2013
Matadredredre ga ka Kaya Sega
Okotova 2013


Matadredredre ga ka Kaya Sega

E vakaitikotiko na dauvolaivola mai Metro Manila e na yatu Filipaini.

Au dau vakasuka na gunu e dau soli vei au, ia oqo sa solia tiko vei au na peresitedi ni kabani e dua na bilo waini.

iVakatakilakila
A woman being offered alcoholic drinks.

iVakaraitaki mai vei Sudi McCollan

Ena dua na vulaikatakata, au a vakaitavi ena noqu vulitara ena dua na yanuyanu mai Bicoli ena Yatu Filipaini. E vakasakiti na irairai ni wasawasa, kau dau vakanamata ki na veimataka.

Ia, au dau domobulataka na karobo. Oqori na gauna era dau gunu ka caka soqo ni marau kina na tamata ena keba. Dau yaco mai vakalevu na veisureti ki na mataqali soqo vakaoqori, ka dodonu me keitou dau lako kina kei iratou na noqu itokani vulitara, me vaka ni na vakaraitaka na sega ni veidokai kevaka keitou sega ni lakova.

Na imatai ni soqo na veikidavaki vei ira na vulitara vovou. Au rere ni tiko kina, baleta niu kila ni na soli vei keitou na gunu kau sega ni kila meu vakasuka vakacava. Au qirita e dua noqu itokani ena neitou tabanalevu mai vale, ka solia mai vei au eso na ivakasala uasivi ka vakadeitaka na yaloqu.

Ni sa tekivu na soqo ni marau, era solia vei keitou na gunu ia, kalougata, ni sega ni lavaki me keitou gunu. Me vaka ni ratou sa ciqoma tu na noqu itokani vulitara na noqu sega ni dau gunu, sa rawarawa kina vei au ena gauna oqo meu vakasuka na gunu e soli tarava mai—me yacova ena dua na bogi. Ena dua na gauna ni soqo ni marau, a lako mai na peresitedi ni kabani. A kauta tiko mai e dua na tavaya lambanog (e dua na waini ena vanua oya ka caka mai na niu). Ni yaco ga mai, au raica ni sa sova tiko eso na waini. Oti qai kaya, “E dodonu mo vulica na ivakarau ni gunu” ka solia na bilo vua e dua na vulitara. A totolo ga na nona gunuva.

Sa tekivu tavatukituki na utoqu. Sega ni dede sa na yaco mai na noqu gauna. Au vakasolokakana tiko ga vei au, “Au na sega ni gunuva. Au na sega ni gunuva.” Au qai raica ni sa dodoka tu mai vei au na bilo na peresitedi. Au sega ni kila na ka meu cakava. Eratou vakararai tu mai na noqu itokani vulitara, ka waraka se cava au na cakava. Au matadredredre vei peresitedi ka kaya vakamalua, “Ni vosota saka, au sega ni dau gunu.”

Au kila ni a rarawa. E taroga se cava au sega kina ni gunu. Au kaya, “O au e dua na Momani.”

Qai kaya o koya, “Au se bera ni rogoca na lotu oqori. E vaka na irogorogo ni dua na mataqali kakana.” Era dredre taucoko na tamata.

Au matadredredre talega, sega ni baleta nona veiwali ia baleta niu kila niu a cakava na ka dodonu.

Sega tale ni qai dua e solia vei au na gunu. Ia e sega ga ni oti na veivakalialiai, vei ira sara mada ga na noqu itokani. E kaya sara e dua niu lasu tiko ka ni sega ni vakasamataki rawa ni ra sega ni dau gunu na lewe ni Lotu. Ena gauna oqo sa tekivu meu vakila mai na veika dau yaco mai vei ira na lewe ni Lotu.

Sa vakavulici vei au e vuqa na lesoni ena noqu tiko mai na yanuyanu oya, sega walega ena veika vakavuli ia ena veika vakayalo. Au vulica ni na sega beka ni oti na veivakalialiai, ia ena tuberi iko na Yalo ni Turaga mo cakava na veika e dodonu.