sara ki na rarama ni kosipeli. Na noda wasea vei ira na noda veigauna lasa kei na veigauna vakalou ena rawa me dua dina na sala mana duadua vua e dua vei keda me “cakacaka e na were ni vaini [i Jisu Karisito] mera vakabulai kina na tamata [na tagane kei na yalewa] (V&V 138:56).

Na Cava Beka na Cakacaka ni Veivakabulai?

Na cakacaka ni veivakabulai sa nona cakacaka na Tamada Vakalomalagi “me ra tucake tale mai na mate na tamata kecega, ka rawata na bula tawamudu” (Mosese 1:39). Na cakacaka bibi oqo e wili kina na cakacaka vakadaukaulotu ni lewenilotu, nodra maroroi na saumaki mai, vakabulabulataki ni lewenilotu luluqa, cakacaka ni tuva kawa kei na valetabu, kei na vakavulici ni kosipeli.1 Sa dau vakavuqa, na noda nanuma ni ra sega ni lakovata na veigacagaca oqo ni kosipeli. Ia ena Kakaburaki ni Veiliutaki e Vuravura Raraba: Na Cakacaka ni Veivakabulai ena 23 ni June, 2013, e vakavulica kina o Elder Russell M. Nelson ena Kuoramu ni iApositolo Le Tinikarua ni “ra sega ni rawa ni vakaduiduitaki na cakacaka. Era sega ni itaviqaravi duidui oqo; era tiki kecega ni cakacaka ni veivakabulai.”2

Na malanivosa “Maqusataki na Cakacaka ni Veivakabulai”—na yaca ni mataveilawa itokani ni kakaburaki (hasteningthework.lds.org)—e vakaibalebaletaki tiko ki na yalayala ni Turaga: “Io au na kitaka kusarawa na noqu cakacaka ena kena gauna” (V&V 88:73).

Na cakacaka vakalotu bibi ni matabete—na papitaiso, veivakadeitaki, nodra tabaki na tagane ki na matabete, kei na cakacaka vakalotu ni valetabu—era sa ikakalawa cecere ena noda salatu ni lesu vua na Tamada Vakalomalagi. Ni da vakaitavitaki keda ena cakacaka ni veivakabulai, eda sa muria ka vakauqeti ira eso mera muria na salatu oqo ni veiyalayalati.

Era na Cakacaka vata na Lewenilotu kei Ira na Daukaulotu ena Ruku ni iDola ni Matabete

Sa kena gauna oqo meda sa raica vakatabakidua tale na ivakavuvuli bibi ni noda lewena na Lotu ni Turaga ni sa kena ibalebale ni da sa kacivi meda vakaitavi ena noda bula taucoko ena Nona cakacaka ni veivakabulai. Sa tu vei ira na peresitedi ni iteki kei na bisopi na idola ni matabete ni cakacaka ni kaulotu ena nodrau dui tabana ni Lotu3 ka vukei ira na lewenilotu mera vakayacora na veika era dau cakava na tisaipeli dina i Karisito— me wasea na rarama ni kosipeli. Sa tu vei ira na peresitedi ni kaulotu na idola ni matabete me rawa kina ni ra dusimaka na nodra cakacaka na daukaulotu era liutaka.4 Era sa vulica tu mai na daukaulotu tudei me vakavulici ira era sa tu vakarau mera ciqoma na kosipeli. Era vukei ira na lewenilotu ena cakacaka ni kaulotu ni lewenilotu, ka sega ni kena veibasai. Sa yaco kina mera itokani na daukaulotu tudei kei ira na lewenilotu daukaulotu ena kena kau yani na kosipeli ki na nodra bula o ira sa vakarautaki ira tiko na Turaga mera ciqoma.

Ena gauna ni kakaburaki, a kaya kina o Peresitedi Thomas S. Monson: “Oqo na gauna mera lako vata mai kina na lewenilotu kei na daukaulotu, mera cakacaka vata, mera veiqaravi ena loga ni vaini ni Turaga ka kauta mai na yalo kivei Koya. E sa vakarautaka tu o Koya na veika meda wasea kina na kosipeli ena sala e vuqa, ka na vukei keda o Koya ena noda veiqaravi kevaka eda na bulataka na vakabauta ka vakacavara na Nona cakacaka.”5

iVakatakilakila
Elder missionaries teaching and contacting in Atlanta, Georgia.

