Dua na Kateni iYaloyalo

Ena vica vata na yabaki sa oti keirau a laki biuta e dua na iusausa ena ibenubenu kei watiqu ena noqu raica e dua na marama cakacaka e kea ni tomika cake e dua na kateni me biuta ki na ikamakama ni benu. Vakasauri na kena tadola na kateni, ka lutu mai eso na iyaloyalo.

Niu sarava toka yani, a yaco mai e dua na veivakauqeti kaukauwa meu laki kauta mai na kateni iyaloyalo oya. Au rika mai tautuba ni motoka ka veivuke ena tomi iyaloyalo. Keirau mani nanuma vata kei na marama oya ni rairai biu mai vakacala ka na iyaloyalo, au mani kerei koya me solia vei au na iyaloyalo meu laki vakaraica kevaka e dua e vinakata me nona.

Niu vaqisia na vica na drau na iyaloyalo e tu ena kateni oya, au mani raica e dua na waqanivola ka toka kina na yacana e dua mai Warburg, Alberta e Canada. Ena loma ni vica na yabaki e tarava, au a vola e vica na ivola vei ira e tautauvata na iotioti ni yacadra, ia e sega ni dua me bau saumi mai.

Ni rawa vei keitou vakamatavuvale me keitou curu ena Initaneti, au qai kila ni tiko e dua na isoqosoqo ni itukutuku makawa mai Warburg. Au taroga kevaka e dua e cakacaka tiko e kea e kila na yaca au raica ena daku ni iyaloyalo.

Ni oti e dua na vula keitou a ciqoma e dua na qiri mai vua e dua na turaga ka ratou a veitaratara vua na isoqosoqo. E kaya mai ni tiko volekati keitou o ganena, ka kerea kevaka e rawa ni mai raica mada na iyaloyalo. Keitou tukuna ni rawa saraga.

Ena siga ka tarava, e rau lako mai o Floyd kei Beth Hawthorn, ka rau Yalododonu Edaidai ruarua, me rau mai raica na iyaloyalo. Niu dolava na kateni, e kaya sara o Baraca Hawthorn, “Sai koya sara ga oqori,” ka dusia na iyaloyalo ka toka e cake. Oya na kena iyaloyalo na tukai Sisita Hawthorn.

Ni rau taura cake yadudua na iyaloyalo, erau talanoataka vei keitou o Baraca kei Sisita Hawthorn na italanoa me baleti ira na tamata ena iyaloyalo yadua. Erau vakatitiqa na Hawthorn ni rau veiwekani kei na tamata a laki biuta laivi na iyaloyalo, ka rau sega ni kila na vuna e laki biu kina ki na ibenubenu.

Au vakila vakaukauwa sara ni a vukei au na Tamada Vakalomalagi meu vakalesuya na iyaloyalo vei iratou na matavuvale na Hawthorn. Au vakadinadinataka ni cakacaka ni tuva kawa e dua vei ira na cakacaka bibi duadua me caka. Kevaka sa lomada me da cakava na cakacaka, ena vukei keda na Turaga me da cakava.