A vosa o Elder Neil L. Andersen ena Kuoramu ni iApositolo Le Tinikarua me baleta na bibi ni loloma. A kaya kina, “Eda sa cakacaka vata ena vakabauta kei na duavata—ka da vakabauta ni sa na dusimaka na Turaga na noda ilakolako kei na noda duavata vakai keda vata kei ira na daukaulotu, ka da vakauqeti tikoga ena noda lomani [Jisu Karisito] ka veilomani tiko vakai keda, kei ira eda qarava.6

Era na Veiliutaki na Matabose ni Tabanalevu, Era na Veivakarautaki na iLiuliu ni Kaulotu ena Tabanalevu

Ena veidusimaki nei bisopi, sa nona itavi na matabose ni tabanalevu me tuvanaka, tokona, ka vakarautaka na nodra sasaga na lewe ni tabanalevu ena kena tuvanaki ka liutaki na cakacaka ni veivakabulai ena tabanalevu.7

Me vaka ni lewe ni matabose ni tabanalevu, sa itavi nei iliuliu ni kaulotu ena tabanalevu me “vakarautaka na sasaga ni tabanalevu ena nodra vakasaqarai, vakavulici, ka papitaisotaki na dauvakatataro. E vakarautaka na cakacaka oqo vata kei na nodra cakacaka na daukaulotu tudei.”8

iVakatakilakila
Bishopric and ward leaders meeting together in a ward council meeting.

Ena nona vosa tiko o Elder Nelson, vei ira na iliuliu ni kaulotu ena tabanalevu, a kaya kina mera:”Veivuke ena kena vakatawani nodrau ivola ni loku [na daukaulotu] ena iloku vakaibalebale eso mera kakua ni laki tuki katuba ena kena vaqarai o koya me vakavulici. … [Sai kemuni] na isema e semati ira na daukaulotu, na matabose ni tabanalevu, kei ira na lewe ni tabanalevu.”9

Na iVakarau Dina ni Rawa Ka

Eda sa vakalougatataki na Yalododonu Edaidai ni da mai bula donuya na gauna oqo ni Nona sa maqusataka tiko na Turaga na Nona cakacaka. Ena vuku ga ni Nona inaki na Kalou me mai biuti keda tu e vuravura ena gauna vakaoqo, sa tu vei keda na kaukauwa meda gugumatua cake mai na kena eda a vakasamataka rawa. Ia kevaka ga meda vakayacora ga ena yalovinaka kei na loloma vei ira era gadreva tu na noda veitokani kei na veivuke, eda na sega ni guce rawa. Na rawati ni kaulotu e dau yaco ena kena vakamuri na veivakauqeti vakayalo ki na noda vakasama kei na yaloda kei na nodra dau sureta eso ki na noda bula sa yavutaki ena kosipeli. Na veisureti sa ivakatakilakila ni rawa-ka, se ra papitaiso na tamata se sega se ra gugumatua ena Lotu. Me vaka a kaya o Elder Jeffrey R. Holland ena Kuoramu ni iApositolo Le Tinikarua me baleti ira na mataivalu levu oqo ni daukaulotu era sa curuma yani ena gauna oqo na kena buturara: “Sa noda gauna oqo meda sa na kaya kina, ‘Era sa lako mai.’ Sa noda itavi taucoko meda tuvatuva kina ka vakayagataka na ivurevure oqo sa soli mai lomalagi ena sala gugumatua sara e rawa ni rawati.”10

iVakatakilakila
An elder missionary talking to a male passenger on a bus.

Sa gauna oqo vei keda taucoko meda kila vakamatata sara na noda itavi ena maqusataki ni cakacaka ni veivakabulai. Ni da vakayacora me tiki tudei ni noda bula na cakacaka ni kaulotu ni lewenilotu, maroroi o ira sa saumaki mai, vakabulabulataki o ira na luluqa tu vakalotu, cakacaka ni valetabu kei na tuva kawa, ka vakavulica na kosipeli, eda na sotava na reki cecere ka vakatikori vei keda na isolisoli vakayalo eda sa gadreva meda vaqaqacotaka kina na Lotu ena 21 ni senitiuri.

iDusidusi

  1. Raica na iVoladusidusi 2: Veiqaravi ena Lotu (2010), wase 5.

  2. Russell M. Nelson, Na Cakacaka ni Veivakabulai: Kakaburaki ni Veiliutaki e Vuravura Raraba, 23 ni June, 2013, hasteningthework.lds.org.

  3. Raica na iVoladusidusi 2, 5.1.6; 5.1.9.

  4. Raica na iVoladusidusi 2, .5.1.6.

  5. Thomas S. Monson, Na Cakacaka ni Veivakabulai, hasteningthework.lds.org.

  6. Neil L. Andersen, Na Cakacaka ni Veivakabulai, hasteningthework.lds.org.

  7. Raica na iVoladusidusi 2, 5.1.2.

  8. iVoladusidusi 2, 5.1.3.

  9. Russell M. Nelson, Na Cakacaka ni Veivakabulai, hasteningthework.lds.org.

  10. Jeffrey R. Holland, Na Cakacaka ni Veivakabulai, hasteningthework.lds.org.

Taba ivakaraitaki mai vei David Stoker

iTaba vakaraitaki mai vei John Luke kei Cody Bell